1 "Seeme aseeme baña mme akpanabọọñ Isrel 2 nyʌñ bo ate:

" ‘Eka ndufo akedo uman ekpe

ke atu mme ekpe!

Anye akena ke atu ammọ

anyʌñ abọọk mme ñyịn amọ.

3 Anye amaabọọk keed ke atu ñyịn amọ,

ndin anye amaanyʌñ akappa ado anie adudu ekpe.

Anye amaakpeep adiwai ñkpọ se anye amʌm,

ndin anye amaanyʌñ akappa ado andita awo.

4 Mme idịd emaekop ebaña anye,

ndin emaemʌm anye ke ukpe ammọ.

Ammọ emaekọp anye ke akpọnọ

eben ekaa isọñ Iyib.

5 " ‘Ke ini eka amọ amaakekịt ke idodanyen ibaaha,

ke idodanyen imọ akpa mfʌhọ,

anye amaasio ñyịn amọ keed mfen,

anyʌñ anam anye ado anie adudu ekpe.

6 Anye amaasaña ke atu mme ekpe,

sia anye akedido anie adudu ekpe.

Anye amaakpeep adiwai ñkpọ se anye amʌm,

ndin anye amaanyʌñ akappa ado andita awo.

7 Anye amaabiat mme ñkpọsọñ itie ammọ,

anyʌñ anam abio ammọ anaa ukpọk.

Isọñ ado ye afịd awo se ikidʌñọ do

emaekop ndịk enọ uyio ñkuun amọ.

8 Ndin mme idịd emaedaaña eda ebaña anye,

eto ke mme ñkanñkʌk ado.

Ammọ emaetat iyịre ammọ enịm enọ anye,

enyʌñ emʌm anye ke ukpe ammọ.

9 Ammọ emaekọp anye ke akpọnọ edʌt esịn ke ikad,

enyʌñ eben anye esọk adidem Babilọn.

Ammọ emaesịn anye ke ufọk ñkpakọb,

anam awo ikikoppo uyio ñkuun amọ aba

ke mme ikpọabod Isrel.

10 " ‘Eka mfo akeba nte fain ke inwañ fain mfo;

eketọ anye ke mben mmọọñ;

anye amaanwịm mfịd anyʌñ anie uwak ñkọk

ke ntak uwak mmọọñ.

11 Mme ñkọk amọ emaesọọñ idem,

edot se ekpekama enam esañubọọñ.

Idaha amọ amaakoñ

akan mme atu eto mfen,

emaesọp ekịt anye ke ntak unyọọñ amọ

ye uwak ñkọk amọ.

12 Ado emaewịppe anye esio ke ifiobesịd

enyʌñ etop eduọk ke isọñ.

Afịm ayobio usakkautịn amaanyʌñ anam anye ayeppe,

emaekịp mfịd amọ esịññe;

mme nsọọñ ñkọk amọ emaebʌñọ,

ikañ amaanyʌñ ata ammọ.

13 Idahami etọ anye ke akpautatan,

ke isọñ a-Asatta eti-eti.

14 Ikañ amaato ñkọk amọ keed awuọ

anyʌñ ata mme mfịd amọ.

Ñkọk se isọñ idem ndomokeed isʌhọke aba ke idem amọ,

akpedotto se ekama enam esañubọọñ.’

Ami ado aseeme, anyʌñ ado se ekama eseeme aseeme."