1 Pailed amaanam emia Yisọs. 2 Ndin mbon ekọñ emaedọk anyanya ñkukịm eyat anye ke iwuod, esịn anye iduud-iduud afọñ ubọọñ, 3 enyʌñ ekebo anye ndin-ndin ete, "Itọñ uwem asọñ adidem mme Yuu!" Ammọ emaenyʌñ esiak anye ufia ke mbañ.

4 Ini keed mfen, Pailed amaatịmme awuọ akebo mme Yuu ate, "Ami ñyaasaana anye ñyaak inọ ndufo sia ami ñkịtte ndudue a-anye anamma." 5 Yisọs amaakewuọ adi ye anyanya ñkukịm ye afọñ ubọọñ, Pailed amaabo ammọ "Se ete ado mi!"

6 Ado mme ñkpoon aku ye mme adaaha ammọ ekekekịt anye, ammọ emaesio ñkpo ete, "Ikọñ anye ke krọs! Ikọñ anye ke krọs!"

Ado Pailed amaabọọrọ ammọ, "Ndufo iben anye ikaa ikikọñ ke krọs sia ami ñkịtte ndudue a-anye anamma."

7 Mme Yuu emaeyiire ete, "Ñnyịn iminie mbed, ñko ke adikeene mbed ado, ana anye akpa sia anye abo ke imọ ido Ayịn Abasi."

8 Pailed akekop ami, idem amaanekke anyeñ anye, 9 ndin anye amaatịmme adʌk esịd akwere akebịp Yisọs ate, "Afo ato uke?" Ado Yisọs ikibọọrọke anye. 10 Pailed amaabo anye, "Umbọọrọke miin? Udiọọñọke ke mmenie adudu adusaana ñyaak me adukọñ fiin ke krọs?"

11 Yisọs amaabọọrọ anye ate, "Afo ukpunieghe adudu ndomokeed ke idem mmi akpedo ukuubọọhọ adudu uto anyọñ. Ke ntak ado anye a-ambenne miin usọk fiin anam idiọọkñkpọ a-akponno akan."

12 Tọọñọ ke idahado kaa iso, Pailed amaayem usʌñ naña anye akpesaana Yisọs ayaak, ado mme adadusʌñ mme Yuu emaekaa iso ebọñ ke akpọsọñ uyio ete, "Adieke afo asaanake awo ami ayaak, afo udooho ufan Sisa. Awo akeedodo a-abooho ke ido abọọñ anyaaña itie ubọọñ ye Sisa."

13 Pailed akekop ami, anye amaaben Yisọs awuọ adi aditie ke ñkpọitie ubiideikpe e-ekoodo Esa Itiad (ke usem Aramaik ekoot Kabata). 14 Usen ado akedo usen mbeeñeidem Usọrọ Nsaña Mboiyo, ndin akedo ñkpọ nte ñkanika duob mme iba uweemeayio.

Ndin Pailed amaabo mme Yuu, "Se Abọọñ ndufo mi."

15 Ammọ emaebọọñ ete, "Ben anye kaa! Ben anye kaa! Kọñ anye ke krọs!"

Pailed amaabịp ammọ ate, "Ebo ñkọñ adidem ndufo ke krọs?"

Mme ñkpoon aku emaebọọrọ ete, "Ñnyịn inieghe abọọñ mfen ke mmiibọhọke Sisa."

16 Ke akpatre Pailed amaasaana anye ayaak anọ ammọ nọ ekekọñ ke krọs.

Ndin mbon ekọñ emaeben Yisọs ewuọ. 17 Yisọs amaabiom krọs amọ awuọ akaa itie Ñkpọkpọrọ (e-ekoodo Kọlkọta ke usem Aramaik). 18 Ke emaekewuọ itie ado, ammọ emaekọñ anye ke krọs ye ideen iba mfen. Yisọs akesịne ke ufọọd ideen iba ami.

19 Pailed amaanam ewet idiọọñọ ekedian ke krọs Yisọs. Se ekewet akedo:

Yisọs awo Nasared, Adidem mme Yuu

20 Umiañ mme Yuu emaekoot se ekewet, sia itie e-ekekọññọ Yisọs ke krọs amaakpere anwa abio. Ekewet idiọọñọ ado ke usem Aramaik, Latịn ye Krik. 21 Mme ñkpoon aku emaebo Pailed, "Kuuwet, ‘Adidem mme Yuu’ ado wet ke anye akebo imọ ido Adidem mme Yuu."

