1 Ke ntak Saiyọn ami ndiidoppo uyio,

ke ntak Yeruselem ami ndiitieghe sʌñ,

tutu ini aditoppo anye ke akpanikọ ayamma nte usiere,

adinyaaña amọ nte utuenikañ a-asakka.

2 Mme idịd eyaekịt utoppo ikpe mfo,

afịd mme ndidem eyaenyʌñ ekịt ubọọñ mfo;

eyaukoot fiin ufa anyịñ

i-inua Abọọñ adiinọ.

3 Afo ayaado ataa uyaiya anyanya ke ubọk Abọọñ,

anyanya ubọọñ ke ekaubọk Abasi mfo.

4 Awo iduukoodo fiin aba Se Efeghe Ekpọñ,

inyʌññọ ikoot isọñ mfo Ndoon.

Ado eyaukoot fiin Hefsiba,*

enyʌñ ekoot isọñ mfo Biula*;

sia Abọọñ ayaanem esịd ubaña fiin,

ndin eyaenọ isọñ mfo ke ndọ

5 kpa naña akparawa adọ abọikpa,

kpa ntoro ke Andubọb fiin aduudọ fiin;

kpa naña ebendọ akop inemesịd abaña anwaanndọ amọ,

kpa ntoro ke Abasi mfo adiinem esịd ubaña fiin.

6 Yeruselem, ami mmenọ mme akpeme abio eka mme ndibene mfo;

ammọ idiidoppo uyio uweemeayio me akonayio.

Ndufo e-ekoodo Abọọñ,

ikiinọọ idem ndufo nduọkadudu,

7 ikiinyʌñ inọọ anye nduọkadudu tutu anye abọp Yeruselem,

anyʌñ anam anye ado ñkpọ itooro anọ ekondo.

8 Abọọñ amaanwọñọ ke ubọk nnasia amọ

ye ke akpọsọñ ubọk amọ:

"Tutu amama ami ndiiyaaha abakpa ndufo nnọ

mme asua ndufo nte ndidia,

ñko ibaaha aba naña mbon asenidịd ediinwọñ ufa ukọd ndufo

a-ndufo ekekpaaha utom ke esịd;

9 ado mbon edọkkọ anye ediidia anye,

enyʌñ etooro Abọọñ,

mbon se inyʌñ ikoono kreb ediinwọñ ito anye

ke mme esob adisana itie mmi."

10 Isaña iboiyo, isaña iboiyo ke mme inuaatob!

Idiọñ usʌñ inọ mbon awo.

Ibọp, ibọp mme usʌñ!

Isịññe mme itiad.

Idịppe afọñidiọọñọ inọ mme idịd.

11 Abọọñ anọ uyio

tutu asịm mme utịd ederimbod:

"Bo Adiaha Saiyọn,

‘Se, Andunyaaña fiin adi!

Se, utịb amọ aba ye anye,

ñko utịb amọ asaña ye anye.’ "

12 Ediikoot ammọ Ndisana Awo,

mbon se Abọọñ afak;

eyaenyʌñ ikoot ndufo Mbon Eyemme,

Abio a-awo imiifegheke ikpọñ aba.