1 Akedo ke idaha ekeyemme itọọñọ Usọrọ Nsaña Mboiyo. Yisọs amaadiọọñọ ke ini amaakem anye adikpọñ uwem ami mbịne Ete amọ. Sia anye amaakema ikọd amọ e-ekebaññake ke ederimbod, anye amaama ammọ akewuọ akpatre.

2 Ekesʌk edia ndidia ndubi, ndin Setan amaadọdʌk esịd Yudas Iskariọd, ayịn Saimọn aditap Yisọs. 3 Yisọs amaadiọọñọ ke Ete amaayaak afịd ñkpọ asịn ke adudu imọ, ñko ke imọ ikito Abasi idi, idiinyʌñ inyọñ ibịne Abasi. 4 Ndin anye amaadakka ada ke itie ndidia, asio anyọñ afọñidem, adat tọwịd akịne ke isịn. 5 Akema anye amaatọkkọ mmọọñ asịn ke besịn, atọọñọ adiyet mbed amọ ukod keedekeed anyʌñ akama tọwịd a-anye akekịneke ke isịn akwokko ammọ ukod.

6 Akediwuọ itie Saimọn Pita, anye amaabịp anye, "Abọọñ, afo ayem iñyet miin ukod?"

7 Yisọs amaabọọrọ anye ate, "Se ami nnam idahami unwañake fiin, ado ke ini iso ayaunwaña."

8 Pita amaafaaña ate, "Iyoo, tutu amama, ndiiyakka afo añyet miin ukod."

Yisọs amaabọọrọ, "Ami mmuuyette fiin ukod awuọñọ ke afo unieghe ewuana ndomokeed ye ami."

9 Saimọn Pita amaabọọrọ Yisọs ate, "Sia adooho ntoro, Abọọñ, kuñyet ukod kpọd, ado ñyet ubọk mme iwuod kọrọ."

10 Yisọs amaabọọrọ anye ate, "Mbon e-emaekeyeyie idem inieghe ntak adimaana ñyie afịd idem, eyie ukod kpọd; afịd idem ammọ asasana. Ndin afo amesana, akpesʌkado idooho afịd ndufo esana." 11 Sia anye amaadiọọñọ awo a-adiitap anye, ntak ado akenam anye abo ke idooho afịd ammọ esana.

12 Ke anye amaakeyet ammọ ukod ama, anye amaaben afọñ amọ asịne, atịmme aketie ke itie amọ. Ndin anye amaabịp ammọ ate, "Inwaña se nnam ado inọọ ndufo? 13 Ndufo eñkoot miin ‘Andikpeeb’ ye ‘Abọọñ,’ emenen ñko sia se ami ndo ado ado. 14 Idahado a-ami, Abọọñ ye Andikpeeb ndufo iyette ndufo ukod, ana ndufo ñko eduyette emọ-emọ ukod. 15 Mminọ ndufo uwọdñkpọ nte enam ukem-ukem naña ami nnam inọọ ndufo. 16 Ke ataa akpanikọ ke ami ntañ inọọ ndufo, ayịnufọk ndomokeed ikponno ikan eteufọk amọ, isʌñutom inyʌññọ ikpon ikan awo andikidọñ anye utom. 17 Idaha ndufo imaidiọọñọ mme ñkpọ ami, eyaidiọñ ndufo imaiben isịn ke adinam.

18 "Idooho afịd ndufo ke ntañ mbaña sia mmediọọñọ mbon se ami mmek. Ado nọ ikọ Abasi e-ekewette asu, ‘Anye a-akewanake ubọk ndidia ye ami akanna ada añnwana miin.’

19 "Nnam ndufo ediọọñọ idahami, mbaak amaatịppe ndufo enịm ke akpanikọ ke ami ndo anye ami ndooho. 20 Ke ataa akpanikọ ami ntañ inọ ndufo, awo akeedodo a-anyịmmeke awo a-ami ndọññọ añnyịmme miin; awo akeedodo anyʌññọ añnyịmme miin, anyịmme anye a-akendọññọ miin."

21 Ke Yisọs amaaketañ ami ama, sịbidịd amọ amaatịmede, ndin anye amaabo, "Ke ataa akpanikọ ami ntañ inọ ndufo, keed ke atu ndufo ayantap miin."

22 Mme mbed amọ emaeduseere emọ-emọ ke ñkpaidem, enyʌñ ekere me anie ke anye atañ abaña. 23 Keed ke atu mme mbed, anye a-Yisọs akemaaha, aketie adiana anye. 24 Ndin Saimọn Pita amaatappa mbed ado abo anye, "Bịp anye me anie ke anye atañ abaña."

25 Ndin mbed ado akenyʌkkọ abere Yisọs, amaabịp anye ate, "Abọọñ, anie ke ado?"

26 Yisọs amaabọọrọ, "Awo se ami ndiinọ uyo a-ami ndiideep ke usan." Ndin anye akedeep uyo ke usan amaayaak anọ Yudas, ayịn Saimọn Iskariọd. 27 Ke ndo-ndo ado Yudas akebọọhọ uyo, Setan amaadʌk anye idem.

Yisọs amaabo Yudas ate, "Se afo ayem adinam, sọp idem nam." 28 Ado awo ndomokeed ke itie ndidia ado ikidiọọñọke ntak a-Yisọs aketañña ikọ ami ye anye. 29 Sia Yudas akedooho akama ekpad akʌk ammọ, usʌk ammọ ekekere ke Yisọs akebo anye akedep ñkpọ se ediikama inam Usọrọ Nsaña Mboiyo, me adiyem ñkpọ nnọọ mbon uweene. 30 Yudas akesʌk abọbọ uyo ado, anye amaawuọ. Ndin ayio amaakịm.

31 Ke Yudas amaakewuọ, Yisọs amaabo, "Idahami, Ayịn Awo a-abọ ubọọñ, Abasi ñko a-abọ ubọọñ ato anye. 32 Adieke Abasi abọọhọ ubọọñ ato anye,* Abasi ayaanọ Ayịn ubọọñ ke idem amọ, ndin ayaanọ anye ubọọñ ado ini keed.

33 "Nditọ mmi, ami ndiiba ye ndufo ke etək-etək ini. Ndufo eyaeñyem miin, ado kpa naña ami ñkedọkkọ mme Yuu, mmidọkkọ ndufo ñko idahami: Itie nte ami ñka ndufo idiikanna idi.

34 "Ufa ewʌhọ ke ami inọọ ndufo: Ima emọ-emọ. Kpa naña ami ima ndufo, ana ndufo ñko ema emọ-emọ. 35 Imainam ntom, afịd awo eyaediọọñọ ke ndufo edo mme mbed mmi, imaidumakka idem ndufo."

36 Saimọn Pita amaabịp anye ate, "Abọọñ, afo ayem adika uke?"

Yisọs amaabọọrọ ate, "Itie nte ami ñyem adika, afo uduukanna uñkeene idahami, ado amaamaana ko ayañkeene."

37 Pita amaabịp anye ate, "Abọọñ, ntak i-imiidooho se ami ñkan ukeene fiin idahami-e? Ami mmebeeñe idem adiduọọk uwem mmi ke ntak mfo."

38 Yisọs amaabọọrọ anye, "Amenekke abeeñe idem adiduọọk uwem mfo ke ntak mmi? Ke ataa akpanikọ ke ami ntañ unọ fiin, mbemiso akikọunen akpọk, afo ayañkañ miin ukpa ita!