1 Ikpañ utọñ innọ miin, ndufo mme abio isu;

ikop ami, ndufo mme nsan-nsan idịd:

Mbemiso ami ñkemana Abọọñ amañkoot miin;

ke idịb eka mmi anye amaakoot anyịñ miin.

2 Anye anam inua mmi asọp nte akañkañ ebanna,

ke ndukpọñ ubọk amọ anye amandịp miin;

anye amaanam ami ñkappa mba nte idañ etʌkkọ nọ amọnọ,

amaanyʌñ andịp miin ke ekpad idañ amọ.

3 Anye amambo miin, "Afo ado isʌñutom mmi,

Isrel, a-ami ndiiwọt mmọnyọ mmi."

4 Ado ami mmaabo, "Ami mmenam utom ke ikpu-ikpu;

ami mmesio inweek mmi nnọ ñkpọ i-imiibaaha ufọn ndomokeed.

Ado se ido ake mmi asịne ke ubọk Abọọñ,

ndin utịb mmi aba ye Abasi mmi."

5 Idahami Abọọñ ate,

anye akembotto miin ke idịb adidido isʌñutom amọ,

adiben Yekọb ntịmme nsọk anye,

ñnyʌñ ñkoono Isrel mbok nnọ idem amọ,

sia ami mmenie ukpono ke iso Abọọñ,

ndin Abasi mmi ado adudu mmi,

6 anye ate:

"Ado ataa etək ñkpọ afo adido isʌñutom mmi

nọ adimaana adiọñ mme esiin Yekọb

anyʌñ aben mbon Isrel se ami ñkenịm anyọñ adi.

Ami ñyaunam fiin ado unwana anọ mme Gentile,

nọ adinyaaña mmi asịm utịd ederimbod."

7 Se Abọọñ atañ ado ami,

Andifak ye Ukweeñe Adisana Abasi Isrel,

anye se afịd awo ese ke ndek ye anye a-mme idịd esuaha,

ayịnufọk mme mbọọñ:

"Ndidem eyaukịt fiin enyʌñ edakka eda,

mbọọñ eyaekịt enyʌñ esuuk iwuod,

ke ntak Abọọñ, anam akpanikọ,

Ukweeñe Adisana Abasi Isrel, u-umekke fiin."

8 Se Abọọñ atañ ado ami:

"Ke ini mfọn mmi ami ñyaubọọrọ fiin,

ñko ke usen adinyaaña ami ñyaunwam fiin;

ami ñyaunịm fiin ñnyʌñ unam fiin

ado edioomo anọ ikọd mmi,

nọ aditịmme adiọñ isọñ

anyʌñ amaana adeeme mme mbiaña udeeme,

9 anyʌñ adibo mbon ñkpakọb, ‘Iwuọ idi,’

ye mbon e-ebaaha ke ekịm, ‘Ibọ ñkpọkñyak!’

"Ammọ eyaedia ñkpọ ke mben usʌñ,

enyʌñ ekịt nseghe mbid ke afịd ntəkabod amaakesaat.

10 Ammọ idiikoppo abiọọñ me nsaditọñ,

ufiob akpautatan idiifọppọ ammọ, ayio ñko idiimiaha ammọ.

Anye a-akoppo mbọm abaña ammọ ayaadat ammọ usʌñ,

anyʌñ adat ammọ aboiyo ke mben mmọọñ.

11 Ami ñyaanam afịd ikpọabod ekappa unaisọñ,

ndin eyaedịppe mme akpọusʌñ isañ mmi.

12 Se, ammọ eyaeto anyan itie edi,

usʌk eto adoro, usʌk eto usobutịn,

usʌk eto mme efaak Aswan."

13 Isio ñkpo idaara, ndufo mme hefịn;

idat esịd, ndufo isọñ;

ibịmme ikwọ ikwọ, ndufo ikpọabod!

