1 "Idi, afịd ndufo se itọñ asat,

idi ke mme mmọọñ;

ye ndufo i-imiinieghe akʌk,

idi, idep inyʌñ idia!

Idi, idep ukọd ye mmọọñeba,

idooho ke akʌk inyʌññọ ido ke ekọmudua.

2 Nsoo inam ndufo ebiat akʌk ke se imiidooho ndidia,

enyʌñ enam utom enọ se uyʌkkọ imiibaaha?

Ikpañ utọñ, ikpañ utọñ innọ miin, inyʌñ idia se ifọn,

afo ayaanem esịd abaña nti inie mfo.

3 Innọ miin utọñ inyʌñ idi imbịne miin;

ikpañ utọñ, nọ ndufo edu uwem.

Ami ñyaanam nsi-nsi edioomo ye ndufo,

ima akpanikọ a-ñkenwọñọke nnọ Defid.

4 Se, ami mmenam anye ado ntiense anọ mme idịd,

adaukara ye adaiso ekọñ anọ mme idịd.

5 Ke akpanikọ afo ayaakoot mme idịd a-afo umuudiọọñọke,

ñko mme idịd a-afo umuudiọọñọke eyaefeghe ubịne fiin,

ke ntak Abọọñ Abasi mfo,

Adisana Abasi Isrel,

sia anye unọ fiin mmọnyọ."

6 Yem Abọọñ ke ini akemeke adikịt anye;

koot anye ke ini anye akpereke.

7 Yak mbon ibak ekpọñ usʌñ ammọ,

yak ndiọi awo ekpọñ akikere ammọ.

Yak ammọ ekanna ebịne Abọọñ, ndin anye ayaatua ammọ mbọm,

ye Abasi ñnyịn, sia anye ayaafeen ke afịd esịd.

8 "Sia akikere mmi idooho akikere ndufo,

mme usʌñ mmi inyʌññọ ido ake ndufo,"

Abọọñ atañ.

9 "Kpa naña mme hefịn enyọọñ ekan isọñ,

kpa ntoro ke mme usʌñ mmi enyọọñ ekan mme usʌñ ndufo,

mme akikere mmi enyʌñ enyọọñ ekan mme akikere ndufo.

10 Adaña nte edịm ye sino

etooho hefịn esọiyọ edi,

ado itịmmeke edem aba inyọñ do

ke imiiduọkkọ mmọọñ ke isọñ

inyʌñ inam mme ñkpọ etịppe enyʌñ ekọt efiọọrọ,

nọ enwịm mfịd enọ mme atọinwañ enyʌñ enọ mme awo ñkpọ ndidia,

11 kpa ntoro ke ado ye ikọ a-awuọhọ ke inua mmi:

anye idiitịmmeke idi imbịne miin ukpọk,

ado ayaanam se ami nduak,

anyʌñ anam uduak ami ñkedọññọ anye yak anam.

12 Afo ayaawuọ ke idaara,

enyʌñ udat fiin usʌñ ke emem;

mme ikpọabod ye ntəkabod

eyaebịmme ke ikwọ ke iso mfo,

ye afịd mme eto ke inwañ

eyaemia ubọk ammọ.

13 Utu ke ikọd ñkukịm, yunipa ayaatịppe,

ñko utu ke ntan, meetel ayaatịppe.

Anyem adiido nọ ato do esuan etob Abọọñ,

ke nsi-nsi idiọọñọ,

a-adiiba ke nsi-nsi."