1 Ke ayọhọ usen ita Esta amaasịne afọñ ubọọñ amọ anyʌñ akedʌk esịd akwere adidem, ke iso afe adidem. Adidem aketie ke ebekpo ubọọñ amọ ke afe, ase ntondʌk. 2 Ke ini adidem akekịtte Abọọñanwaan Esta naña ada ke esịd akwere, anye amaakop inemesịd abaña anye anyʌñ anyan esañ ubọọñ a-akebaaha anye ke ubọk anọ anye. Ndin Esta amaasaña akpere anyʌñ atuuk mben esañ ubọọñ ado.

3 Ndin adidem amaabịp ate, "Nsoo ido, Abọọñanwaan Esta? Nsoo ido ebeeñe mfo? Ñkọm ado mbaak keed abioubọọñ mmi, ñyaayaak unọ fiin."

4 Esta amaabọọrọ ate, "Adieke anemme adidem esịd, yak adidem ye Haman edi usọrọ ndia ami mbeeñeke nnọ anye mfịn ami."

5 Adidem amaabo, "Iben Haman idi ke usọp-usọp nọ ñnyịn inam se Esta abeeñe."

Akem adidem ye Haman emaekaa usọrọ ndia ake Esta akebeeñeke. 6 Ke idaha ammọ esʌkkọ enwọñ ukọd, adidem amaamaana abịp Esta "Idahami nsoo ido ebeeñe mfo? Eyaeyaak unọ fiin. Nsoo inyʌñ ido ebeeñe mfo? Ñkọm akpedo abio ukara mmi mbaakka iba, eyaenam unọ fiin."

7 Esta amaabọọrọ ate, "Akam mmi ye ebeeñe mmi edo mi: 8 Adieke adidem ammaaha miin ye mfọn, ñko adieke anemme adidem esịd adinọ ebeeñe mmi ñnyʌñ nnam ebeeñe mmi, yak adidem ye Haman edi usọrọ ndia ake ami ñyemme adinam ñkpọñ nnọọ ammọ. Ndin ami ñyaabọọrọ mbuume adidem."

9 Haman amaanyọñ usen ado ye inemesịd anyʌñ aba ke sịbidịd idaara. Ado anye akekekịt Mọdekai ke inuaatob adidem anyʌñ adiọọñọ ke anye ikponoke imọ inyʌññọ ibaak imọ, anye amaayọhọ ye ifiobesịd abaña Mọdekai. 10 Ado Haman amaamʌm idem amọ akama anyʌñ anyọñ ufọk.

Adikoot mme ufan amọ ye anwaan amọ, Seres, abon, 11 Haman amaanam inua anọ ammọ abaña mme uwak inie amọ, uwak nditọ ideen amọ, ye afịd usʌñ naña adidem ikpono imọ ye naña anye adịppe imọ akan afịd mme mbọọñ ye mme adaaha mfen. 12 Haman amaamaana adian do ate, "Ikweeñeke ke ado, ami ndo ukweeñe awo Abọọñanwaan Esta akoodo yak asaña ye adidem adi usọrọ anye akenamma. Anye anyʌñ amaana añkoot miin ye adidem ñkpọñ adiisiere mi. 13 Ado afịd mme ñkpọ ami innọọhọ miin uyʌkkọ adaña nte ami ñkịtte awo Yuu ado Mọdekai naña atie ke inuaatob adidem."

14 Anwaan amọ Seres ye afịd mme ufan amọ emaebo anye ete, "Wuuk eto anyọọñọ nte kubid aba mme duob*, ndin bo adidem ke ubakusen yak ekọọñ Mọdekai do. Ndin kaa usọrọ ndia ado ye adidem ke nọ idem mfo inemesịd." Akikere ami amaanem Haman esịd, ndin anye amaadaaha eto ado.