* 1 Sai, akpekapado afo ayaawai mme hefịn anyʌñ asọiyọ adi,

nọ mme ikpọabod ekpenyeeñe ke iso mfo!

2 Nte naña ikañ ata mme ñkọk eto,

anyʌñ anam mmọọñ afịt,

sọiyọ di dinam yak mme asua ediọọñọ anyịñ mfo,

nyʌñ nam mme idịd enyeñ ke iso mfo!

3 Sia ke ini afo akenamma mme utịppe ñkpọ a-ñnyịn imiikibekke anyen,

afo amaasọiyọ adi, ndin mme ikpọabod emaenyeeñe ke iso mfo.

4 Atọọñọ ke mme ini esed akenam awo ndomokeed ikoppo,

utọñ ndomokeed ikoppo,

anyen ndomokeed ikịtte Abasi mfen ke imiibọhọke afo,

a-anamma ñkpọ anọọ mbon e-etieghe ebet anye.

5 Afo ado unwam anọ mbon se inam eti ke idadesịd,

e-etoiyoke mme usʌñ mfo.

Ado ke ini ñnyịn ikikaaha iso inam idiọọkñkpọ ye ammọ,

afo amaayat esịd.

Die ndin ke ñnyịn ikeme adibọkkọ?

6 Afịd ñnyịn imikappa iba nte ndedeghe ibon,

ndin afịd ndinen adinam ñnyịn etie nte mbaad ntaaha afọñ;

afịd ñnyịn imaiyeeme nte mfañ,

ñko nte afịm mme idiọọkñkpọ ñnyịn ikwọọk ñnyịn eduọọk.

7 Awo ndomokeed ikoodo anyịñ mfo,

inyʌññọ idomo ukeme adumʌm fiin ñkama;

sia afo amedịp iso mfo ibaaha ñnyịn,

amenyʌñ iyaak ñnyịn anọ mme idiọọkñkpọ ñnyịn.

8 Kpayeado afo, Abọọñ, ado Ete ñnyịn.

Ñnyịn ido aduañ, afo ado abodabañ;

afịd ñnyịn ido mme utom ubọk mfo.

9 Abọọñ, kuuyat esịd ubọhọ adaña;

kuutoiyo mme idiọọkñkpọ ñnyịn ke nsi-nsi.

O! Ñnyịn imukpe fiin ubọk, ise ñnyịn,

sia afịd ñnyịn ido ikọd mfo.

10 Mme ndisana abio mfo ekappa anaan isọñ;

idem Saiyọn ado anaan isọñ, Yeruselem ñwuudo abio.

11 Adisana tembịd ubọọñ ñnyịn, a-mme ete ñnyịn ekesutooroke fiin,

efọp ke ikañ,

ndin afịd mme ñkpọuto ñnyịn ebiaña ebono ke isọñ.

12 Ke afịd ami emaeboiyo, Abọọñ, afo ayaamʌm idem mfo akama?

Afo ayaadop uyio anyʌñ imia ñnyịn ufen aboiyo adaña?