1 Prọfesi a-abañake Babilọn naña Aisaiya ayịn Emọs akekịt:

2 Dịppe afọñidiọọñọ ke anainwañ anyọñ abod,

bọñ ñkpo nọ ammọ;

nyan ubọk tappa ammọ

nọ esaña edʌk ke mme inuaatob mme adot ukpono.

3 Ami mmenọ mbon a-ami ñkediọññọ nnịm mbeeñe ekọñ uyio;

ami mmedọkkọ mbon ekọñ mmi yak enam ekeene iyadesịd mmi,

mbon e-edaarake ke edikan mmi.

4 Kpañ utọñ, kop uyom ke mme ikpọabod,

nte ake ekamba atu awo!

Kpañ utọñ, kop akpọsọñ uyom ke atu mme idịd,

nte mme idịd ederimbod e-ebohoke itie keed!

Abọọñ Andikponñkan asʌk atañ

mbon ekọñ anịm anọ anwan.

5 Ammọ eto mme anyan idịd,

eto mme utịd ikpaanyọñ;

Abọọñ ye mme ñkpọekọñ iyadesịd amọ

adisobo afịd mme idịd.

6 Tua, sia usen Abọọñ akpere;

anye ayaadi nte nsobo a-atooho Andikponñkan*.

7 Ke ntak ami, afịd ubọk eyaemem,

afịd esịd eyaeyeeme ye ndịk.

8 Ndịk ayaamʌm ammọ;

ubiak ye ndutʌhọ eyaemʌm ammọ;

ammọ eyaemiañña nte awonwaan ake uman abiakka.

Ammọ eyaese idem ammọ ke ñkpaidem,

mme iso ammọ esak nte edemeikañ.

9 Se, usen Abọọñ asʌk adi,

idiọọk usen asañake ye ibak ye akpọsọñ iyadesịd,

adisobo isọñ

ñnyʌñ nsobo mme anamidiọọk e-ebaaha ke esịd amọ.

10 Mme ntantaafiọñ ikpaanyọñ ye mme uwak udịm ammọ

idiiwọttọ uyamma ammọ.

Utịn a-asakkake ayaakịm

afiọñ ñko idiiwọttọ uyamma amọ.

11 Ami ñyaamia ederimbod ufen akeene ndiọiñkpọ amọ,

mbon ibak akeene ndiọiñkpọ ammọ.

Ami ñyaatre ñkokkoidem mbon ntañidem,

ñnyʌñ nsuuho ntañidem mbon afai.

12 Ami ñyaanam mme awo esọbọ ekan nsọñudua kold,

enana ekan kold a-atooho Ọfia.

13 Ke ntoro ami ñyaanam mme ikpaanyọñ enyeñ;

ederimbod ñko ayaanyeghe asịkke akpọñ itie amọ

ato ntak iyadesịd Abọọñ Andikponñkan,

ke usen ufiob iyadesịd amọ.

14 Nte ñyịn edob e-ebịnekebịne,

nte edọñ i-imiinieghe andikpeme,

afịd ammọ eyaetịmme enyọñ ebịne mbon ammọ,

ammọ eyaefeeñe enyọñ isọñ emana ammọ

15 Eyaekịm awo akeedodo e-emʌmmọ ewot;

eyaekpok afịd mbon e-emʌmmọ ke akañkañ ewot.

16 Eyaetọ mme nsekayịn ammọ esuan ñkeñe-ñkeñe ke iso ammọ;

eyaebịme mme ñkpọufọk ammọ enyʌñ esappa ibaan ammọ.

17 Ke akpanikọ, ami ñyaasịn asuan ke ufọọd ammọ ye mbon Med,

i-imiiyemme ibaña silfa

inyʌññọ ikop inemesịd ito kold.

18 Mme utịgha ammọ eyaewot ñkparawa;

ammọ idiinieghe mbọm ibaña mme nsekayịn,

idiinyʌññọ ise ntəkayịn ye esịd mbọm.

19 Babilọn, ñkpọuto mme idịd,

ñkpọ utañ ase ye ñkpọ ubọọñ mbon Babilọn,

ke Abasi adiiben ammọ ifep

nte Sọdọm ye Komora.

20 Awo ndomokeed idiidʌññọ ke esịd amọ;

awo ndomokeed idiibaaha do ke afịd emana;

mme akpeme ufene e-esañakesaña idiinyʌññọ ibọp atayad ammọ do,

mme akpemeedọñ idiinịmme udịmedọñ ammọ do yak eduọk adudu.

21 Ado mme unam e-edʌññọ ke akpautatan ediina do,

mme ewaikọd ediiyọhọ mme ufọk amọ;

do ke mme ñkịdikịd ediidʌñọ,

do ñko ke mme ebod ikọd ediitaam ñkprek.

22 Mme haiyena eyaedʌñ ke mme ñkpọsọñ itie ammọ,

mme ewaikọd eyaenyʌñ edʌñ ke mme mfọọn akwere ndidem ammọ.

Ini amọ a-akpere,

ndin mme usen amọ idiikpeeneke.