1 Ke ini Adidem Hesikaiya akekoppo ikọ ami, anye amaawai afọñ amọ anyʌñ asịne afọñikpo akaa akedʌk tembịd Abọọñ. 2 Anye amaadọñ Eliakịm aseñkpọ mbaña ufọkadidem, Sebna awedñwed ye mme adaiso ke atu mme aku, afịd ammọ esiine afọñikpo, ate eka ebịne prọfed Aisaiya ayịn Emọs. 3 Ammọ emaedọkkọ anye, "Kop se Hesikaiya atañ mi: Mfịn ami ado usen mfʌhọ ye ntʌnọ ye asuenne, kpa naña mme nsekayịn eyem edimana ke ini uman ado inweek ibaaha se mme eka eman ammọ. 4 Akeme adido Abọọñ Abasi mfo ayaakop ikọ adaiso ekọñ, e-eteufọk amọ, adidem Asiria, adọññọ yak adimiom aduuwem Abasi, ndin anye ayaaduat anye akeene ikọ se Abọọñ Abasi mfo akop. Ke ntoro bọñ akam nọ mbon se iyọhọ isʌhọ."

5 Idaha a-mme adaaha adidem Hesikaiya ekedisooboke ye Aisaiya, 6 Aisaiya amaabo ammọ, "Idọkkọ eteufọk ndufo, ‘Kop se Abọọñ atañ mi: Kuukop ndịk ubaña se afo akop, mme ikọ a-mme nditọufọk adidem Asiria ebenne emmiom miin. 7 Kpañ utọñ! Ayaaba etob keed a-adooho anye amaakop, anye ayem aditịmme ñnyọñ abio amọ, do ke ami ndiinam nọ ewot anye ke akañkañ.’ "

8 Ke adaiso ekọñ akekoppo ke adidem Asiria amaakpọñ Lakis, anye amaatịmme edem ndin amaadikịt naña anye anwana ye Libna.

9 Ndin Senakerib amaabọ etob ke Taihaka, adidem Kuus, asʌk asaña adi adinwana ekọñ ye anye. Ke anye amaakekop ami, anye amaadọñ mme isʌñutom anọ Hesikaiya ye ikọ ami: 10 "Dọkkọ Hesikaiya adidem Yuda: Kuuyak abasi ake afo abuọttọ idem ubiaña fiin ke ini anye abooho, ‘Awo idiiyaaha Yeruselem isịn ke ubọk adidem Asiria.’ 11 Ke akpanikọ afo amekop se mme ndidem Asiria enam afịd mme idịd, ke adisobo ammọ ataa afịd-afịd. Ndin eyaunyaaña fiin? 12 Nte mme abasi mme idịd ado a-mbon se ikimbem miin iso ikara Asiria ekesoboke emaenyaaña ammọ, mme abasi Kosan, Haran, Resef ye mbon Idịn e-ekebaaha ke Tel Asaa? 13 Mmọ adidem Hamad me adidem Apad? Mmọ ndidem abio Laiye, Sefafaim, Hena ye Iffa?"

14 Hesikaiya amaabọ mme isʌñutom ñwedetob anyʌñ akoot. Ndin anye amaadọọk akaa tembịd Abọọñ anyʌñ aketat anye anịm ke iso Abọọñ. 15 Ndin Hesikaiya amaabọñ akam anọ Abọọñ: 16 Abọọñ Andikponñkan, Abasi Isrel, a-atieghe ke ufọọd serubim, afo ikpọọñ ado Abasi ke afịd mme abioubọọñ ke ederimbod. Afo anam anyọñ ye isọñ. 17 Kpañ utọñ, Abọọñ; nyʌñ kop; tat anyen mfo, Abọọñ, nyʌñ kịt; kop afịd mme ikọ se Senakerib adọñ nọ esịn anyịñ Aduuwem Abasi ke ndek.

18 "Abọọñ, ado akpanikọ ke ndidem Asiria esobo mbon awo ami ye mme isọñ ammọ. 19 Ammọ etoomo mme abasi ammọ edọñ ke ikañ enyʌñ esobo ammọ, sia ammọ ikidooho mme abasi ado edo eto ye itiad, se ubọk awo anam. 20 Idahami, Abọọñ Abasi ñnyịn, fak ñnyịn sio ke ubọk amọ, nọ afịd mme idịd ediọọñọ ke afo ikpọọñ, Abọọñ, ado Abasi."

