1 Prọfesi a-abañake Tai:

Itua, ndufo nsʌñikañ Taasis!

Sia esobo Tai,

ammọ inieghe ufọk me udua mben mmọọñ aba.

Tọọñọ ke isọñ Saiprọs

ikọ ato akesịm ammọ.

2 Iba ke ndobuyio, ndufo mbon e-ebaaha ke isọñ ñkanñkʌk mmọọñ

ye ndufo ikpọ mme anyamudua ke Sidọn,

a-mme awadinyañ enamma nọ eforo.

3 Ke mme ikpọ mmọọñ

ñkwa abakpa Sihọ ato awuọ adi;

idọk ke Nail akedo usʌñ ukọ akʌk ke Tai,

anye amaakappa ekamba itieudua anọ mme idịd.

4 Yak abuud umʌm fiin, Sidọn, ye afo akpọsọñ itie akpainyañ,

sia akpainyañ a-atañ:

"Akenam uman intuakka miin, ami ñko ñnyʌññọ mman ayịn;

akenam ami mbọọhọ nditọ ideen ake nseeghe ñkpọ mbaña nditọ ibaan."

5 Ikọ amaadiwuọ Iyib,

ammọ ediiba ke ntaeded akeene etob se ito Tai idi.

6 Iwọññọ ikaa Taasis;

ita eded, ndufo mbon isọñ ñkanñkʌk mmọọñ.

7 Nte abio mbre ndufo ado ami,

akaan, akaan abio,

a-ñkpad amọ abenne anye

akenịm ke ataa anyan-anyan idʌñ?

8 Anie awo akenam uduak ami abaña Tai,

andinọ mme anyanya,

a-mme anyamudua amọ edooho mme nditọ mbọọñ,

a-mme anyamudua amọ ewuọhọ etob ke ekondo?

9 Abọọñ Andikponñkan akeduak ami,

adisuuhọ ntañidem amọ ye afịd mmọnyọ amọ,

adinyʌñ nsuuhọ afịd mme awuọ etob awo ke ekondo.

10 Kịm isọñ mfo kpa naña ammọ enam ke mben akpainyañ Nail,

Afo Ayịn Awonwaan Taasis,

sia afo unieghe itie mbeghe aba.

11 Abọọñ anyan ubọk amọ awọt akpainyañ,

anyʌñ anam mme abioubọọñ amọ enyeeñe.

Anye anọ ewʌhọ abaña Fonisia

ate yak esobo ñkpọsọñ itie ke abio amọ.

12 Anye ate, "Yak mbre mfo atre

idahami, Mboppo Adiaha Sidọn e-esọnnọke!

"Dakka ke anyọñ, kaaña kaa Saiprọs;

kpa ke ukañ udo uduukịtte emem."

13 Se isọñ mbon Babilọn,

mbon a-awo imiibatta aba ke ñkpọ!

Mbon Asiria enam anye akappa

itie nnaa anọ ndiọi unam akpautatan;

ammọ ebọp mme ikpọ anyọñukpeme ammọ,

ammọ ewuut ñkpọsọñ itie ammọ ebono,

enyʌñ enam ammọ ekappa ataha.

14 Itua, ndufo nsʌñikañ Taasis!

Sia esobo akpọsọñ itie ndufo!

15 Ke ini ado eyaefre Tai ke isua ata mme duob, ukem nte isua uwem adidem. Ado ke utịd isua ata mme duob ami, ñkpọ ayaatịppe anọ Tai nọ asaña akekem ye ikọ ikwọ akpara:

16 "Ben ekpa, saña kanna abio,

afo akpara emaekefre anyen;

tịm bre ekpa ado, kwọ uwak ikwọ,

yak ekama ado utoiyo fiin."

17 Ke utịd isua ata mme duob ami, Abọọñ ayaasuuk anyen ase Tai atʌnọ anye. Anye ayaamaana atịmme akenam akpara amọ, adia ekamba udod, anyʌñ akama idem amọ anyam udua ke afịd mme abioubọọñ ke ekondo. 18 Ado eyaeben udod ye akʌk se anye abọ enịm asaña-asaña enọ Abọọñ; awo idiidọññọ anye ke ufọk, idiinyʌññọ ikoono ibon inịm inọ anye. Eyaenọ mbon e-edʌññọ ye Abọọñ udod amọ, nọ ekama edep akpọmiọk ndidia ye mfọọn afọñ.