1 Ke usen ado,

Abọọñ ayaamia ufen ye akañkañ amọ,

anie ndịk, ekamba ye akop adudu akañkañ amọ;

idiọọk unam mmọọñ ñwọwọññọ udʌkikọd,

idiọọk unam mmọọñ ñwawañña udʌkikọd;

anye ayaawot aniendịk unam ke esịd akpainyañ.

2 Ke usen ado;

"Kwọ baña anwịm mfịd inwañ fain:

3 Ami, Abọọñ, nse anye anyen;

ami nduọk anye mmọọñ afịd ini.

Ami ñkpeme anye uweemeayio ye akonayio

mbaak awo ndomokeed adinam anye idiọọk.

4 Ami ñyatta esịd.

Akpekapado mbaraekpe ye ñkukịm emaeba se imbiọñọ miin!

Ami ñkpaasaña mbịne ammọ ke ekọñ;

ami ñkpaafọp afịd ammọ ke ikañ.

5 Imiidooho ntoro yak ammọ edi embịne miin nte itie udịbe;

yak ammọ enam emem ye ami,

ii, yak ammọ enam emem ye ami."

6 Ke mme usen ediighe ke iso Yekọb ayaadọñ adʌñ ke isọñ,

Isrel ayaatịppe anyʌñ akọt

anyʌñ ayọhọ afịd ederimbod ye mfịd amọ.

7 Nte Abọọñ amaamia anye

ukem naña anye akemia mbon se ikimia anye?

Ado nte ewot anye

ukem naña ekewot mbon se ikiwot anye?

8 Ke anwan ye ntañnsio afo amaamʌm anye;

ye akpọsọñ iyadesịd amọ, anye amaabịn anye asio atop aduọọk,

nte ke usen afịm ayobio edem usakkautịn afịmeke.

9 Ke ntom, ndin, ke ediifeen idiọọkñkpọ Yekọb,

ndin ami adiido ayọhọ mfịd adikama nsọọk idiọọkñkpọ amọ mfep:

Ke ini anye amaanam afịd mme itiad akpokoro uwa

eba nte akañ ekọkkọ ñkeñe-ñkeñe,

mme abai Asera ndomokeed me insensi mme akpokoro uwa

idiisọọñọke ida.

10 Akpọsọñ abio ana ukpọk,

idʌñ ekefeeñeke ekpọñ, esịn nte anaan;

do mme enañ eta mbid,

do ammọ enaa;

ammọ ekwat ñkọk amọ enịm ukpọk.

11 Mme ñkọk amọ emaesat, ebuuñ ammọ esio,

ndin ibaan edikoono ammọ ekama ebara ikañ.

Sia mbon ami edo mbon i-imiinieghe ifiọk;

ke ntoro Andibod ammọ inieghe mbọm ibaña ammọ,

Andibod ammọ ñko iwọttọ ammọ mfọn.

12 Ke usen ado Abọọñ ayaasara ñkpọ tọọñọ ke ufeghe mmọọñ Yufretis tutu asịm Inyañ Wadi ke Iyib, ndin afo, Isrel, eyautañ fiin keedekeed ebok. 13 Ke usen ado ñko eyaefịt ekamba adukpoñ. Mbon ekekpaññake ke Asiria ye mbon ntañnsio ke Iyib eyaedikpono Abọọñ ke adisana ekamba abod Yeruselem.