1 "Adọdiọọk anọ nditọ nsọñiwuod,"

Abọọñ atañ,

"mbon e-enamma uduak i-imiidooho ake mmi,

e-edʌkkọ edioomo, ado itooho ke sịbidịd mmi,

ekọọk idiọọkñkpọ edot ke idiọọkñkpọ;

2 e-esọiyọke eka Iyib

ke ini imiibọọhọ uyio into miin;

eyemme unwam eto ukpeme Fero,

eyemme itie udịbe eto ndeeñ Iyib.

3 Ado ukpeme Fero adiido ñkpọ abuud unọ fiin,

mfuud Iyib adiiben asuenne usọk fiin.

4 Akpesʌkado ammọ enieghe mme adaaha ke Soan,

mme isʌñutom ammọ enyʌñ eto Hanes edi,

5 eyaesịn afịd awo ke abuud

ato mbon i-imiibaaha ufọn inọ ammọ,

i-imiibenne unwam me ufọn idi,

ado sʌk abuud ye asuenne."

6 Prọfesi a-abañake mme unam ke Nekef:

Ke eboiyoke ke isọñ nsọñọñkpọ ye ndutʌhọ,

isọñ ñyaara ye uman ekpe,

mme ibọm ye mme utatamma udʌkikọd,

mme isʌñutom ebiom inie ammọ ke edem dọñki,

mme ñkpọuto ammọ ke mme ekʌñ kamel,

ekaa idịd i-imiibaaha ufọn,

7 ekaa Iyib, u-unwam ammọ imiibaaha ufọn ndomokeed.

Ke ntoro ami ñkoot anye

Rahab Ammiinamma-Ñkpọ Ndomokeed.

8 Kaa idahami, wet ke itiadñwed nọ ammọ,

wet anye ke ñwed,

ke mme usen ediighe ke iso,

anye akeme adido nsi-nsi ntiense.

9 Sia mbon ami edo mbon afai, nditọ abiaña,

nditọ i-imiimaaha adikop item Abọọñ.

10 Ammọ ebo mme akịdñkukịd,

"Ikiikịt mme ñkukịd aba!"

Enyʌñ ebo mme prọfed,

"Ikiinọọ ñnyịn mme ñkukịd a-adooho akpanikọ aba!

Idọkkọ ñnyịn mme inem ñkpọ,

itañ mme nsu-nsu ñkukịd.

11 Ikpọñ usʌñ ami,

ikiisaña ke afañ ami,

inyʌñ itre aditọhọ ye ñnyịn

mbaña Adisana Abasi Isrel!"

12 Ke ntoro ikop se Adisana Abasi Isrel atañ:

"Sia ndufo emesịn etob ami,

ebuọt idem ye mbon ufiik,

enyʌñ edot anyen ke abiaña,

13 idiọọkñkpọ ami ayaado inọ ndufo

nte anyan ndibene, amaakesaiya ayem adiduọ,

aduọhọ ini keed usọp-usọp.

14 Anye ayaaboomo mbai-mbai nte ako aduañ,

asuana mbọm ibaaha

ke atu ñkpoho amọ, tutu awo idiikịtte ibio ndomokeed

se ekama edappa ukañ ke atʌñikañ,

me se ekama ekoi mmọọñ ke abañ."

15 Se Abọọñ Andikara, Adisana Abasi Isrel, abo ado ami:

"Adinyaaña mfo asịne ke ukappaesịd ye nduọkadudu,

adudu mfo aba ke ndobuyio ye mbuọdidem,

ado afo unieghe ndomokeed ke atu ammọ.

16 Afo ate, ‘Iyoo, ñnyịn iyaifeeñe ke anyọñ enañmbakara.’

Ke ntoro afo ayaafeghe!

Afo ate, ‘Ñnyịn iyaiwat iwuọ ke mme asọp usọp enañ.’

Ke ntoro mbon se ubịne fiin eyaesọp eti-eti!

17 Tọsịn keed eyaefeghe

ke ndịkke awo keed;

ke ndịkke awo ition

afịd ndufo eyaefeeñe,

tutu ikpọñ ndufo

nte afọñidiọọñọ ke anyọñ ekamba abod,

nte afọñidiọọñọ ke anyọñ etəkabod."

