1 " ‘Ke ini ndufo edeemeke isọñ nte udeeme, ana ndufo eyaak itie isọñ enọ Abọọñ nte adisana ubaak isọñ, udomo kubid tọsịn edịb mme ition (25,000)* ke unyọọñ ye udomo kubid tọsịn edịb (20,000) ke ukpa*; afịd itie ado adiido adisana. 2 Ke atu ami, ubaak isọñ a-adooho udomo kubid ikie ition (500)* ke naña mbañ inaañ anie adina nnọọ adisana itie, ndin udomo kubid aba mme duob* ke ñkanna amọ ana anọ ñkaña isọñ. 3 Ndin domo udomo kubid tọsịn edịb mme ition (25,000) ke unyọọñ ye udomo kubid tọsịn duob (10,000)* ke ukpa sio ke adisana itie ami. Do ke adisana itie adiiba, Ataa Nsasana Itie. 4 Anye adiido adisana ubaak isọñ anọ mme aku, e-enamma ñkpọ ke adisana itie e-enyʌññọ esaña ekpere adinam ñkpọ ke iso Abọọñ. Anye adiido itie ufọk ammọ anyʌñ ado nsasana itie e-esiooho enịm enọ adisana itie. 5 Ubaak isọñ a-adooho udomo kubid tọsịn edịb mme ition (25,000) ke unyọọñ ye kubid tọsịn duob (10,000) ke ubara adiinie mme Lifai, e-enamma utom ke tembịd, nte udeeme ammọ adibọp mme abio se edʌñọ ke esịd.

6 " ‘Ana ndufo enọ abio isọñ a-akponno ke ukpa kubid tọsịn ition (5,000)* ye kubid tọsịn edịb mme ition (25,000) ke unyọọñ, e-ebenne ekedian ye adisana isọñ; anye ado adiinie afịd Isrel.

7 " ‘Akpanabọọñ adiinie isọñ adiaññake adaña ye ñkañ a-anaaha anọ adisana isọñ ye anye a-anieghe abio. Anye ayaatara ke ukañ usobutịn anyʌñ atara ke usakkautịn akaa ñkañ usakkautịn, asaña ke unyọọñ tọọñọ ke adaña usobutịn tutu akewuọ usakkautịn asak iso ase keed ke atu mme udeeme ekpək. 8 Isọñ ami adiido udeeme amọ ke Isrel. Ñko nditọ ideen abọọñ mmi idiifiighe mbon mmi aba ado eyaeyaak mbon Isrel edat isọñ enie akeene mme esiin ammọ.

9 " ‘Ami ado se Abọọñ Andikara atañ: Ndufo nditọ ideen abọọñ Isrel, emenam ebọhọ adaña; a-akem ndin! Isịññe idem ikpọñ ntịme ye adifiik awo inyʌñ inam se ifọn ye se inyʌñ idot. Itre adibịn mbon mmi nsịññe ke abio, Abọọñ Andikara atañ. 10 Ndufo ana ekama nnen-nnen udomoñkpọ, nnen-nnen udomo efa* ye nnen-nnen udomo baad*. 11 Ana efa ye baad edo ukem ke ndaha, yak baad adọñọ mbakka udomo họma keed ke itie duob ñko efa adọñọ mbakka udomo họma keed ke itie duob; ana họma ado nsọọñọnda udomo anọ naña iba. 12 Yak sekel* akem ye kera edịb. Sekel edịb dian sekel edịb mme ition dian sekel duob mme ition anọ mina keed*.

13 " ‘Ami ado asaña-asaña enọ a-afo anieghe adinọ: mbakka efa* keed ke itie itiokeed a-atooho homa wiid keedekeed ye mbakka efa* keed ke itie itiokeed a-atooho homa baali keedekeed. 14 Nnen-nnen udomo adan ọlif, e-ekamake baad edomo, ado mbakka keed ke itie duob ke udomoñkpọ baad* e-edomoke eto kọọ keedekeed (a-asịneke baad duob me họma keed, sia baad duob ado ukem ye họma keed). 15 Ñko ana esio edọñ keed ke atu afịd udịmedọñ a-ayọhọke ikie iba se ito idịm Isrel se enekke eduọk mmọọñ enọ. Mme ñkpọ ami ke ediikama inam mme uwa abakpa, ufọfọb uwa ye uwa adidiana keed se ekama enam ñkpeubọk enọ mbon awo, ami ado se Abọọñ atañ. 16 Afịd awo ke idʌñ eyaenọ akpanabọọñ Isrel asaña-asaña enọ ami. 17 Adiido utom akpanabọọñ adinọ mme ufọfọb uwa, uwa mfịd ye adinwọñ uwa ke ini usọrọ ado, ke mme Ufa Afiọñ ye ke mme Sabad, ke afịd ndimek usọrọ ke Isrel. Anye adiinọ uwa idiọọkñkpọ, uwa mfịd, ufọfọb uwa ye uwa adidiana keed adinam ñkpeubọk nnọọ ufọk Isrel.

18 " ‘Se Abọọñ Andikara atañ ado ami: Ke akpa usen ke akpa afiọñ ndufo enie adidat ñyịn ayaaraenañ ammiinieghe ndo nnam adisana itie asana. 19 Aku anie adidat ubaak iyiib uwa idiọọkñkpọ afiọññọ ke abọbọọk anyenusʌñ tembịd ye ke naña mbañ anyọñ akpokoro uwa inaañ ye ke mme inuaatob esịd esa abọọñ. 20 Ana ndufo enam ukem ado ke ayọhọ usen itiaba ke afiọñ enọ awo akeedodo i-imiikifiọkkọfiọk inam idiọọkñkpọ me awo a-anamma ke unanaifiọk. Ke ntoro ana ndufo enam ñkpeubọk enọ tembịd.

21 " ‘Ke ayọhọ usen duob mme inaañ ke akpa afiọñ ana ndufo enam Usọrọ Nsaña Mboiyo, usọrọ a-adiikpeene ke usen itiaba; ke idak ini ami ndufo ediita uyo se yiis imiisịneke. 22 Ke usen ado akpanabọọñ anie adinọ ayaaraenañ nte uwa idiọọkñkpọ anọ idem amọ ye afịd awo ke idʌñ. 23 Afịd usen ke atu usen itiaba ini usọrọ ado, anye anie adinọ ñyaaraenañ itiaba ye akukịmedọñ itiaba i-imiinieghe ndo nte ufọfọb uwa anọ Abọọñ ye akpoebod nte uwa idiọọkñkpọ. 24 Ana anye anọ efa keed a-adaaha anọ ayaaraenañ keedekeed ye efa keed a-adaaha anọ akukịmedọñ keedekeed asaña ye atu hin* adan ọlif keed kwa efa nte uwa ñkpasi.

25 " ‘Ke mme usen usọrọ itiaba ami, a-atọọñọke ke ayọhọ usen duob mme ition ke ayọhọ afiọñ itiaba, anye anie adinọ ukem enọ ado ke mme uwa idiọọkñkpọ, mme ufọfọb uwa, mme uwa ñkpasi ye adan.