1 Ke akpa usen ke udua, ke ini ayio miikinwañake diin, Mmeri Makdalin amaadika udi, anyʌñ akekịt ke emaenək itiad esio ke inua udi. 2 Anye amaafeghe abịne Saimọn Pita ye mbed keed mfen, anye a-Yisọs akemaaha, akebo "Ammọ ebenne Abọọñ esio ke udi, ndin ñnyịn idiọọñọke nte eben anye ekenịm."

3 Do ke Pita ye mbed anye ako ekedaaña ekaiya udi adikise. 4 Ammọ awo iba emaefeeñe ekaa, ado mbed anye ako amaasọp itọk akan Pita anyʌñ ato akewuọ udi. 5 Anye amaanʌhọ ase esịd udi anyʌñ akịt mme mbai afọñ linen nte ebono ke isọñ, ado anye ikidʌkkọ esịd udi. 6 Ndin Saimọn Pita a-akekeeneke ke edem amaakedisịm, amaasọiyọ ini keed adʌk esịd udi. Anye amaakịt ubaak afọñ linen a-akenaaha do, 7 ye afọñ udi e-ekedatta ewañ Yisọs ke iwuod. Afọñ ami akena isio, asanna akpọñ linen. 8 Ke akpatre, mbed a-akebemme iso akewuọ amaadʌk esịd udi. Anye amaakịt anyʌñ anịm ke akpanikọ. 9 (Sia ikitʌmmọ inwaña ammọ se ñwed Abasi aketañ abo ke Yisọs ayaaset ke ñkpa.) 10 Ndin mme mbed ado emaenyọñọ ekaiya nte ammọ ekebañña.

11 Ndin Mmeri Makdalin amaada ke mben udi atua. Ke ini anye akesʌkkọ atua, anye amaanʌhọ ase esịd udi, 12 anyʌñ akịt mme enyere iba nte esiine mfia afọñ ke idem etie ke itie e-ekenịmme akpo Yisọs, enyere keed ke ukañ iwuod, keed ke ukañ ukod.

13 Ammọ emaebịp anye ete, "Mma, nsinam afo atua?"

Anye amaabọọrọ, "E-eben Abọọñ mmi esio, ndin ami ndiọọñọke nte ammọ eben anye ekenịm." 14 Anye aketañ ami ama, ke adikanna iso anye amaakịt Yisọs nte ada, ado anye ikidiọọñọke ke Yisọs ke ado.

15 Yisọs amaabịp anye ate, "Awonwaan, ntak afo atuaha-a? Anie ke afo ayem?"

Sia Mmeri Makdalin akekereke ke awo ado akedo atọ inwañ, anye amaabo, "Ete, akpedo ameben anye asio, tañ nnọ nte aben anye akenịm ndin ami ñyaakeben anye."

16 Yisọs amaabo anye, "Mmeri."

Anye amaakanna iso ase anye, asio ñkpo ke usem Aramaik ate, "Raboni" (a-awuọñọke "Andikpeeb").

17 Yisọs amaabo anye, "Kuntuuk, sia ami ndọọhọ diin ñkeene Ete mmi. Ado kaa bịne nditọeka mmi ideen nyʌñ ke dọkkọ ammọ, ‘Ami mmedọọk mbịne Ete mmi ye Ete ndufo, Abasi mmi ye Abasi ndufo.’ "

18 Mmeri Makdalin amaadakka abịne mme mbed ye etob ami, akebo ammọ ate, "Ami mmekịt Abọọñ!" Anye amaatañ afịd ñkpọ se Yisọs akeneme ye anye anọ ammọ.

19 Ke ndubiayio akpa usen ke udua ke ini mme mbed ekebaaha itie keed, ammọ emaeyịt usʌñ ke ntak ndịk mme etubom mme Yuu, ndin Yisọs amaadʌk akeda ke ufọọd ammọ, ate, "Emem aba ye ndufo!" 20 Ke anye amaaketañ ikọ ama, anye amaawọt ammọ ubọk ye ñkañ amọ. Mme mbed emaeyọhọ ye idaara ke ammọ edikikịt Abọọñ.

21 Yisọs amaamaana abo, "Emem aba ye ndufo! Nte Ete akendọññọ miin, ami mmidọñ ndufo." 22 Aketañ ami ama, anye amaanweek ibifịk aduọk ammọ anyʌñ abo, "Ibọ Adisana Sịbidịd. 23 Adieke ndufo efeene mme idiọọkñkpọ awo ndomokeed, e-efeen mme idiọọkñkpọ ammọ; ndufo imiifeene inọ ammọ, awo idiinyʌññọ ifeen inọ ammọ."

24 Ado Tọmọs (e-esikoodo Didimọs*), keed ke atu mme mbed duob mme iba, ikibaaha ye mbed mbon ako naña Yisọs akediighe. 25 Mme mbed mbon ako emaeditañ enọ anye ete, "Ñnyịn imikịt Abọọñ."

Ado anye ikinịmme, ndin anye amaabo ammọ, "Ibọhọke ami ñkịt mbọn akpohoukwak ke ubọk amọ ñnyʌñ nsịn nnuun ubọk mmi ke itie mme akpohoukwak ekewʌhọke ke ñkañ amọ, ami ndiinịmme."

26 Udua keed akeboiyo, afịd mme mbed emaekem ibad ke esịd ufọk, Tọmọs ñko amaaba ye ammọ. Akpesʌkado e-emaekeyịt usʌñ, Yisọs amaadʌk adida ke ufọọd ammọ abo, "Emem aba ye ndufo!" 27 Ndin anye amaabo Tọmọs, "Sịn nnuun ubọk mfo mi; se ubọk mmi. Sịn ubọk mfo ke ñkañ mmi. Kuuyịk aba ado nịm ke akpanikọ."

28 Tọmọs amaabo anye, "Abọọñ mmi ye Abasi mmi!"

29 Ndin Yisọs amaabo anye, "Sia umauñkịt, amenịm ke akpanikọ. Afọfọn anọ mbon imiikịtte ado enịm ke akpanikọ."

30 Yisọs amaanam uwak utịppeñkpọ ye mme idiọọñọ mfen ke iso mme mbed amọ, a-adooho awo iwette isịn ke ñwed ami. 31 Ado ewet mbon ami nọ ndufo enịm* ke akpanikọ ke Yisọs ado Krais, Ayịn Abasi, ndin ke adinịm ke akpanikọ ndufo enie uwem eto Anyịñ amọ.