1 Ke ini ado Hesikaiya amaadọñọ akpere ñkpa. Prọfed Aisaiya ayịn Emọs amaakaa abịne anye anyʌñ akebo, "Se Abọọñ atañ ado ami: Tịm ufọk mfo nịm, sia afo ayaakpa; uduukoppo nsọñidem."

2 Hesikaiya amaawọññọ iso ase ndibene anyʌñ abọñ akam anọ Abọọñ, 3 "Abọọñ toiyo naña ami nsisaña ke iso mfo ke akpanikọ ye ke afịd esịd mmi ñnyʌñ nnam se inen ke iso mfo." Ndin Hesikaiya amaatua ataa idod-idod ayịd.

4 Akem uyio Abọọñ amaadisịm Aisaiya: 5 "Kaa kedọkkọ Hesikaiya, ‘se Abọọñ, Abasi ete mfo Defid atañ ado ami: Ami mmekop akam mfo mmenyʌñ ñkịt mmọọñayịd mfo; ami ñyaadian isua duob mme ition ke isua uwem mfo. 6 Ami ñko ñyaufak fiin ye abio ami nsio ke ubọk adidem Asiria. Ami ñyaakpeme abio ami.

7 " ‘Idiọọñọ Abọọñ ado ami adinam yak afo adiọọñọ ke Abọọñ ayaanam se anye akenwọñọ ami. 8 Ami ñyaanam ndukpọñ ake utịn anọọhọ atịmme edem ikpad duob naña anye akesaña asọiyọ ntondọọk usʌñufọk Ahas.’ " Kpa ntoro unwana utịn amaatịmme edem ikpad duob naña anye akesaña asọiyọ.

9 Ñwed ake Hesikaiya adidem Yuda akewette ke ini udọñọ amọ amaakekweeñe nọ anye akop nsọñidem ado ami:

10 Ami mmaabo, "Ke mbakka iba isua uwem mmi

nte ana ami mboiyo ke inuaatob ñkpa

yak embọ miin mme isua mmi se isʌhọ?"

11 Ami mmaabo, "Ami ndiitịmmeke ñkịt Abọọñ ke idem amọ aba

ke isọñ mme aduuwem;

ami ndiimaanake nse awo nte ami aba,

me adiba ye mbon e-edʌññọ ke ederimbod idahami.

12 Nte atayad akpemeedọñ, ewuut ufọk mmi

enyʌñ embọ ufọk mmi.

Nte adọk afọñ ami mmenwịn uwem mmi,

ndin anye añkpịkke miin asio ke ñkpọ utuak afọñ;

uweemeayio ye akonayio afo amaanam utịd mmi adisịm.

13 Ami mmaabet ke ime tutu usiere,

ado nte ekpe anye amaabuuñ afịd mme akpọ mmi;

uweemeayio ye akonayio afo amaanam utịd mmi adisịm.

14 Ami mmaatua nte akadañabasi me akpantaña,

Ami mmaamịm nte uyio ibiom a-afʌhọke.

Anyen mmi amaamem naña ami ñkeseeghe mme hefịn.

Nnananyen ansịm miin; Abọọñ, disịn unwam nnọ!"

15 Ado nsoo ke ami ñkeme aditañ?

Anye atañ ikọ ye ami, anye ke idem amọ anyʌñ anam ami.

Ami ñyaasaña ke nsuukidem ke afịd ayio uwem mmi

ke ntak ndutʌhọ ukpọñ mmi ami.

16 Abọọñ, ke mme ñkpọ ntom mme awo edu uwem;

sịbidịd mmi ñko anyʌñ akịt uwem ke mme ñkpọ ami ñko.

Afo amaatịmme annọ miin nsọñidem,

anyʌñ anam ami ndu uwem.

17 Ke akpanikọ akedo ke ufọn mmi

ami adiyọ utọ ndutʌhọ ado.

Ke ima mfo afo amansio miin

ke ube nsobo;

afịd idiọọkñkpọ mmi afo ameduọk ammọ

ke edem mfo.

18 Sia udi ikemeke adutooro fiin,

ñkpa ikemeke adikwọ itooro mfo;

mbon e-edʌñọke ke udi

ikemeke inie idodanyen ke mfọn mfo.

19 Mme aduuwem, mme aduuwem, ammọ utooro fiin,

naña ami nnam mfịn ami;

mme anie nditọ edọkkọ nditọ ammọ

ebaña mfọn mfo.

20 Abọọñ ayañnyaaña miin,

ndin ñnyịn iyaikwọ ikwọ ke mme ndido udʌk

ke afịd ayio uwem ñnyịn

ke tembịd Abọọñ.

21 Aisaiya amaabo, "Inuakka mmeme mfañ fik idian ke ndufuud ado, ndin anye ayaakop nsọñidem."

22 Hesikaiya amaabịp, "Nsoo idiido idiọọñọ ke ami ñyaadọọk ñka ke tembịd Abọọñ?"