1 Ke akpa usen afiọñ, ke ayọhọ afiọñ ita ke ayọhọ isua duob mme keed, ikọ Abọọñ amaadinsịm miin ate: 2 "Ayịn awo, bo Fero adidem Iyib ye afịd atu awo amọ ate:

" ‘Anie ke ekeme adiben ndomo ye afo ke uteeñe?

3 Tịm se Asiria, akesidooho sida ke Lebanọn,

anieñe mfọọn ñkọk a-awuọhọ afuuk mme akai;

ndaha amọ akoñ ke anyọñ,

anyọñ amọ adịppe akan mme mfuud eto.

4 Mme mmọọñ enam anye aseghe,

ntotəño mmọọñ ke abaitiad enam anye akọt anyọọñ;

mme idịm ammọ efeeñe

afịd ke mben amọ,

enyʌñ esio ñkọk amọ

esịn enọ afịd mme eto ke inwañ.

5 Ke ntoro anye akaiso akoñ

akan afịd eto se iba ke inwañ;

akpan ñkọk amọ akọt,

mme ñkọk amọ enyʌñ enyọọñ

etaara ke ntak uwak mmọọñ a-anye anieghe.

6 Afịd inuen ke ikpaanyọñ

ekebọp efọk ke akpan ñkọk amọ,

afịd mme unam ke akai

eman nditọ ke idak ñkọk amọ;

afịd mme ikpọ idịd

edʌñ ke idak mfuud amọ.

7 Anye amaayaiya ke ubọọñ amọ,

ye ke ntatara akpan ñkọk amọ,

sia adooho adʌñ amọ amaatịkke adʌk isọñ

akesịm uwak mmọọñ.

8 Mme sida ke inwañesa Abasi

ikidomoke idem ye anye,

ñko mme yunipa ikikanna

idukemme ye akpan ñkọk amọ,

me ñkaña eto edikan

ndomo idem ye mme ñkọk amọ,

ibaaha eto ndomokeed ke inwañesa Abasi

se ekeben edomo ye uyai amọ.

9 Ami ñkenam anye ayaiya

anieñe uwak ñkọk, ndin

afịd eto ke Idịn efịbe anye ufịb

ke inwañesa Abasi.

10 " ‘Ke ntoro se Abọọñ Andikara atañ ado ami: Sia adooho ekamba sida akọt afʌk mme ñkọñ eto mfen, ñko sia adooho anye amaadaara abaña unyọọñ amọ, 11 ami mmaayaak anye nsịn ke ubọk mme andikara ke mme idịd, nọ anye anam ye anye akeene naña ibak amọ ado. Ami mmenịm anye ñkañ keed, 12 ñko mme isen idịd enanake mbọm ekan e-ekpịkke anye eyaak enịm edakka ekpọñ. Akpan ñkọk amọ aduọ ke ikpọabod ye ke mme itịkke isọñ; mme ñkọk amọ ebʌñọ ebono ke mme abedeñ isọñ. Afịd mme idịd ke isọñ ewuọ ekpọñ idak mfuud amọ. 13 Afịd mme inuen emaedʌñọ ke eto ado a-amaakeduọ, afịd mme ndiọi unam enyʌñ edʌñọ ke mme ñkọk amọ. 14 Ke ntoro, idiibaaha eto ndomokeed mfen ke mben mmọọñ se idiiwuọ unyọọñ inyʌñ inie ntañidem, idịppe atịñe ammọ ifuuk ñnyan eto mfen. Ibaaha eto ndomokeed mfen se ikinekke inie mmọọñ a-akekanna anyọọñ ntoro; iniiso afịd ammọ akena anọ ñkpa, ke idak isọñ, ke atu mbon awo e-ekesọiyọke eka abioekpo.

15 " ‘Ami ado se Abọọñ Andikara atañ: Ke usen ekesuuhọke anye esịn ke abioekpo ami ñkefʌk mme mmọọñ ye ntua ayịd nnọ anye; ami ñkemʌm idịm amọ ñkama, ndin uwak mmọọñ amọ emaetre utom. Ke ntak amọ ami mmaaben afọñ aseeme nsịn Lebanọn, ndin afịd eto ke inwañ emaeyeeme. 16 Ami mmaanam mme idịd enyeñ ke uyio iduọ amọ ke ini ami ñkenyuuho anye nsịn ke abioekpo yak akeba ye mbon e-emaekesọiyọ idʌk ube. Ndin afịd mme eto ke Idịn, nti ye mfọọn ñkan eto ke Lebanọn, mme eto se enekke eduọk mmọọñ, emaebọ idọñesịd ke idak ederimbod. 17 Ammọ ñko, nte akpọsọñ sida, emaesọiyọ ekaa abioekpo, ebịne mbon se ekewot ke akañkañ, ye mbon ekọñ e-ekedʌññọ ke idak mfuud amọ ke atu mme idịd.

18 " ‘Akee ke atu mme eto ke Idịn ke ekeme adiben ndomo ye afo ke uyai ye ke ubọọñ? Ado eyaenyʌñ usuuk fiin ñko enịm ye mme eto Idịn ke idak isọñ ami; afo ayaanaa ye mbon i-imiifọọrọke edʌd, ye mbon e-ekewotto ke akañkañ.

" ‘Anyem ado Fero ye afịd atu awo amọ, Abọọñ Andikara atañ.’ "