18 Ado Abọọñ anie udọñ aditua ndufo mbọm;

ke ntoro anye ayaadakka ada itua ndufo mbọm.

Sia Abọọñ ado Abasi akpe unen.

Afọfọn anọ afịd mbon se itie ibet anye!

19 Mbon Saiyọn, e-edʌññọ ke Yeruselem, ndufo idiituaha ayịd aba. Anye adiifọn die ido ye ndufo ke ini ndufo etuaha enọọ anye eyem unwam! Anye ayaibọọrọ ndufo, anye amaasʌk akokop. 20 Akpesʌkado Abọọñ inọọhọ ndufo uyo ukuud ye mmọọñ ndutʌhọ, awo idiidịppe mme andikpeeb ndufo aba; ndufo eyaedat anyen ndufo ekịt ammọ. 21 Akpekọm ndufo ekanna nnasia me ufiin, mme utọñ ndufo eyaekop uyio ke edem ndufo, a-abooho, "Usʌñ ado ami; saña ke anye." 22 Ndin ndufo eyaesappa mme ubobod abasi ndufo e-efʌkkọ ke silfa ye mme ubobod ñkpọ ndufo e-ekamake kold efʌk; ndufo eyaetop ammọ eduọk nte afọñ itieisọñ enyʌñ ebo ammọ, "Iwuọñọ ndin!"

23 Anye ayaanyʌñ adọñ edịm anọ mme mfịd se ndufo etọ ke isọñ, ndin ndidia se ito isọñ ado ayaanem anyʌñ awak. Ke usen ado mme ufene ndufo eyaeta mbid ke mme unaisọñ. 24 Mme ñyaaraenañ ye mme dọñki e-enamma utom ke ikọd eyaeta ikịm, e-ekamake ñkpọ ukịm isọñ ye udọk esuan. 25 Ke ekamba usen uwodawo, ke ini mme tọwa eduọññọke, mmọọñ ayaato mme ikpọabod ye afịd ntək nti abod awuọ. 26 Afiọñ ayaayamma nte utịn, ndin unwana utịn ayaayamma akañ itiaba akan naña asiyama, nte unwana a-ayọhọke usen itiaba, ke ini Abọọñ amaabọp unan ikọd amọ anyʌñ akọk mme unan ammọ a-anye akenọọhọ.

27 Se, Anyịñ Abọọñ ato anyan itie,

ye akpọsọñ iyadesịd ye nsʌñikañ nte ntọñanyọñ;

ñkpọkinua amọ ayọhọ ye iyadesịd,

edeme amọ ñko anyʌñ aba nte ikañ a-ataahata.

28 Ibifịk amọ aba nte akpọsọñ mmọọñ a-atọọhọ,

adọọk asịm itọñ.

Anye anyeghe mme idịd ke ukeñ nsobo;

anye adot ke akpọmbañ mme awo

udʌk adʌttọ ammọ akpọñ usʌñ.

29 Ndin ndufo eyaekwọ

kpa nte ke akonayio a-ndufo ediaha idaara adisana usọrọ;

esịd ndufo ayaadaara

nte naña mbon se ifịt mme adʌk edakka eda eka

ekamba abod Abọọñ,

eka Ekamba Itiad Isrel.

30 Abọọñ ayaanam mme awo ekop uyio ubọọñ amọ,

ayaanyʌñ anam ammọ ekịt naña ubọk amọ asọiyọ ke isọñ

ye akpọsọñ iyadesịd ye ikañ a-ataahata,

ye akpọsọñ uyom anyọñ, aduma ye edịmitiad.

31 Uyio Abọọñ ayaasuan Asiria;

anye ayaamia ammọ abon ke isọñ ye esañ amọ.

32 Afịd ikpa se Abọọñ amia ammọ

ye akpeti ufen amọ

ediiba nte uyom ikwọ a-atooho ibịdubọk ye mme ndido,

naña anye akama mme eta ubọk amọ anwana anwan ye ammọ.

33 Akpeene ekebeeñe Tofed idem;

emaebeeñe anye idem enịm enọ adidem.

Enam ube ikañ amọ atʌñọ anyʌñ anwaña,

ye ekamba ebohoikañ ye ifia;

ibifịk Abọọñ,

nte udịmikañ esịnne sọlfọ,

anam anye anekke asak.