1 Se, Abọọñ ayaanam ederimbod anaa ukpọk

anyʌñ asobo anye;

anye ayaabiat iso ederimbod

anyʌñ asuan mbon se idʌñ ke esịd;

2 adiido ukem ado

anọ aku kpa ye ñkaña awo,

anọ eteufọk kpa ye ayịnufọk amọ,

anọ ekaufọk kpa ye ayịnufọk amọ,

anọ anyamudua kpa ye adebudua,

anọ awo ewuọd kpa ye awuọdakʌk,

anọ akamaisọn kpa ye awuọdakʌk.

3 Eyaesobo isọñ afịd-afịd

enyʌñ ebịme anye afịd-afịd.

Abọọñ ado atañ ikọ ami.

4 Isọñ asaat anyʌñ ayeeme,

Ederimbod atua anyʌñ ayeeme,

mme hefịn etua ye isọñ.

5 Mme adʌñisọñ e-esappa isọñ;

ammọ e-ebiat mme mbed,

ebiat mme ewʌhọ

enyʌñ ebiat nsi-nsi edioomo.

6 Ke ntoro isuuñọ afʌk isọñ;

mme adʌñisọñ ana eyọ ndudue ammọ.

Ke ntoro e-efọp mme adʌñisọñ ke ikañ,

ndin ibad-ibad awo esʌhọ.

7 Ufa ukọd a-asat ama, akaan fain a-anyʌñ ayeeme;

afịd mme abre mbre ekuun.

8 Mme anemuyio ibịdubọk edobo,

uyom mbon mbre inemesịd atre,

anemuyio hab isioho uyio.

9 Ammọ inwọññọ ukọd aba ke ini ekwọọhọ ikwọ;

bie ado idod ñkpọ anọ mbon se inwọñ.

10 Mbiara abio ana ukpọk;

esiit usʌñ se esaña edʌk afịd ufọk.

11 Ammọ etua ke mme akpọusʌñ isañ eyem ukọd;

afịd idaara akappa mfʌhọ,

etre afịd ñkpo idaara ke iso isọñ.

12 Abio a-abiaña ama,

e-ekpok inuaatob amọ ñkeñe-ñkeñe.

13 Kpa ntoro ke adiido ye isọñ

ye mme idịd,

kpa naña emaemia eto ọlif,

me naña kreb asʌhọ ke emaekịppe mfịd ema.

14 Ammọ edịppe uyio ammọ, ebọñ ñkpo idaara;

ammọ etọọñọ ke usobutịn etañ ase Abọọñ.

15 Ke ntoro ke usakkautịn inọ Abọọñ itooro;

ibenne anyịñ Abọọñ, kpa Abasi Isrel,

ke mme unaisọñ ñkanñkʌk mmọọñ.

16 Tọọñọ ke utịd ederimbod ñnyịn imikop uyio ikwọ:

"Ubọọñ anie Andinen Ñkan."

Ado ami mbo, "Ami mmetaha mma, ami mmetaha mma!

Adọdiọọk annọ miin!

Mbon abiaña esʌk ebiaña!

Ammọ ekama abiaña ebiaña abiaña!"

17 Ndịk ye ube ye afia enaa ubet fiin,

mbon ederimbod.

18 Awo keed akeedodo a-afegheke ke amaakop uyom ndịk

ayaaduọ adʌk ube;

awo keed akeedodo a-adọọhọ awuọ ke ube,

afia ayaamʌm anye.

Mme inuaatob mme hefịn enaa inwañ,

mme idakisọñ ederimbod enyeñ.

19 Ederimbod awuudo afịd,

ederimbod asuana mbai-mbai,

ederimbod anyeeñe akpọsọñ-akpọsọñ.

20 Ederimbod akanna nte awo inaam ukọd,

anye ateññe nte afịm aben atayad;

mbiomo nsọñiwuod amọ adoppo eti-eti,

anam anye aduọ, idiinyʌññọ idakka ida aba ke nsi-nsi.

21 Ke usen ado ufen Abọọñ ayaamia

mme adudu ke mme anyọñ

ye mme ndidem ke isọñ.

22 Eyaetañ ammọ ebon itie keed nte udịmenañ

nte naña ebọp mbon ñkpakọb edọñ ke ube;

eyaedọñ ammọ ke ufọk ñkpakọb eyịt usʌñ,

enyʌñ emia ammọ ufen ke uwak usen emaeboiyo.

23 Idem ayaakpa afiọñ,

abuud ayaanam utịn;

sia Abọọñ Andikponñkan ayaada ukara

ke Abod Saiyọn ye ke Yeruselem,

ye ke iso mme ñkpisọñ amọ, ke ekamba ubọọñ.