1 Se Abọọñ atañ ado ami:

"Mmọ ñwed uwuọndọ eka mfo

a-ami ñkebenne nsio anye ndọ?

Akee ke atu mbon isọn mmi

ke ami ñkunyam fiin nnọ?

Ke ntak idiọọkñkpọ ndufo emainyam ndufo;

ke ntak mbuka ido ndufo ke ekesio eka ndufo ndọ.

2 Ke ini ami ñkediighe, nsoo ikinam nọ awo ndomokeed imiikibaaha?

Ke ini ami ñkekoodo, nsoo ikinam awo ndomokeed ikibaaha se ibọọrọ?

Ado nte ubọk mmi akemooməho akan se ñkpunyaaña fiin?

Ado nte ami nnieghe adudu adufak fiin?

Ke ñkaña nduaiya ami mmaanam akpainyañ asat,

nnam mme inyañ ekappa akpautatan;

iyak ammọ ebʌttọ ke ntak unana mmọọñ,

enyʌñ ekpañña ke ntak nsaditọñ.

3 Ami ñkama ekịm mfʌk mme hefịn,

ñnyʌñ nnam afọñikpo ado ufʌkñkpọ ammọ."

4 Abọọñ Andikara annọ miin asaña-asaña edeme se ñkama ñkpeep ñkpọ,

adidiọọñọ ikọ se ikeme adisọọñọ mbon e-ekpaaha mba.

Anye andemme miin kwa ubakusen,

ademme utọñ mmi yak ñkop nte awo e-enọọhọ item.

5 Abọọñ Andikara atat utọñ mmi;

ami ndooho awo nsọñiwuod,

ami ñkannake edem.

6 Ami mmaawọññọ edem mmi nnọ mbon se ikimmia miin,

ñwọññọ mbañ mmi nnọ mbon se ikiñwịppe ñwaebek;

ami ñkidịppe iso mmi

mbaña nsaha ye utọetab.

7 Sia Abọọñ Andikara añnwam miin,

awo idinsuenneke miin.

Ke ntoro ami mmenịm iso mmi nte itiad,

sia ami mmediọọñọ ke abuud idinnamma miin.

8 Andiñnyaaña miin akpere.

Anie awo idiiben ikpe imbịne miin?

Yak ñnyịn ida ise emọ-emọ!

Anie ado awo utọk mmi?

Yak anye adi ambịne miin!

9 Abọọñ Andikara ado andiiñnwam miin.

Anie adiisua innọ miin?

Afịd ammọ eyaewuọ anyen nte afọñ;

mme utañkpọ eyaeta ammọ esio.

10 Anie ke atu ndufo ibaak Abọọñ

inyʌñ inam ikọ isʌñutom amọ?

Yak mbon se isaña ke ekịm,

i-imiinieghe ikañ,

ebuọt idem ke anyịñ Abọọñ

enyʌñ ebet edem ke Abasi ammọ.

11 Ado idahami, afịd ndufo se idomo ikañ

enyʌñ enọ idem ndufo mme ikañ emuum,

ikaa ikisaña ke unwana ikañ ndufo

ye mme ikañ emuum a-ndufo eyịtte yak asak.

Se ndufo ediibọ ke ubọk mmi ado ami:

Ndufo eyaenaa ke ndutʌhọ.