1 Bel anyuuk iwuod, Nebo asọiyọ ke ndaha amọ;

mme unam mbiomo ebiom mme ubobodñkpọ ammọ.

Mme ubobodñkpọ se ebiom ekanna edodoppo,

ado ekamba mbiomo anọ mbon e-ekpaaha mba.

2 Ammọ esuuk eda enyʌñ enyuuk iwuod itie keed;

ikanna ibiommo mbiomo ado,

ammọ ke idem ammọ edʌk ifʌn.

3 "Ikpañ utọñ innọ miin, ndufo nditọ Yekọb,

afịd nsʌhọ ubon Isrel,

ndufo mbon a-ami ñkemʌmmọ ñkama tọọñọ ke ini uman ndufo,

ñnyʌñ ñkama tọọñọ ke ini ndufo ekemanake.

4 Tutu ini usọñ ye ke iwuod iwad ndufo

ami ndo anye, ami ndo anye a-adiimʌm ndufo ikama.

Ami ñkibot ndufo, ami ñyaanyʌñ ikama ndufo;

ami ñyaikama ndufo, ami ñyaanyʌñ ifak ndufo.

5 "Ndufo edindat miin idomo ye anie, ediinyʌñ imbat miin ukem-ukem ye anie?

Anie ke ndufo ediiben idomo ye ami yak ese me ñnyịn ido ukem?

6 Usʌk enwañña kold eto ekpad ammọ,

enyʌñ edomo silfa ke udomoñkpọ;

ammọ ekpe anamusọ kold ete adikama abot abasi,

ammọ enyʌñ enyuuk iwuod ekpono anye.

7 Ammọ edịppe anye edot ke afara enyʌñ ebiom anye;

ammọ edịppe anye edot ke itie amọ, anye anyʌñ ada do.

Ke itie ado anye ikanna idakka.

Akọm awo atua anọ anye, anye ikanna ibọọrọ;

anye ikanna inyaaña ammọ isio ke mfịna ammọ.

8 "Itoiyo ami, isịn anye ke esịd,

itịm inịm anye ke akikere, ndufo mbon nsọñiwuod.

9 Itoiyo mme ñkaan ñkpọ, mme ñkpọ anyan ini koo;

ami ndo Abasi, ndin mfen ibaaha;

ami ndo Abasi, ndin mfen ibaaha nte ami.

10 Ami nnam ediọọñọ utịd eto ntọọñọ,

tọọñọ ke ini esed, se idiidi ke iso.

Ami mbo, ‘Uduak mmi ayaada,

ami ñko ñyaanam afịd se innem miin esịd.’

11 Ami mmekoot inuen afai nto edem usakkautịn;

nto anyan idịd, awodeen a-adiinam uduak mmi asu.

Se ami ntañ, kpa ado ke ami ndiinam yak asu;

se ami nduak, kpa ado ke ndiinam.

12 Ikpañ utọñ innọ miin, ndufo mbon isọñesịd,

ndufo e-edaaha anyan usʌñ ekpọñ adinenido mmi.

13 Ami nsʌk mben adinenido mmi ñkpere,

anye inyọọñọ usʌñ aba;

adinyaaña mmi idiikpeeneke aba.

Ami ñyaanyaaña Saiyọn,

ñnyʌñ nnọ Isrel mmọnyọ mmi.