1 Ndin ete ado amamben miin akaa adoro akedʌk ke esa abọọñ anyʌñ amben miin akedʌk ubeed a-akesakkaiso ase ufọkesa tembịd ye ndibene esiin ke adoro. 2 Ufọk anye u-usʌñ amọ akeseeghe ukañ adoro akedo udomo kubid ikie* ke unyọọñ ye aba mme duob ke ubom. 3 Naña iba ke ubeñ udomo kubid edịb* tọọñọ ke esịd esa abọọñ ye ke ubeñ a-akesakkaiso ase esa esiin esa abọọñ, ubeed ubonoñkpọ amaase mme ubeed mfen ke ndaha ita. 4 Ufañ se awo asaña amaaba ke iso mme ubeed ado, atiara udomo kubid duob anyʌñ anyọọñ udomo kubid ikie*. Mme usʌñ ammọ ekeba ke adoro. 5 Ndin mme ubeed anyọñ ekedo mfaha-mfaha, sia mme ubeed ubonoñkpọ emaedat uwak ufañ ato ammọ akan mme ubeed ke isọñ ye ke ufọọd. 6 Mme ubeed anyọñ ikinieñeke adaaha naña mme esa abọọñ ekenie; ke ntoro ammọ emaesiip ke ufañ isọñ ekan mbon idak ye ufọọd itie. 7 Ndin amaaba ndibene akesakkaiso ase esa abọọñ anwa esiin; anye amaatara adʌk iso mme ubeed ke udomo kubid aba mme duob. 8 Ke ini mme ubeed e-ekedianake ke ubeñ a-adaaha adiana anwaesiin esa abọọñ ekedooho udomo kubid aba mme duob ke unyọọñ, mme ubeed ñkañ akekpereke adisana itie ekedoñño udomo ikie ke unyọọñ. 9 Mme ubeed isọñ ufọk ado emaenie inuausʌñ ke edem usakkautịn naña awo atooho anwaesiin esa abọọñ adʌk ammọ.

10 Ke ñkañ usuuk ke utịd anyan ndibene anwaesiin esa abọọñ, a-awuọhọ atịkke tembịd esa abọọñ ye nsakiso ndibene esiin, mme ubeed emaebañña 11 ye inuausʌñ ke iso ammọ. Mbon ami ekeba nte ubeed e-ebaaha ke adoro; ammọ ekenie ukem unyọọñ ye ukem ubom, edubitte ke ntoñwuọ ye ke mme udomo. Mme inuausʌñ ubeed ke usuuk edubitte inuausʌñ ke adoro 12 inuausʌñ amaaba ke ntondʌk a-akedooho nsakiso ndibene akenyannake aka usakkautịn, a-mme awo ekesisañake edʌk mme ubeed ado.

13 Ndin anye amambo miin, "Mme ubeed edem adoro ye edem usuuk ekannake iso ese akwere tembịd edo ubeed mme aku, ubeed a-mme aku e-enamma utom Abọọñ ediidia mme adisana uwa. Do ke ammọ ediisịn mme nsana ñkan uwa, uwa ñkpasi, uwa idiọọkñkpọ ye uwa ndudue, sia itie ado asana. 14 Mme aku emaedọdʌk ñkañ ataa adisana itie, inaaha ammọ ewuọ eka anwaesiin esa abọọñ ibọhọke ammọ esịññe ewịra a-ammọ ekesịneke enam utom enịm, sia mme ewịra ado edo adisana. Ammọ enie adisịne afọñ mfen mbemiso ammọ esaña ekpere mme itie a-anaaha anọ atu awo."

15 Ke ini anye amaakedomo se ikidọñọ ke ñkañ tembịd ima, anye amandat miin usʌñ ato usakkautịn awuọ anyʌñ akedomo mme itie se ikiba ikanna: 16 Anye amaadomo ukañ usakkautịn ke ukwak udomoñkpọ, anye ado udomo kubid ikie ition*. 17 Anye amaadomo ukañ adoro, anye akedo udomo ikie ition ke eto udomo ñkpọ. 18 Anye amaakanna akedomo edem usuuk; anye ado udomo ikie ition ke eto udomo ñkpọ. 19 Ndin anye amaakedomo ukañ usobutịn; anye akedo udomo kubid ikie ition ke eto udomo ñkpọ. 20 Ke ntoro anye amaadomo ukpa afịd mbeñ inaañ. Anye amaanie ndibene akanna, a-akedooho udomo kubid ikie ition ke unyọọñ ye udomo kubid ikie ition ke ubom, adidiañña se isana ñkpọñ mme ñkaña ñkpọ.