1 Se Abọọñ atañ ado ami:

"Tịm unenikpe kama

nyʌñ nam se ifọn,

sia adinyaaña mmi akpere,

ndin adinenido mmi ayaasọp ayaara.

2 Afọfọn anọ awo a-anamma ami,

awo a-anekkeke amʌm anye akama,

a-anekkeke anịm Sabad, inyʌññọ isappa anye,

anyʌñ asiooño ubọk akpọñ adinam idiọọk."

3 Ke adidʌñ ndomokeed a-adianna idem ye Abọọñ abo,

"Ke akpanikọ Abọọñ ayansio miin ke atu ikọd amọ afep."

Ndin ke itọ ndomokeed abo,

"Ami ndo sʌk nsaad eto."

4 Sia se Abọọñ atañ ado ami:

"Amaado mme itọ e-enịmme mme Sabad mmi,

e-emekke se innem miin esịd,

enyʌñ esọọñọ emʌm edioomo mmi ekama,

5 ke esịd tembịd mmi ye mme ndibene amọ, ami ñyaanọ ammọ

ñkpọ aditoiyo ye anyịñ

a-afọnnọ akan nditọ ideen ye ibaan;

ami ñyaanọ ammọ nsi-nsi anyịñ

a-adiiba ke nsi-nsi.

6 Ye mme adidʌñ e-edianna idem ye Abọọñ

ke adinam ñkpọ nnọ anye,

adima anyịñ Abọọñ,

ñnyʌñ ndo nditọufọk amọ,

afịd mbon e-enịmme Sabad inyʌññọ isappa anye,

e-enyʌññọ esọọñọ emʌm edioomo mmi ekama;

7 mbon ami ke ami ndiidat ñka ke adisana ekamba abod mmi,

ñnyʌñ nnọ ammọ inemesịd ke ufọk ubọñ akam mmi.

Ñyaabọ mme ufọfọb uwa ye mme uwa enọ ammọ

ke akpokoro uwa mmi;

sia eyaekoot ufọk mmi

ufọk ubọñ akam afịd mme idịd."

8 Abọọñ Andikara abo,

anye a-atañña nditọ Isrel e-ekekoonoke esio atịme adi:

"Ami ñyaanyʌñ ñkoono mbon mfen nnịm nnọ ammọ

ke amaaboiyo mbon e-emaeketatañ edi."

9 Idi, afịd ndufo mme unam ke inwañ,

idi inyʌñ idita, afịd ndufo mme unam ke akai!

10 Mbon ekpemeke Isrel edo nnan,

afịd ammọ enana ifiọk,

afịd ammọ edo idob ewa,

ammọ ikanna ikpọi;

ammọ esuuk enaa enyʌñ edappa ndab,

ammọ ema adidaiya idab.

11 Ammọ edo mme ewa e-enieghe akpọsọñ udọñ adidia ndidia;

kpaanam ammọ ikoppo uyʌkkọ.

Ammọ edo mme akpemeedọñ i-imiinieghe ikike,

afịd ammọ ewọññọ ekeene usʌñ ammọ,

ammọ eyem ufọn idem ammọ.

12 Ammọ keedekeed ebo, "Idi, yak ami mben ukọd ndi!

Yak ñnyịn inwọñ bie tutu ikop uyʌkkọ!

Ndin ñkpọñ adiiba nte mfịn,

imiidooho anye anenekke afọn akan."