Lucas 24

Mme Mbed Iba ke Usʌñ Emaus

13 Kpasʌk ke usen ado, iba ke atu mme mbed Yisọs ekeka idʌñ keed a-akekereke Emaus, a-akedooho ñkpọ nte itiad itiaba*24:13 Ñkpọ nte kilomita 11 tọọñọ ke Yeruselem. 14 Ammọ ekeneme nneme ebaña afịd ñkpọ se ikitịppe, 15 ado nte ammọ ekesʌkkọ eneme mme ñkpọntịppe ami, Yisọs ke idem amọ amaabiọññọ anyʌñ asaña ye ammọ. 16 Ado anyen ammọ ikitarake nọ ammọ ediọọñọ anye.

17 Anye amaabo ammọ ate, "Nsoo ke ndufo eneneme ke usʌñ?"

Ammọ emaetuak eda, iso ammọ ayọhọ ye mfʌhọ. 18 Ndin keed ke atu ammọ, a-akekereke Kliopas, amaabọọrọ anye ate, "Afo ado asenawo ke Yeruselem umuudiọọñọke afịd se itịppe ke usen ifañ ami."

19 Anye amaabịp ate, "Mme nsoo ñkpọ?"

Ammọ emaebọọrọ ete, "Abaña Yisọs awo Nasared akedooho prọfed, anie adudu ke ikọ ye ke adinam ke iso Abasi ye iso afịd awo. 20 Mme ñkpoon aku ye mme adaukara ñnyịn emaesaana anye eyaak nọ ebiere ikpe ñkpa enọ anye enyʌñ ekọñ anye ke krọs; 21 idodanyen ñnyịn akedo ke anye adiido andidiifak Isrel. Ikweeñeke ke ado, usen ita ado ami tọọñọ mme ñkpọ ami eketịppe. 22 Ke ado aboiyoke, ubaak ibaan ke atu ñnyịn emaenam idem ikpa ñnyịn. Ammọ ekeka udi ke ataa ubakusen, 23 ke ini ammọ imiikikịtte akpo Yisọs, ammọ emaenyọñ edidọkkọ ñnyịn ke mmimọ ikikịt mme enyere ke ñkukịd e-ekibooho mmimọ ke anye mmọdo ke uwem. 24 Ubaak mbon nsaña ñnyịn emaekaa udi enyʌñ ekekịt afịd ñkpọ naña ibaan ado eketañ, ado ammọ ikikịtte Yisọs."

25 Anye amaabo ammọ ate, "Ndufo emesịme eti-eti, aditre adisọp nnịm afịd se mme prọfed eketañ ke akpanikọ! 26 Nte ikinaaha Krais abọ ufen ndin anye adʌk ke ubọọñ amọ?" 27 Ndin anye amaatọọñọ ke Moses ye mme Prọfed mbon ñko anam anwaña ammọ mme afịd se eketañ ke ñwed Abasi a-abañake anye.

28 Ke ini ammọ emaekekpere itie a-ammọ ekekaaha, Yisọs amaanam nte isʌk idiikaka iso ke isañ. 29 Ado ammọ emaenekke eyịre anye ete aba ye mmimọ, sia ayio amaakaa adikịm; ndin anye amaakeba ye ammọ.

30 Ke ini ammọ ekesʌkkọ edia ñkpọ, anye amaaben uyo anọ ekọọm, abuuñ, ndin atọọñọ adideeme nnọọ ammọ. 31 Do ke anyen ammọ aketara, ndin ammọ emaediọọñọ anye; ado anye amaasop ammọ ke anyen. 32 Ndin ammọ emaebịp idem ammọ ete, "Nte esịd ñnyịn ikiduọhọ ini anye akesʌkkọ atañ ikọ ye ñnyịn anyʌñ akappa ñwed Abasi inọọ ñnyịn ke usʌñ?"

33 Kpa idahado ammọ emaetịmme enyọñ Yeruselem. Ndin ammọ emaekesoobo ye mme mbed duob mme keed nte eboho ye mme nsaña ammọ. 34 Mbon ado emaebo ammọ ete, "Abọọñ a-aset ke ñkpa ke akpanikọ, anyʌñ a-ayaara idem anọ Saimọn." 35 Ndin ammọ awo iba emaetañ se ikitịppe ke usʌñ isañ, ye naña ammọ ekediọọñọ anye ke ini anye akebuuñọ uyo.