Sia Abọọñ adọñ ikọd amọ esịd,

ayaanyʌñ akop mbọm abaña mbon amọ se iba ke ndutʌhọ.

14 Ado Saiyọn amaabo, "Abọọñ ansịn miin,

Abọọñ amfre miin anyen."

15 "Nte eka akeme adifre ayịn a-anye anọọhọ eba

me aditre adikop mbọm mbaña ayịn a-anye amanna?

Akpesʌkado a-anye akemeke adifre,

ami nduufreke fiin!

16 Se, ami mmumịñ fiin ke esịd ekaubọk mmi;

mme ndibene mfo emba miin ke iso ke nsi-nsi.

17 Nditọ mfo esọp efeghe enyọñ edi,

ndin mbon se ikusobo fiin edakka ukpọñ fiin.

18 Dịppe anyen mfo ke anyọñ nyʌñ se kanna;

afịd nditọ mfo ukanna fiin ekʌk enyʌñ edi ubịne fiin.

Adaña nte ami nduuho uwem," Abọọñ atañ,

"afo ayaasịne ammọ ke idem nte mme ñkpọ mbanaidem;

afo ayaasịne ammọ, nte anwaanndọ.

19 "Akpesʌkado emaubiat fiin enyʌñ enam afo ado ukpọk,

isọñ mfo anyʌñ anaa mbiara,

idahami afo ayaasịp abọhọ anọ mbon mfo,

ndin mbon ekutaaha fiin ediiba ke anyan usʌñ ukpọñ fiin.

20 Nditọ e-emanake ke ini mfʌhọ mfo

eyaesʌk etañ usịn fiin ke utọñ ete,

‘Itie ami asịp abọhọ inọ ñnyịn;

inọ ñnyịn itie amaanake akpon se ñnyịn idʌñ.’

21 Ndin afo ayaabo ke esịd mfo,

‘Anie akeman nditọ ami innọ miin?

Ami ñkeba ke mfʌhọ ñnyʌñ ndo ada;

ami ñkedo ntañmfeb ekọñ enyʌñ ensịn miin.

Anie awo akebọọk ibon ami?

Ami ñkedo ikpọọñ,

ado mbon ami, ammọ eto uke edi?’ "

22 Se Abọọñ Andikara atañ ado ami:

"Se, ami ñyaasịn uyio ñkoot mme idịd,

ami ñyaadịppe afọñidiọọñọ mmi nnọ mme idịd;

ammọ eyaekama nditọ ideen mfo ke ubọk eben edi,

enyʌñ ekama nditọ ibaan mfo ke ifʌkkọ ammọ.

23 Ndidem ediido mme ete unọ fiin,

mme mbọọñibaan ammọ ediido mme adeb mfo.

Ammọ eyaenyuuk iwuod unọ fiin, enyʌñ ekʌp iso ammọ ke isọñ;

ammọ eyaenweem abu ke ñkpad mfo.

Ini ado ke afo uduudiọọñọ ke ami ndo Abọọñ;

mbon e-enieghe idodanyen ke ami idiidiaha abuud."

24 Nte ekeme edikoono mbịme nto mbon ekọñ,

me edifak mme ifʌn nsio ke ubọk mbon ñkpọsọñ?

25 Ado se Abọọñ atañ ado ami:

"Ii, eyaebọ mme ifʌn ke ubọk mbon ekọñ,

enyʌñ ebọ mbịme ke ubọk ñkpọsọñ awo;

ami ñyaanwana ye mbon se inwana ye afo,

ñko ami ñyaanyaaña nditọ mfo.

26 Ami ñyaanam mbon u-ufiighe fiin eta abʌkidem ammọ;

iyiib ammọ ayaakappa anaam ammọ nte ukọd.

Idaha ado ke afịd ubonawo ediidiọọñọ

ke ami, Abọọñ, ndo Andunyaaña fiin,

Andufak fiin, Akpọsọñ Abasi Yekọb."