1 Ke aditọọñọ ikọ akebaaba, ndin ikọ akeba ye Abasi, ikọ akenyʌñ ado Abasi. 2 Anye akeba ye Abasi ke aditọọñọ. 3 Ekekama anye enam afịd ñkpọ; ibaaha ñkpọ ndomokeed e-ekenamma i-imiikitooho anye. 4 Uwem aketo anye, ndin uwem ado akedo unwana afịd awo. 5 Unwana ami a-ayamma ke ekịm, ndin ekịm ikanna anye.

6 A-aba awo keed se Abasi akedọñ nọ adi; anye akekere Yọọn. 7 Anye akedi nte ntiense, nọ atie ntiense abaña unwana ami, nọ ato ke anye afịd awo enịm ke akpanikọ. 8 Idooho Yọọn ke idem amọ akedo unwana ado; anye akedi nte ntiense anọ unwana ado.

9 Ataa akpan unwana a-ayammake anọ afịd awo akedʌk adi ke ederimbod. 10 Anye amaaba ke ederimbod, ndin akpesʌkado e-ekenamma ederimbod eto anye, ederimbod ikidiọọñọke anye. 11 Anye amaadi ubon ammọ, ado mbon ubon ammọ ikidaarake anye. 12 Ado afịd mbon e-ekedaarake anye, mbon e-ekenịmme anyịñ amọ ke akpanikọ, anye amaanọ ammọ ayọhọ unen adikappa ndo nditọ Abasi, 13 nditọ i-imiikimanake ito uduud awo, me ke unyịmme abʌkidem, me uduak ebe, ado emana eto Abasi.

14 Ikọ amaakappa ado awo anyʌñ adʌñ ke atu ñnyịn. Ñnyịn imikịt ubọọñ amọ, ubọọñ a-ñkukweeñe Ayịn Abasi a-aketooho Ete adi, ayọhọ ye mfọn ye akpanikọ.

15 (Yọọn amaatie ntiense abaña anye. Anye amaabọñ anwa-anwa ate, "Anye ami ado anye a-ami ñketañña mbaña, idahami ñkebooho, ‘Anye añkeeneke miin ke edem a-akpon añkan miin, sia anye amaababa ke ataa anyan ini mbemiso ami mba.’ ") 16 Ato ke ntak ayọhọ mfọn amọ, afịd ñnyịn imibọ mfọn keed me aken. 17 Sia ekenọ mbed eto Moses; mfọn ye akpanikọ eketo Yisọs Krais. 18 Akenam awo ndomokeed ikịtte Abasi, ibọhọke ukweeñe Ayịn keed, a-anye ke idem amọ adooho Abasi anyʌñ aba ke ataa eti ndaha ewuana ye Ete, a-anam nọ ediọọñọ anye.

19 Yọọn amaanọ ntiense ini a-mme adaaha mme Yuu ekedọññọ mme aku ye mme Lifai eto Yeruselem ekebịp anye me anye ado anie. 20 Anye amaatañ anwa-anwa ate, "Ami ndooho Krais."

21 Ammọ emaebịp anye ete, "Ndin afo ado anie? Afo ado Elaiya?"

Anye amaabọọrọ, "Ami ndooho."

"Afo ado Prọfed?"

Anye amaabọọrọ, "Iyoo."

22 Ke akpatre ammọ emaemaana ebịp anye ete, "Ndin afo ado anie? Idọkkọ ñnyịn sia ana iben ibọọrọ isọk mbon e-ekidọññọ ñnyịn. Nsoo ke afo anie aditañ mbaña idem mfo?"

23 Yọọn amaabọọrọ ke ikọ prọfed Aisaiya ate, "Ami ndo uyio awo a-adaaha ke anaan akoot, ‘Ineeñe usʌñ inịm inọ Abọọñ.’ "

24 Ndin mme Farisi e-ekesioho edọñ 25 emaebịp anye ete, "Nsoo inam nọ afo aduọk mme awo mmọọñ akpedo afo udooho Krais, udooho Elaiya, unyʌññọ udo Prọfed?"

26 Yọọn amaabọọrọ ammọ ate, "Ami ñkama mmọọñ nnịm uduọkmmọọñ, ado a-aba awo ke atu ndufo, a-ndufo imiidiọọñọke. 27 Anye ado awo añkeeneke miin ke edem, a-adooho ami ndotto aditat udʌk ikpaukod amọ."

