1 Ke usen ita amaakeboiyo usọrọ ndọ amaaba ke Kana ke Kalili. Eka Yisọs amaakaa, 2 emaenyʌñ ekoot Yisọs ye mme mbed amọ. 3 Ke ukọd se mme anam usọrọ ndọ ekenie amaakekweeñe, eka Yisọs amaakebo anye, "Ammọ inieghe ukọd aba."

4 Yisọs amaabọọrọ anye, "Mma, nsoo ido ndubeghe mmi? Ini mmi ikemme diin."

5 Ado eka amọ amaabo mme akamaisen ndọ ate, "Inam se anye ibo ndufo enam."

6 Abañ mmọọñ itiokeed emaediọhọ ekpere do, utọ se mme Yuu ekesikama ke ini usọrọ adinam idem asana akeene ido ammọ; abañ keed amaakeme adidọñọ ñkpọ nte kalọn* mmọọñ edịb awuọ edịb mme duob.

7 Yisọs amaabo mme akamaisen ndọ ate, "Idọñ mmọọñ ke mme abañ ado nọ ayọhọ." Ndin ammọ emaedọñ mmọọñ ke mme abañ ado tutu ayọhọ asịm inua.

8 Akem Yisọs amaabo ammọ, "Ikoi ubaak iben isọk ekamba akama usọrọ."

Ammọ emaenam ntoro; 9 ndin ekamba akama usọrọ amaatʌm mmọọñ e-ekenamma nọ akappa ukọd. Anye ikidiọọñọke nte aketo me nte ekedat, sʌk mme akamaisen ekediọọñọ. Ndin ekamba akama usọrọ amaakoot ebendọ ada nsan-nsan, 10 anyʌñ abo anye ate, "Afịd awo esito edeeme ataa inem ukọd ndin edideeme anye i-imiinemme ke mme isenawo emaekenwọnwọñ inem ado nọ ayʌkkọ; ado afo atịmme anịm ataa inem ukọd tutu idahami."

11 Utịppeñkpọ a-Yisọs akenamma mi ke Kana ke Kalili akedo akpa ke atu mme idiọọñọ a-anye akedatta ayaara ubọọñ amọ, ndin mme mbed amọ emaenịm anye ke akpanikọ.

12 Usọrọ ndọ ami akekweeñe, anye amaakpọñ akaa Kapanum ye eka amọ, nditọeka amọ ideen, ye mme mbed amọ. Ammọ emaekeba do ke ibad-ibad usen.

13 Ke ini Usọrọ Nsaña Mboiyo mme Yuu amaakedikpere, Yisọs amaakaa Yeruselem. 14 Anye amaakịt naña mme awo enyaam enañ, edọñ ye ibiom, akịt mbon ukpəho akʌk naña etie ekanna akpokoro ke mme akwere tembịd esʌk ekpəho akʌk. 15 Yisọs amaadat udʌk anam ikpa, abịne afịd awo asịññe ke mme afe tembịd, abịne mme edọñ ye mme enañ ñko; anye amaasuan akʌk mme akpəho akʌk ke isọñ, anyʌñ anyui mme akpokoro ammọ aduọọñọ. 16 Anye amaabo mme anyam ibiom ate, "Ikoono ñkpọ ami isịññe mi! Itre adiben ufọk Ete mmi nnịm itie unyam udua!" 17 Ndin mme mbed amọ emaetoiyo ikọ prọfesi e-ewette ebo: "Akpọsọñ ima a-ami nnieghe nnọ ufọk mfo iyakka mbọ emem."

18 Ndin mme Yuu emaebịp anye, "Nsoo idiọọñọ ke afo akeme iwọt ñnyịn adisọọñọ ke afo amenie adudu adinam afịd ñkpọ ami?"

19 Yisọs amaabọọrọ ammọ ate, "Iwuut tembịd ami, ndin ami ñyaamaana mbọp anye ke usen ita."

20 Mme Yuu emaebọọrọ ete, "Ekedat isua aba mme itiokeed ebọp tembịd ami, ndin afo ayaabọp anye ke usen ita?" 21 Ado tembịd a-anye aketañña abaña akedo idem amọ. 22 Ke Yisọs amaakeset ke ñkpa, mme mbed amọ emaetoiyo se anye aketañ. Ndin ammọ emaenịm ikọ Abasi ye se Yisọs aketañ ke akpanikọ.

23 Ke ini anye akebaaha ke Yeruselem ke ntak Usọrọ Nsaña Mboiyo, uwak awo emaenịm anye ke akpanikọ ke ini ammọ ekekịtte mme idiọọñọ se anye akenam. 24 Ado Yisọs ikiiyakka idem inọ ammọ, sia anye amaadiọọñọ se afịd awo edo. 25 Anye ikiyemme ntiense ito awo ndomokeed, sia anye amaadiọọñọ akikere esịd awo keedekeed.