21 Ndin Aisaiya ayịn Emọs amaanọ etob esọk Hesikaiya: Ntom ke Abọọñ, Abasi Isrel, abo: Sia afo umaubọñ akam unnọ miin ubaña Senakerib adidem Asiria, 22 kop ikọ se Abọọñ atañ abaña anye:

Mboppo Ayịn Awonwaan Saiyọn

use fiin ke ndek anyʌñ usak fiin.

Ayịn awonwaan Yeruselem

anyeghe iwuod amọ naña afo afegheke.

23 Anie ke afo ase ke mbio anyʌñ amiom?

Afo adịppe uyio mfo abaña anie,

anyʌñ adịppe anyen mfo ke ntañidem?

Abaña Adisana Abasi Isrel!

24 Afo amekama isʌñutom mfo

amiom Abọọñ.

Afo amenyʌñ abo,

Ye uwak sariọd mmi

ami mmedọọk nsịm mme atịñe ikpọabod,

ataa anyọñ abod Lebanọn.

Ami mmekpok mme ñnyọọññkan eto sida amọ,

mme mfọọn edimek eto yunipa amọ.

Ami mmesịm ataa akpatre atịñe amọ,

mme mfọọnñkan akai amọ.

25 Ami mmetịppe mme ube mmọọñ ke mme asen idịd,

ñnyʌñ ñnwọñ mmọọñ nto do.

Ye ekaikpad mmi

ami mmenam afịd mme idịm ke Iyib esat.

26 Ado nte afo ukoppo?

Akpeene ami ñkebiere.

Ke mme usen edem ami mmaanam uduak;

idahami ami mmenam anye awuọ asu,

ke afo amenam mme ñkpọsọñ abio

ekappa edo mme eboho itiad.

27 Mbon ammọ, u-udịd amaakweeñe,

idem anyʌñ abọkkọ e-ekop abuud.

Ammọ eba nte eto ke inwañ,

nte ndisi awawa emịne,

nte mbid a-atịppeke ke akọm,

asaat mbemiso anye akọt.

28 Ado ami mmediọọñọ nte afo aba

ye ini se afo adi ye ini anyʌññọ anyọñ

ye naña afo atọhọ ye ami.

29 Sia afo atọhọke ye ami,

ñko sia usọñanyen mfo amaadiwuọ utọñ mmi,

ami ñyaasịn ekọb mmi ke iwuo mfo

ye ukwak mmi ke inua mfo,

ndin ami ñyaanam afo atịmme anyọñ

kpa ke usʌñ afo aketooho adi.

30 Hesikaiya, ami adiido idiọọñọ unọ fiin:

Isua ami afo uduudia se itịppe ke idem amọ,

ndin ayọhọ isua iba se itịppe ito akpa ado.

Ado ke ayọhọ isua ita tọ nyʌñ dọk,

tọ mme inwañ fain nyʌñ dia mme mfịd ammọ.

31 Inikeed mfen nsʌhọ abioubọọñ Yuda

ayaanie adʌñ ke idak isọñ anyʌñ anwịm mfịd ke anyọñ.

32 Sia nsʌhọ ayaato ke Yeruselem awuọ adi,

mbon e-ebọkkọke eyaenyʌñ eto Abod Saiyọn.

Akpọsọñ udọñ Abọọñ Andikponñkan adiinam ami awuọ asu.

33 Ke ntoro se Abọọñ atañ ado ami abaña adidem Asiria:

Anye idiidʌkkọ abio ami,

idiinyʌññọ itop idañ mi.

Anye idiikamake atuekọñ ibịne abio ami,

idiinyʌññọ ibọp nnaaekọñ ikanna anye ikʌk.

34 Usʌñ nte anye aketo adi ke anye adisaña inyọñ;

anye idiidʌkkọ abio ami,

Abọọñ abo.

35 "Ami ñyaakpeme abio ami ñnyʌñ ñnyaaña anye,

ke ntak mmi ye ke ntak afʌnadeen mmi Defid!"

36 Akem enyere Abọọñ amaakaa akewot awo tọsịn ikie mme anaañ mme ition (185,000) ke nnaaekọñ Asiria. Mbon awo ekedemme ubakusen edemusen, sese afịd akedo mme akpo awo! 37 Ndin Senakerib adidem Asiria amaasuan nnaaekọñ amọ anyʌñ atịmme edem anyọñ. Anye amaanyọñ Ninife anyʌñ akeba do.

38 Usen keed, nte anye akesʌkkọ akpono abasi amọ Nisrọk ke tembịd, nditọ ideen amọ Adramelek ye Saresa emaewot anye ke akañkañ, ndin ammọ emaefeeñe ekaa isọñ Ararad. Ndin Esahadọn ayịn amọ amaadat itie amọ nte adidem.