28 Afịd mme ñkpọ ami eketịppe ke Betani, idʌñ a-abaaha ke edem inyañ Yọdan, itie a-Yọọn akenịmme uduọkmmọọñ.

29 Edem usen, Yọọn amaakịt Yisọs nte asaña abịne anye, anye amaanyʌñ abo ate, "Se Ayịn Edọñ Abasi a-abenne idiọọkñkpọ ederimbod afep! 30 Anye ado awo a-ami ñketañña mbaña idaha ami ñkebooho, ‘Awo añkeeneke miin ke edem a-akponno añkan miin asʌk adi, sia anye amaababa ke ataa anyan ini mbemiso ami.’ 31 Ami ke idem mmi ñkidiọọñọke anye, ado ntak a-ami ñkekamake mmọọñ nnịm uduọkmmọọñ akedo nọ eben anye ewọt Isrel anwa-anwa."

32 Ndin Yọọn amaanọ ikọ ntiense anwa-anwa ate: "Ami mmaakịt Adisana Sịbidịd naña asọiyọ ato hefịn nte ibiom adidoro anye ke idem. 33 Ami ke idem mmi ñkidiọọñọke anye, ado anye a-akendọññọ miin nọ ndiduọk mmọọñ akendọkkọ miin ate, ‘Awo a-afo akịtte naña Adisana Sịbidịd adidoro ke idem ado anye a-adiikama Adisana Sịbidịd inịm uduọkmmọọñ.’ 34 Ami mmekịt ñnyʌñ ndo ntiense ke anye ado Adimek Ayịn Abasi."

35 Edem usen Yọọn amaamaana akeda do ye mbed amọ iba. 36 Yọọn akekịt naña Yisọs adisaña aboiyo, amaabo, "Se se, Ayịn Edọñ Abasi!"

37 Ke ini mbed iba ami ekekoppo se Yọọn aketañ ammọ emaekeene Yisọs. 38 Yisọs amaakanna iso, akịt naña ammọ ekeene anye anyʌñ abịp ammọ ate, "Nsoo ke ndufo eyem?"

Ammọ emaebịp anye ete, "Andikpeeb, afo adʌñ ke mmọọ?"

39 Anye amaabọọrọ ammọ ate, "Idi ke eyaekekịt."

Ndin ammọ emaekaa enyʌñ ekekịt nte anye akedʌñ, enyʌñ eba ye anye usen ado. Akedo ñkpọ nte ñkanika inaañ uweemeayio.

40 Keed ke atu awo iba e-ekekappake edo mbed Yisọs ke emaekekop se Yọọn aketañ akedo Andru, ayịneka Saimọn Pita. 41 Akpa ñkpọ se Andru akenam akedo adikiyem ayịneka amọ Saimọn ñnyʌñ ndọkkọ anye mbo, "Ñnyịn imikịt Krais." 42 Ndin anye amaaben Saimọn abịne Yisọs.

Yisọs amaase anye anyʌñ abo, "Afo ado Saimọn, ayịn Yọọn. Eduukoot fiin Kefas" (awuọñọke Pita*).

43 Edem usen, Yisọs amaabiide adika Kalili. Anye akekịt Filib, amaabo anye ate, "Ñkeene miin."

44 Filib aketo Bedsaida, idʌñ keed mme Andru ye Pita. 45 Filib amaakịt Natandiel anyʌñ abo anye, "Ñnyịn imikịt anye ake Moses akewette abaña ke ñwed Mbed, ye anye a-mme prọfed ekewette ebaña, anye ado Yisọs ayịn Yosef, a-atooho Nasared."

46 Natandiel amaabịp anye ate, "Ato Nasared? Nte eti ñkpọ akeme ito Nasared?"

Filib amaabọọrọ anye, "Kap di dise."

47 Ke ini Yisọs akekịtte Natandiel nte adi, anye amaabo, "Ataa ayịn Isrel ado ami, abiaña ndomokeed isịneke anye ke idem."

48 Natandiel amaabịp anye ate, "Afo andiọọñọ miin die?"

Yisọs amaabọọrọ, "Mbemiso Filib akedukoot fiin, ami mmaukekịt fiin ke idak eto fik."

49 Natandiel amaabọọrọ ate, "Andikpeeb, afo ado Ayịn Abasi; afo ado adidem Isrel."

50 Yisọs amaabo anye, "Afo annịm miin ke akpanikọ sia ami mmaubo ke mmaukịt fiin ke idak eto fik. Afo ayaakịt mme ñkpọ se ikpokpoon ikan ado." 51 Ndin, Yisọs amaamaana adian, ate: "Ke ataa akpanikọ ke ami udọkkọ fiin,* afo ayaakịt nte hefịn abeere, anyʌñ akịt mme enyere Abasi nte edọdọọk enyʌñ esọsọiyọ Ayịn Awo ke idem."