1 Ke akpanikọ ubọk Abọọñ iməhoke ibọhọ anye adinyaaña,

utọñ amọ inyʌññọ idoppo ikan se anye akop ikọ.

2 Ado mme ndiọiñkpọ ndufo idiañña

ndufo akpọñ Abasi;

ndiọiñkpọ ndufo edịp iso amọ ikpọñ ndufo,

mbaak anye akop.

3 Sia ubọk ndufo ayọhọ ye iyiib,

mme nnuunubọk ndufo eyọhọ ye ndudue.

Ñkpọkinua ndufo esʌhọ nsu,

edeme ndufo enyʌñ etañ mme ibak-ibak ñkpọ.

4 Awo ndomokeed iyemme adinen ikpe;

awo ndomokeed ikpeeghe ikpe ke akpanikọ.

Ammọ ebuọt idem ke ukpọk mfaaña, enyʌñ esʌhọ nsu;

ammọ eyommo mfịna enyʌñ eman ibak.

5 Ammọ eboot mme ñkwa ibọm,

enyʌñ etuak ufọk utuudekpe.

Awo akeedodo ataha ñkwa ammọ ayaakpa,

ndin emaebom keed, ayaaboot ibọm.

6 Ñkpukọọkọọmọ ammọ ifọññọ ke afọñ;

ammọ ikanna ifʌk idem ammọ ye se ammọ enam.

Mme adinam ammọ edo ibak,

mme adinam afai eba ke ubọk ammọ.

7 Ukod ammọ efeghe ebịne idiọọkñkpọ;

ammọ esọp adiduọk iyiib i-imiidueghe.

Ammọ ebịne ndiọi ndutʌm;

mme adinam afai edo idiọọñọ usʌñ ammọ.

8 Ammọ idiọọñọke usʌñ emem;

adinen ikpe inyʌññọ iba ke mme usʌñ ammọ.

Ammọ ekanna usʌñ ammọ enịm ñkwaña-ñkwaña;

ibaaha awo ndomokeed adiisaña do ikịt emem.

9 Ke ntoro adinen ikpe asanna ikpọñ ñnyịn;

adinenido ñko isịmme ñnyịn.

Ñnyịn iyem unwana, ado afịd itie ado akịm;

iyem uyamma, ado ñnyịn isaña ke ntotəño ndukpọñ.

10 Nte nnan ñnyịn iweeweere ubọk ke ndibene,

iyeem usʌñ ñnyịn nte mbon i-imiinieghe anyen.

Ke ufọọd uweemeayio ñnyịn ifʌmmọ nte ado ndubiayio;

ke atu mme ñkpọsọñ, ñnyịn iba nte mme akpañkpa.

11 Afịd ñnyịn ikuun nte amọnikọd;

inyʌñ imịm mmịm ke mfʌhọ nte mme ibiom.

Ñnyịn iyem unen, ado ikịtte ndomokeed;

iyem adinyaaña, ado anye aba nsan-nsan ikpọñ ñnyịn.

12 Sia ndudue ñnyịn ewak ke iso mfo,

ndin mme idiọọkñkpọ ñnyịn etie ntiense ibaña ñnyịn.

Mme ndudue ñnyịn eba ye ñnyịn afịd ini,

ñnyịn ñko imidiọọñọ mme idiọọkñkpọ ñnyịn:

13 nsọñiwuod ye ibak adinam ye Abọọñ,

imikanna edem ñnyịn iwọt Abasi ñnyịn,

isịn nsọk nsọñiwuod ye ufiik,

itañ mme nsu se mme esịd ñnyịn ekere.

14 Ke ntak ado ebịn unenikpe etịmme edem,

ndin adinenido ada nsan-nsan;

akpanikọ ayʌt aduọ ke mme efaak,

akpanikọ ikanna idʌk.

15 Ibaaha nte ekan ekịt akpanikọ,

ñko awo akeedodo a-asọọnọ idiọọkñkpọ akappa ado mbịme anọ unam.

Abọọñ amaase ndin esịd ikinemme anye

ibaña naña unenikpe imiikibaaha.

16 Anye amaakịt ke ibaaha awo ndomokeed,

idem amaakpa anye ke ikibaaha awo se ikpe ubọk ibaña;

ke ntoro ubọk amọ amaabọ adinyaaña anọ anye,

ndin adinenido amọ amaamʌm anye akama.

17 Anye amaasịne adinenido nte afọñ ikpanesịd,

ye itam adinyaaña ke iwuod amọ;

anye asịne mme afọñ usio usiene,

anyʌñ awañ idem amọ ke akpọsọñ udọñ nte afọñidem.

18 Akeene se ammọ enam,

kpa ntoro ke anye adiinọ ammọ utịb,

anọ usua amọ iyadesịd,

mbon utọk amọ ndiọi adinam ammọ;

anye ayaanọ mme abio isu se idot ye ammọ.

19 Tọọñọ ke edem usobutịn, mme awo eyaefeghe anyịñ Abọọñ,

ñko tọọñọ ke usakkautịn, ammọ eyaekpono ubọọñ ammọ.

Sia anye ayaadi nte ntịmmeedem mmọọñ atọ

i-ibifịk Abọọñ anəkko.

20 "Andifak ayaadi ke Saiyọn,

abịne mbon se iba ke Yekọb, e-ekappake esịd ekpọñ ndiọiñkpọ ammọ,"

Abọọñ atañ.

21 Abọọñ abo, "Amaado ami, edioomo mmi ye ammọ ado ami, Sịbidịd mmi, u-udoroke fiin ke idem, iduukpọññọ fiin, ñko ikọ mmi a-nsịnne ke inua mfo adiidoro ke ñkpọkinua mfo afịd ini, adoro ke ñkpọkinua nditọ mfo ye ke ñkpọkinua ubon ammọ, tọọñọ ke ini ami tutu ke nsi-nsi," Abọọñ atañ.