1 "Ado idahami kpañ utọñ, Yekọb, isʌñutom mmi,

Isrel, anye a-ami mmekke.

2 Se Abọọñ atañ ado ami,

anye a-akunamma fiin, a-akubotto fiin asịn ke idịb,

a-anyʌññọ aduunyaaña fiin:

Yekọb, isʌñutom mmi, kuufeghe ndịk,

Yesurun,* a-ami mmekke.

3 Sia ami ñyaaduọk mmọọñ ke nsaad isọñ,

ye mme idịm ke nsaad isọñ;

ami ñyaanwañña Sịbidịd mmi ndot nditọ mfo ke idem,

ñnyʌñ nnọ ubon mfo adidiọñ mmi.

4 Ammọ eyaesaiya nte mbid ke nseghe ikọd,

nte ikpọ eto ke mben mme idịm e-efegheke.

5 Usʌk eyaebo, ‘Ami ndo ake Abọọñ’;

usʌk eyaekoot anyịñ ammọ edian Yekọb;

usʌk ñko eyaewet ke ubọk ammọ, ‘Ake Abọọñ,’

enyʌñ edat Isrel nte anyịñ ammọ.

6 "Se Abọọñ atañ ado ami,

Adidem Isrel ye Andifak, Abọọñ Andikponñkan:

Ami ndo akpa, ami ñnyʌñ ndo akpatre;

amaaboiyo ke ami Abasi mfen ibaaha.

7 Anie ndin aba nte ami? Yak anye aditañ mi.

Yak anye awuọ ada ke iso mmi anyʌñ atañ anwa-anwa

se itịppe tọọñọ ami ñkenọ ikọd mmi itie ke esed,

ye se idiidi ke ini iso,

ntoro, yak ammọ etañ se idiidi ke ini iso.

8 Kuunyeñ idem, kuunyʌñ ufeghe ndịk.

Nte ami ñkitañña ikọ ami, ñkinyʌññọ nnọ uyio ami anyan ini koo?

Ndufo edo mme ntiense mmi. Nte Abasi mfen aba ke amaaboiyo ami?

Iyoo, ibaaha Itiad mfen; Ami ndiọọñọke ndomokeed."

9 Afịd mbon se inam ubobodñkpọ idooho ñkpọ ndomokeed,

ndin mme ñkpọ se ammọ ebat ke ñkpọuto edo ikpu-ikpu.

Mbon se ikpitañ ikọ inọ ammọ edo nnan;

ammọ enana ifiọk, enyʌñ edia ndọk idem ammọ.

10 Anie abot abasi me anam ubobodñkpọ,

i-imiinieghe udod ndomokeed?

11 Mbon se inam ado eyaebọ asuenne;

utọ mme anam utomusọ ado edo ñkaña awo.

Yak afịd ammọ ediboho keed enyʌñ edat itie ammọ;

eyaenam ndịk ye abuud enam ammọ.

12 Anamutom ukwak aben ñkpọutom amọ,

anyʌñ akama anye anam ñkpọ ke ukañ;

anye akama mme ukọññkpọ anam ubobodñkpọ,

anye akama adudu ubọk amọ akaa iso abot anye.

Abiọọñ adọñ anye, udịd anyʌñ abọkkọ anye;

anye inwọññọ mmọọñ, inweek anyʌñ abọkkọ anye.

13 Akọñeto akama udʌk adomo,

anyʌñ akama etoñwed anịm idiọọñọ;

anye a-akama anuun atọọñọ utom,

anyʌñ akama mme kọmpas anịm idiọọñọ.

Anye abot anye ke mbid awo,

mbid awo ke afịd ubọọñ amọ,

nọ anye adʌñ ke ñwommo.

14 Anye akpok mme sida,

imiikpemeke anye akeben saipres me afriyo.

Anye anam eto ado akọt ye mme eto mfen ke akai,

imiidooho anye atọ eto afịm, edịm anyʌñ anam anye akọt.

15 Ekama anye ebara ikañ;

anye aben usʌk akama anam idem amọ afiop,

anye abara ikañ anyʌñ anam uyo.

