1 "Anye ami ado ayịnufọk mmi, a-ami mmʌmmọ ñkama,

adimek awo mmi a-annemme miin esịd;

Ami ñyaadot anye Sịbidịd mmi ke idem,

ndin anye ayaaben unen asọk mme idịd.

2 Anye idiibọññọ ñkpo, idiinyʌññọ itua ayịd,

idiinyʌññọ idịppe uyio amọ ke mme efaak.

3 Anye idiibuuño mbiaña akpọ ñnyanyaha,

idiinyʌññọ inịme aduek ifiaikañ.

Ke akpanikọ anye ayaakpe ikpe amọ ke unen;

4 esịd idiiduọhọ anye, idem idiinyʌññọ imem anye

tutu anye awuuk unen ke ederimbod.

Ke ukpeebñkpọ amọ ke mbon isuọ ediinie idodanyen."

5 Se Abasi a-adooho Abọọñ atañ ado ami,

Andibod mme hefịn, a-anyʌññọ atat ammọ asuan,

anye a-adetteke ederimbod ye afịd se ikọt ke esịd amọ,

andinọ ikọd amọ ibifịk,

anyʌñ anọ mbon se isaña ke esịd uwem:

6 "Ami, Abọọñ, mmiikoot ndufo ke adinenido;

ami ñyaimʌm ndufo ubọk.

Ami ñyainịm ndufo ñnyʌñ nnam ndufo

edo edioomo enọ ubon awo,

enyʌñ edo unwana enọ mme Gentile,

7 etat anyen se ido nnan,

ekpọk mbon ñkpakọb eyaak,

enyʌñ etat mbon se isịne ke ufọk ñkpakọb ke ekịm eyaak.

8 "Ami ndo Abọọñ; anyịñ mmi ado ado!

Ami ndiiyaaha ubọọñ mmi nnọ awo mfen,

ndiinyʌññọ ñyaak itooro mmi nnọ mme abasi ubọkawo.

9 Se, ñkaan ñkpọ edat itie,

mme ufa ñkpọ edo se ntañ anwa-anwa;

mbemiso ammọ ewuọ esu,

ami mmenam ndufo ediọọñọ."

10 Ikwọ ufa ikwọ inọ Abọọñ,

ikwọ itooro amọ tutu asịm utịd ederimbod,

afo a-adʌkkọ akpainyañ, ye afịd se idọñọ ke esịd,

ndufo mme isu ye afịd mbon se idʌñ ke esịd.

11 Yak anaan ye mme abio amọ ebenne uyio ammọ;

yak mme itieidʌñ ake Keda adʌññọ edaara.

Yak mbon Sela ekwọ ye inemesịd;

yak ammọ esio ñkpo ke mme anyọñ ikpọabod.

12 Yak ammọ enọ Abọọñ ubọọñ,

enyʌñ edịppe itooro amọ ke mme isu.

13 Abọọñ ayaawuọ adi nte andikan,

nte awo ekọñ anye ayaadịppe akpọsọñ udọñ amọ;

anye ayaadịppe uyio ekọñ, ye ñkpo,

ayaanyʌñ akan mme asua amọ.

14 "Ke ataa anyan ini ami mmedop uyio,

ami mmeba ke ndobuyio ñnyʌñ mmʌm idem mmi ñkama.

Ado idahami, nte awonwaan ayemme iman ayịn,

ami mmetua, inweek amben, esịd ñko ayem iñkịppe.

15 Ami ñyaasobo mme ikpọabod ye mme ntəkabod,

ñnyʌñ nnam ñkpọ esaat ke afịd inwañ ammọ;

ami ñyaanam mme inyañ eforo mme isu,

ñnyʌñ nnam mme ñkpọdiọhọ mmọọñ esat.

16 Ami ñyaadat mme nnan usʌñ nsaña ke mme itie a-ammọ imiidiọọñọke,

ke mme usʌñ i-imiimegheke ammọ ami ñyaakpeme ammọ;

ami ñyaanam ekịm akappa unwana anọ ammọ

ñnyʌñ nnam mme mfraha itie edọnọ.

Mme ñkpọ ami edo se ami ndiinam;

ami ndiisịnne ammọ.

17 Ado amaado mbon se ibuọt idem ke usọsọi ñkpọ,

mbon se ibo mme ubobodñkpọ, ‘Ndufo edo mme abasi ñnyịn,’

eyaetịmme edem enyọñ ye ekamba abuud.

18 "Ikop, ndufo mme inan;

ise, ndufo mme nnan, inyʌñ ikịt usʌñ!

19 Anie ado nnan ke amaaboiyo ayịnufọk mmi,

ye inan nte isʌñutom a-ami ndọññọ?

Anie ado nnan nte anye a-abaaha ke edioomo ye ami,

nnan nte ayịnufọk Abọọñ?

20 Ndufo emekịt uwak ñkpọ, ado ikpañña utọñ;

utọñ ndufo enaa inwañ, ado ndufo ikoppo."

21 Anem Abọọñ esịd

ke ntak adinenido amọ

adinam mbed amọ akpon anyʌñ anie ubọọñ.

22 Ado mbon ami edo mbon se emaekewo ye mbon ekebịmeke mbịme,

etap afịd ammọ edọñ ke ube

imiidooho edịp ammọ ke ufọk ñkpakọb.

Ammọ ekappa mbon se emaekewo,

awo ibaaha adinyaaña ammọ;

enam ammọ ekappa mbịme,

ibaaha awo se ibo, "Nam ammọ etịmme enyọñ."

23 Anie ke atu ndufo adiikpañ utọñ ikop,

me adinọ ñkpañutọñ ke ini amaadi?

24 Anie akesaana Yekọb anọ yak ado ñkpọ mbịme,

ye Isrel ñko yak ado ñkpọ ñwo?

Nte ikidooho Abọọñ,

a-ndufo edueghe ato idiọọkñkpọ?

Sia ammọ inyịmmeke ikeene usʌñ amọ;

ammọ ikikponoke mbed amọ.

25 Ke ntoro anye amaaduọk ikañ iyadesịd afʌk ammọ,

afai ekọñ.

Anye afʌk ammọ ke edemeikañ, kpayeado ikinwañake ammọ;

anye amaata ammọ, ado ammọ ibenne isịn ke esịd.