1 "Kwọ, afo ada,

afo a-adooho kpaanam umanna ayịn;

bịmme sio kwọ, sio ñkpo idaara,

afo a-adooho akenam ubiak uman ituuhọ;

sia nditọ ikpọọñ awonwaan e-ewak

ekan nditọ anye a-adọọhọ ebe,"

Abọọñ atañ.

2 "Nam itie atayad mfo akpon,

tat mme afọñ ikpeghe atayad mfo nọ aka anyan,

Kuumʌm ukama;

dʌt udʌk mfo nọ anyọọñ,

sọọñọ mme mboi mfo.

3 Sia afo ayaatara aka nnasia ye ufiin;

mbon ubon mfo eyaebọ mme idịd mfen itie,

enyʌñ edʌñ ke mme ñwuudo abio ammọ.

4 "Kuufeghe ndịk; sia abuud iduunamma fiin.

Kuufeghe asuenne; awo iduusuenneke fiin.

Afo ayaafre asuenne uyịn mfo,

uduunyʌññọ utoiyo aba idiọọk itie ebekpa mfo.

5 Sia Andubod fiin ado ebe mfo,

Abọọñ Andikponñkan ado anyịñ amọ,

Adisana Abasi Isrel ado andufak fiin;

ekoot anye Abasi afịd ederimbod.

6 Abọọñ ayaamaana ukoot fiin adat

nte afo akedo anwaan ekesịnne, anyʌñ anie mbʌññọesịd ke sịbidịd;

anwaan akedọọhọ ndọ ke uyịn,

ado edisịn anye," Abasi mfo atañ.

7 "Ke etək ini ami mmaukpọñ fiin,

ado ke akpọsọñ mbọm ñyaamaana uben fiin ntịmme ndi.

8 Ke adiwad iyadesịd

ami mmaudịp fiin iso mmi ke etək ini,

ado ke nsi-nsi mfọnido

ami ñyaakop mbọm ubaña fiin,"

Abọọñ Andufak fiin atañ.

9 "Anye ami aba nte ayio Nua annọ miin,

a-ami ñkenwọñọke ke mmọọñ Nua idiimaanake ifʌk ederimbod aba.

Ke ntoro idahami, ami mmenwọñọ ke ndiiyatta esịd aba ye afo,

ndiinyʌññọ nsua unọ fiin aba.

10 Akpesʌkado mme ikpọabod enyeeñeke,

enyʌñ ewʌkkọ mme ntəkabod,

ado nsi-nsi ima a-ami nnieghe unọọ fiin idiinyeeñeke,

edioomo emem mmi idiinyʌññọ isịkke,"

Abọọñ, a-anieghe mbọm ubaña fiin, atañ.

11 "Abio ukuud, a-ayobio atọọhọ, i-imiinyʌññọ ikop ndọñesịd,

ami ñyaamaana ñkama nsọñudua itiad ubọp fiin,

itiad idakisọñ mfo adiido lapis lasuli.

12 Ami ñyaakama rubi mbọp ndibene ñkanñkʌk ikpọ ufọk mfo,

ñnyʌñ mbọp mme inuaatob mfo ke nsem-nsem nsọñudua itiad,

ye afịd ndibene mfo ke nsọñudua itiad.

13 Abọọñ adiido andikpeeb afịd nditọ mfo,

ndin emem ammọ ayaakpon.

14 Adinenido aduunam fiin asọọñọ ada:

Ukaraufiik ayaakaa anyan usʌñ ukpọñ fiin;

afo uduunieghe ntak adifeghe ndịk.

Eyaesio akpọsọñ ndịk ukpọñ fiin;

anye iduukpereke fiin.

15 Awo ndomokeed akpedi ekọñ ye afo, idiidooho ami nnam;

awo akeedodo se idi ekọñ ye afo ayaasuuk iwuod anọ edikan mfo.

16 "Se, ado ami ñkebot adomutịm

a-afịmme ukañ tutu anye abịppe asak,

anyʌñ nnam ñkpọekọñ a-adotto ye ubọkutom amọ.

Ado ami ñko ñkebot andibiad nọ anam ubi;

17 ñkpọekọñ ndomokeed e-edommo adikama ubiat fiin idiikịtte unen,

afo ñko ayaasua anọ afịd edeme u-udianna fiin ikọ.

Ami ado udeeme nditọufọk Abọọñ,

ndin ami anyʌñ ado se itoppo ammọ ikpe ke iso mmi,"

Abọọñ atañ.