Ado anye ñko anam abasi anyʌñ akpono anye;

anye anam ubobodñkpọ, anyʌñ atuak iwuod anọ anye.

16 Mbakka iba eto ke anye akama abara ikañ;

anye akama ado anam ndidia amọ,

anye afọp unam amọ anyʌñ adia ayʌkkọ.

Anye anyʌñ anam idem amọ afiop anyʌñ abo,

"Ah! Idem amfiop miin; ami mmekịt ikañ."

17 Anye akama mbon se isʌhọ anam abasi, ubobodñkpọ amọ;

anye anyuuk iwuod anyʌñ akpono anye.

Anye abọñ akam anọ anye ate,

"Ñnyaaña miin! Afo ado abasi mmi!"

18 Ammọ idiọọñọke ñkpọ ndomokeed, ammọ inieghe ifiọk ibaña ñkpọ ndomokeed;

e-eyọọñọ ammọ anyen mbaak ammọ edikịt usʌñ,

enyʌñ esiit ammọ esịd anam ammọ ikanna idiọọñọ ñkpọ.

19 Awo ndomokeed isuuhọ itie ikere,

ibaaha awo ndomokeed se inie ifiọk me eti iwuod adibo,

"Ami ñkekama mbakka amọ iba mbara ikañ;

ami mmaanyʌñ ñkama ukañ amọ nnam uyo,

ami mmaafọp unam ñnyʌñ nta.

Me ado se ñkpekama se isʌhọ nnam mbubiam ñkpọ?

Me ado se ami ñkpenyuuk iwuod nnọ ukpịd eto?"

20 Utọ awo ado adia ntọñ; awo ammiinịmme ke akpanikọ atịn anye usʌñ;

anye ikanna inyaaña idem amọ, inyʌññọ ikan ibo,

"Nte ñkpọ ami ke ubọk nnasia mmi idooho nsu?"

21 Yekọb, toiyo mme ñkpọ ami,

amaado afo, Isrel, afo ado isʌñutom mmi.

Ami ñkunam fiin, afo ado isʌñutom mmi;

Isrel, ami nduufreke fiin.

22 Ami mmekwọọk mme ndudue mfo mfep nte ntọñanyọñ,

ndiọiñkpọ mfo nte ntuhube ubakusen.

Tịmme ñkeene miin,

sia ami mmufak fiin.

23 Ikwọ ikwọ idaara, ndufo mme hefịn, sia Abọọñ a-anam ami;

ibọñ ke akpọsọñ uyio, ndufo mbon se iba ke esịd isọñ.

Ibomo ikwọ ikwọ, ndufo mme ikpọabod,

ndufo mme akai ye afịd eto ndufo,

sia Abọọñ a-afak Yekọb,

anye a-awọt ubọọñ amọ ke Isrel.

24 Se Abọọñ abo ado ami,

Andufak fiin, a-akubotto fiin ke idịb:

Ami ndo Abọọñ,

Andinam afịd ñkpọ,

a-anyannake afịd mme hefịn,

a-ntatta ederimbod ke idem mmi ikpọọñ,

25 anye a-abiada idiọọñọ mme nsu-nsu prọfed

ñnyʌñ nnam amọ ekappa useme,

26 anye a-anamma uyio nditọufọk amọ

anyʌñ anam mme utañunịm ikọ isʌñutom amọ ewuọ esu,

a-atañña abaña Yeruselem ate, eyaedʌñ ke anye,

atañ abaña mme abio Yuda ate, eyaemaana ebọp ammọ,

anyʌñ atañ abaña mme ñwuudo ammọ ate, ami ñyaamaana mbọp ammọ,

27 anye a-atañña ye utəño mmọọñ ate, sat,

ndin ami ñyaanam mme idịm ndufo esat,

28 anye a-atañña abaña Sairọs ate, anye ado akpemeedọñ mmi,

ayaanyʌñ anam afịd se ami nnem esịd mbaña;

anye ayaatañ abaña Yeruselem ate, yak emaana ebọp anye,

anyʌñ atañ abaña tembịd ate, yak esịn mme itiad idakisọñ amọ.