1 "Bọñ ke akpọsọñ uyio, kuumʌm ukama.

Dịppe uyio mfo ke anyọñ nte adukpoñ.

Nam ikọd mmi ediọọñọ ebaña nsọñiwuod ammọ,

ubon Yekọb ñko ediọọñọ ebaña ndiọiñkpọ ammọ.

2 Sia ke usen ke usen ammọ eñyem miin;

aba nte ammọ enie udọñ adidiọọñọ mme usʌñ mmi,

nte ebo ke ammọ edo idịd e-enamma se ifọn

inyʌññọ ikpọñ mme ewʌhọ Abasi amọ.

Ammọ embịp miin ebaña ndinen ubiere,

enyʌñ eba nte enie udọñ Abasi adikpere ammọ.

3 Ammọ ebo, ‘nsoo ido nọ ñnyịn itie utreudia,’

‘ado afo ukịtte?

Nsoo ido nọ ñnyịn isuuhọ idem ñnyịn,

ndin afo ukịtte?’

"Ado ke usen utreudia ndufo, ndufo enam naña inem ndufo esịd,

enyʌñ etʌk afịd mbon utom.

4 Utreudia ndufo atre ke utọk ye ntịme,

ye ke aditọ emọ-emọ mme eta ibak.

Ndufo ikemeke aditie utreudia naña enam mfịn,

ndin ekere ke akpena ekop uyio ndufo ke anyọñ.

5 Nte utọ utreudia se ami mmek ado ami,

usen keed kpọd se mme awo esuuhọ idem ammọ?

Nte ukweeñe ñkpọ ado adinyuuk iwuod nte akpọ ñnyanyaha,

ye adisuuk nnaa ke afọñikpo ye ke ntọñ?

Se ndufo ekoot utreudia adodo,

usen se Abọọñ anyịmme?

6 "Nte idooho utọ utreudia ami ke ami mmek:

adikpọk mme akpọnọ ukwañ ikpe,

ñnyʌñ ntat mme udʌk akpọnọ,

adisaana mbon e-efiike ñyaak,

ñnyʌñ mbʌñ afịd akpọnọ?

7 Nte idooho adiwana ndidia ndufo ye mbọm abiọọñ

ye adinọ mme ñyooñ uweene itie idʌñ,

afo umaukịt mbon se isaña ifed, asịn ammọ afọñ,

idooho adikanna edem ñwọt abʌk ye iyiib mfo?

8 Ndin unwana mfo ayaayamma nte usiere,

adikọk mfo ñko ayaasọp awuọ awọt idem;

ndin adinenido* mfo ayaaboiyo iso unọ fiin,

ubọọñ Abọọñ ayaado ukpeme unọ fiin ke edem.

9 Ndin afo ayaakoot, ndin Abọọñ ayaanyʌñ abọọrọ;

afo ayaatua ayem unwam, anye ayaanyʌñ abo: Se ami mi.

"Adieke afo aduọhọ akpọnọ ufiik,

ye unyan ubọk ye idiọọk ikọ inua,

10 ñko afo ukpuwa idem mfo, unam ñkpọ unọ mbon abiọọñ,

anyʌñ anọ mbon se efiik se inana ammọ,

unwana mfo ayaayamma ke akịm,

unwana mfo ayaanyʌñ aba nte ufọọd uweemeayio.

11 Abọọñ ayaukpeme fiin afịd ini;

anye ayaunọ fiin uyʌkkọ ke nsaad isọñ,

ayaanyʌñ usọọñọ fiin idem.

Afo adiitie nte inwañ enekkeke eduọk mmọọñ,

nte idịm a-mmọọñ amọ imiitreke.

12 Mbon mfo eyaemaana ebọp ñwuudo ñkaan abio,

eyaenyʌñ edịppe akpọsọñ ñkaan itiad idakisọñ;

eyaukoot fiin Adiọñ Ñwuudo Ndibene,

Andimaana Ndiọñ mme Akpọusʌñ ye mme Itieidʌñ.

13 "Afo akpekpan ukod mfo aditre ibiat mbed Sabad,

anyʌñ atre adinam naña afo ama ke adisana usen mmi,

adieke afo akoodo Sabad inem,

anyʌñ akoot adisana usen Abọọñ ukpono,

afo ñko akpekpono anye ke aditre adisaña ke usʌñ mfo,

unyʌññọ unam naña afo ama, me aditañ atịme ikọ,

14 afo ayaakịt inemesịd mfo ke Abọọñ,

ami ñyaanam afo awat ke ubọọñ ke mme ñkoñ-ñkoñ isọñ,

anyʌñ adia usọrọ ke udeeme ete mfo Yekọb."

Inua Abọọñ atañ ami.