1 "Ndufo mme isu, iba ke ndobuyio ke iso mmi,

Yak mme idịd edemme adudu ammọ!

Yak ammọ ewuọ edi enyʌñ esio uyio;

yak ñnyịn isoobo keed ke itie ikpe."

2 "Anie ademme anye a-akebaaha ke edem usakkautịn,

a-akoodo anye ke adinenido asio anọ utom?

Anye ayaak mme idịd anọ anye,

anyʌñ asuuhọ mme ndidem ke iso amọ.

Anye akama akañkañ amọ anam ammọ ekappa abu,

akama utịgha amọ anam ammọ eba nte mbio se efefịm.

3 Anye abịne ammọ ndin asaña ke ifuuro, ñkpọ ndomokeed iwaaha anye

ke usʌñ u-ukod amọ imiisañake akpa.

4 Anie anam ami akewuọ utịd,

akootto mme ubon tọọñọ ke editọñọ?

Ami, Abọọñ, ye akpa ke atu ammọ

ñko ye akpatre, ami ndo anye."

5 Mme isu ekịt anye enyʌñ ekop ndịk;

mme utịd ederimbod enyeñ.

Ammọ esaña ekpere enyʌñ ewuọ edi;

6 ammọ enwam emọemọ

enyʌñ ebo nsaña ammọ, "Isọñ idem!"

7 Anamutom ukwak asọọñọ anamusọ idem,

ñko andikama ukọññkpọ nnam nọ adọnọ

asọọñọ andikọñ ukwak idem.

Awo keed atañ abaña adomutịm ate, "Anye afọñ."

Awo mfen akọñ ubobodñkpọ ke akpohoukwak mbaak anye adinyʌkkọ aduọ.

8 "Ama ado afo, Isrel, ayịnutom mmi,

Yekọb, anye ami mmekke,

ndufo ubon Ebraham ufan mmi,

9 ami ñkiben ndufo nto mme utịd ederimbod,

ikoot ndufo nto mme ataa nsan-nsan inuuk amọ.

Ami ñkebo, ‘Ndufo edo isʌñutom mmi’;

ami mmimek ndufo ñnyʌññọ isịn ndufo.

10 Ke ntoro ikiifeghe ndịk, sia ami mmọdo ye ndufo;

ikiiyak esịd itịmede ndufo, sia ami ndo Abasi ndufo.

Ami ñyaisọọñọ ndufo idem ñnyʌñ inwam ndufo;

ami ñyaibenne ndufo ye adinen ubọk nnasia mmi.

11 "Ke akpanikọ afịd mbon se itọhọ ye afo

eyaekop abuud enyʌñ ebọ asuenne;

mbon se ubiọọñọ fiin

ediiba nte ukpọk ñkpọ enyʌñ etak.

12 Akpesʌkado afo ayemme mme asua mfo,

afo uduukịtte ammọ.

Mbon e-enwanake ekọñ ye afo

idiiwuọñọke baaba ñkpọ ndomokeed.

13 Sia ami ndo Abọọñ Abasi ndufo

a-amʌmmọ ubọk nnasia ndufo,

anyʌñ ibo ndufo, ikiinyeñ idem;

ami ñyainwam ndufo.

14 Ikiifeghe ndịk, ndufo utʌñ Yekọb,

etək Isrel, ikiifeghe ndịk,

sia ami ke idem mmi ñyainyaaña ndufo," Abọọñ atañ,

Andifak ndufo, Adisana Abasi Isrel.

15 "Se, ami ñyaanam ndufo eba nte ekamba akpeti ubeek abakpa,

ñyaanam afo ado ufa anyʌñ asọp, ye uwak eded.

Ndufo eyaesat mme ikpọabod enyʌñ ekọk ammọ,

enyʌñ enam mme ntək abod ekappa edo mbio.

16 Ndufo eyaekeñ ammọ, afịm ayaaben ammọ asio,

ndin akpọsọñ ayobio ayaafịm ammọ aduọọk.

Ado ndufo eyaedaara ke Abọọñ

enyʌñ ebọ ubọọñ eto Adisana Abasi Isrel.

17 "Mme uweene ye mbon unana eyem mmọọñ,

ado ibaaha;

edeme ammọ asat ke ntak nsaditọñ.

Ado ami Abọọñ ñyaabọọrọ ammọ;

Ami, Abasi Isrel, ndiikpọññọ ammọ.

18 Ami ñyaanam mme inyañ esakka ke mme ñkoñ-ñkoñ mbiara itie,

mme idịm ñko eyaeto abedeñ esakka.

Ami ñyaanam akpautatan akappa mme ñkpọdiọhọ mmọọñ,

nsaad isọñ ayaakappa ufeghe mmọọñ.

19 Ami ñyaatọ ke akpautatan

eto sida ye eto akasia, eto meetel ye eto ọlif.

Ami ñyaanam mme yunipa etịppe ke mbiadaisọñ,

ñyaanam fir ye saipres ekọt itie keed,

20 nọ mme awo ekịt enyʌñ ediọọñọ,

ekere ebaña enyʌñ ebọ ifiọk,

ke ubọk Abọọñ anam ami,

Adisana Abasi Isrel abot anye.

21 "Iben ebeeñe ndufo idi,"

Abọọñ atañ.

"Iben mme ikọ mfaaña ndufo idi,"

Adidem Yekọb atañ.

22 "Itañ inọ ñnyịn, ndufo mme ubobod abasi,

se idiitịppe.

Itañ idọkkọ ñnyịn se mme ñkaan ñkpọ ekedo,

yak ñnyịn itịm ise ammọ

inyʌñ idiọọñọ utịd ammọ.

Imiidooho itañ mme ñkpọ se idiidi ke iso inọ ñnyịn,

23 itañ inọ ñnyịn se idiitịppe ke ini iso,

yak ñnyịn idiọọñọ ke ndufo edo mme abasi.

Inam ñkpọ, me ado eti me ado idiọọk,

yak ñnyịn idịkke inyʌñ iyọhọ ye ndịk.

24 Ado ndufo emesịp ekan ikpu-ikpu ñkpọ,

mme utom ndufo ñko iwuọñọke ñkpọ ndomokeed;

awo ndomokeed se imek ndufo ado mbubiam.

25 "Ami mmedemme udọñ awo keed ke adoro, ndin anye adi,

awo a-atooho usakka utịn a-akoodo anyịñ mmi.

Anye atịm mme mbọọñ nte ammọ edo udʌñ,

nte anye ado abodabañ a-asọnnọke aduañ anam se ama.

26 Anie aketañ ami tọọñọ ke ntọọñọ, yak ñnyịn idiọọñọ,

me aketañ anịm, nọ ñnyịn ikpibo, ‘Anye amaanen’?

Ibaaha awo se ikitañ ikọ ami,

ibaaha awo se ikibem iso itañ inọọ ñnyịn,

awo ndomokeed ikikoppo mme ikọ uto fiin.

27 Ami ñkedo akpa awo adidọkkọ Saiyọn mbo, ‘Se, se ammọ mi!’

Ami mmaanọ Yeruselem isʌñutom a-akamake eti etob.

28 Ami nse ado ñkịtte awo ndomokeed,

ndomokeed ibaaha ke atu mme abasi se inọ item,

ndomokeed ibaaha adinọ ibọọrọ ke ini ami mbịppe ammọ.

29 Se, afịd ammọ edo abiaña!

Mme ubọkutom ammọ edo ukpọk;

mme ubobodñkpọ ammọ edo afịm ye ndutịme.