1 Se, adidem ayaakara ke adinenido

mme mbọọñ ñko eyaekaara ke unen.

2 Ammọ keedekeed ediiba nte itie ukpeme mbaak afịm

ye itie a-awo adịbeke abọkkọ ayobio,

nte udịm mmọọñ ke akpautatan

ye ndukpọñ ekamba itiad ke isọñ nsaditọñ.

3 Ndin anyen mbon se ikịt anye idiikʌbọke aba,

ndin utọñ mbon ekoppo eyaekpañ utọñ.

4 Esịd ndịk ayaadiọọñọ anyʌñ abọ ifiọk,

edeme ekek ñko ayaanekke atañ ikọ anye adọnọ.

5 Awo idiibenne ndisịme aba ikoot awo eti iwuod,

awo idiinyʌññọ iben awo ndutịme ikoot awo ukpono.

6 Sia mme ntʌn etañ ikọ ndisịme-ndisịme,

esịd ammọ asʌk akere adinam idiọọk:

Ammọ ekpeep idiọọk ido,

enyʌñ esuan se imiidooho akpanikọ ebaña Abọọñ;

mbon abiọọñ ammọ eyaak idịb ukpọk,

mbon nsaditọñ ammọ esịn adinọ mmọọñ.

7 Mbon ndutịme ekama ibak-ibak usʌñ,

ammọ ekama ñkara usʌñ

ye nsu esobo mme uweene,

akpesʌkado aseeme mbon unana anenne.

8 Ado awo eti iwuod anam nti akikere,

ammọ enyʌñ eda enọ nti akikere.

9 Ndufo ibaan unana akikere,

idakka ida inyʌñ ikpañ utọñ innọ miin;

ndufo nditọ ibaan e-ekereke ke eba ke ifuuro,

ikop se ami ñyem aditañ!

10 Ke etək-etək ini akanna isua keed

ndufo e-ebaaha ke ifuuro eyaekop ñnyeñidem;

idọk kreb ayaakpu

ñko idọk mfịd idiibaaha.

11 Inyeñ idem, ndufo ibaan e-ebaaha ke ndueidem;

yak ndịk inam ndufo, nditọ ibaan e-ekereke ke iba ke ifuuro!

Isịññe mme mfọọn afọñ ndufo

inyʌñ ikama ntaha afọñ ifʌk idem ndufo.

12 Imia eba ndufo ibaña nti inwañ,

ye mbunwịm fain,

13 amaado isọñ ikọd mmi,

isọñ i-ikpọ ñkukịm ye mbaraekpe efʌkkọ;

ke akpanikọ, itua ibaña afịd mme ufọk idaara

ye abio mbre ami.

14 Eyaefeeñe ekpọñ akpọsọñ abio,

abio akpọsọñ uyom ayaanaa ukpọk;

ikpọ ufọk ye anyọñukpeme eyaekappa edo mbiadaisọñ ke nsi-nsi,

ñkpọ idaara mme dọñki, itie uta mbid mme udịmedọñ,

15 tutu enwañña Sịbidịd eto anyọñ iduọk ñnyịn,

akpautatan akappa ado eti isọñ,

eti isọñ ñko anyʌñ atie nte akai.

16 Unenikpe Abọọñ ayaadʌñ ke akpautatan,

adinenido amọ ayaanyʌñ adʌñ ke eti isọñ.

17 Mfịd utom adinenido ado adiido emem;

utịb amọ adiido ifuuro ye unanandịk ke nsi-nsi.

18 Ikọd mmi eyaedʌñ ke mme ufọk emem,

ke mme ifuuro ufọk,

ke mme itie nduọkadudu amfịna imiibaaha.

19 Akpesʌkado akpọsọñ edịmitiad anịmme akai anaan,

abio ñko anyʌñ anaa ukpọk afịd-afịd,

20 die ke ndufo ediibọ adidiọñ,

ke aditọ mfịd ke afịd mben idịm,

adinyʌñ nsaana mme enañ ye dọñki ndufo ñyaak esaña naña emama.