22 Pailed amaabọọrọ ammọ ate, "Se mmaakewet, mmewewet."

23 Ke mbon ekọñ emaekekọñ Yisọs ke krọs, ammọ emaesiak afọñidem amọ ke itie inaañ edat keedekeed, afọñ idakidem kpọd akesʌhọ Yisọs ke idem. Afọñ idakidem amọ akedo ifre keed tọọñọ ke anyọñ tutu asịm isọñ, ikinieghe itie e-ekesiaha ekịm ke ñkañ.

24 Ammọ emaebo emọ-emọ ete, "Yak ñnyịn ikiiwaak afọñ ami, ado yak isịn ukañ ise me anie idiinie."

Ñkpọ ami aketịppe nọ ato do ikọ Abasi e-ekewette asu:

"Ammọ emaedeeme mme afọñ mmi ke atu idem ammọ.

Enyʌñ esịn ukañ ebaña afọñidem mmi."

Se mbon ekọñ ekenam ake adodo.

25 Eka Yisọs, ayịneka eka amọ awonwaan, Mmeri anwaan Klopas ye Mmeri Makdalin mmọdo ekedudak ekpere krọs Yisọs. 26 Yisọs akewọññọ anyen akịt eka amọ naña ada ye mbed a-anye akenekkeke ama naña ada akpere, anye amaabo eka amọ, "Awonwaan, se ayịn mfo mi," 27 ndin amaanyʌñ abo mbed ado, "Se eka mfo mi." Tọọñọ ke idahado, mbed ado amaaben eka Yisọs anyọñ ufọk amọ.

28 Ke amaakemaana koo, sia Yisọs amaakediọọñọ ke afịd ñkpọ amaakweeñe, nọ ikọ Abasi e-ekewette asu, anye amaabo, "Itọñ ansat." 29 Atu ukọd fineka amaanaa akpere, ndin ammọ emaenyiin ndọbọ ke atu ado edot ke ñkọk hisọb enyan Yisọs ke ñkpọkinua. 30 Ke Yisọs amaakebọ ukọd ado, anye amaabo, "A-akweeñe." Ndin anye amaasuuk iwuod ke isọñ asaana ukpọñ amọ ayaak.

31 Ini ado akedo ini Mbeeñeidem, ndin edemusen akena ado asaña-asaña usen Sabad. Sia mme etubom mme Yuu ikiyemme mme akpo ado ekọñọ tutu usen Sabad, ammọ emaebo Pailed yak abʌñ mbon e-ekekọññọ do ukod enyʌñ ekoono akpo ammọ esịññe. 32 Mbon ekọñ emaedibʌñ ukod akpa awo e-ekekọññọ ediana Yisọs ye ukod awo anye ako. 33 Amọ ekediwuọ itie Yisọs, emaekịt ke anye amaakpakpa, ndin ammọ ikikpaaha idem adibʌñ ukod amọ aba. 34 Utu ke ado, awo ekọñ keed amaakịm Yisọs ñkañ ke eduad, ndin iyiib ye mmọọñ emaewuọñọ. 35 Awo akekịtte ñkpọ ami akenọ ikọ ntiense ami, ndin ikọ ntiense amọ ado akpanikọ. Anye a-adiọọñọ ke imọ itañ akpanikọ, ndin anye anọ ikọ ntiense nọ ndufo ñko enịm ke akpanikọ. 36 Mme ñkpọ ami eketịppe nọ ikọ Abasi e-ewette asu: "Akpọ amọ ndomokeed idiibʌññọke," 37 ñko, kpa naña ikọ Abasi mfen abo, "Ammọ eyaeda ese anye a-ammọ ekekịmme."

38 Akema, Yosef awo Arimatia amaadibo Pailed akpọñ akpo Yisọs inọ. Yosef akedo mbed Yisọs, ado ke ndịbe sia anye akebaabaak mme ñkpoon awo mme Yuu. Ke Pailed amaakenọ unyịmme, anye amaadiben akpo Yisọs. 39 Anye akesaña ye Nikodemọs, ete a-akenwọọnọnwọọn akekịt Yisọs ke akonayio. Nikodemọs amaakama anem ufịk adan e-ekewuaha mee ye mme alo a-akedoppoke ñkpọ nte paun ata mme duob mme ition*. 40 Ammọ awo iba emaedat mme anemufịk adan ami efiọññọ Yisọs ke idem enyʌñ edat afọñ linen ewañ anye naña ido ubuuk awo mme Yuu akesido. 41 Ke itie ekekọññọ Yisọs, inwañ amaaba akpere. Ke inwañ ado ufa udi keed amaaba a-adooho kpaanam awo ikibʌhọke. 42 Sia usen ado akedooho usen Mbeeñeidem mme Yuu, ñko sia udi ado amaakpere, ammọ emaenịm akpo Yisọs do.