1 Ke ayọhọ isua duob mme inaañ ke ukara Adidem Hesikaiya, Senakerib adidem Asiria amaakaa ekọñ ye afịd mme ñkpọsọñ abio Yuda anyʌñ akoono ammọ adat anie. 2 Akem adidem Asiria amaadọñ adaiso ekọñ amọ asaña ye uwak udịmekọñ eto Lakis ebịne Adidem Hesikaiya ke Yeruselem. Ke ini adaiso ekọñ aketuakka ada ke mben Ñkpọdiọhọ Mmọọñ Anyọñ, ke usʌñ a-akaaha Inwañ Ayedafọñ, 3 Eliakịm ayịn Hilkia aseñkpọ mbaña ufọkadidem, Sebna awedñwed, ye Yoa ayịn Asaf awedmbʌk ñkpọntịppe abio emaewuọñọ ekesoobo anye.

4 Ekamba adaiso ekọñ amaabo ammọ, "Idọkkọ Hesikaiya:

" ‘Ntom ke ekamba adidem, kpa adidem Asiria, abo: Uko mfo ami asọọñọ ada ke nsoo? 5 Afo abo ke iminie item inyʌñ inie adudu inọ ekọñ, ado afo atañ uyaha ikọ. Anie awo ke afo adot anyen, yak afo asọñ iwuod ye ami? 6 Se, ami mmediọọñọ ke afo abet idem ke Iyib, nsakka ubaak ñnyanyaha ado, a-akịmme ubọk awo keed akeedodo a-abereke ke anye. Kpa ntoro ke Fero adidem Iyib aba ye afịd mbon e-enieghe idodanyen ke anye. 7 Ado adieke afo ambooho miin, "Ñnyịn inie idodanyen ke Abọọñ Abasi ñnyịn," nte idooho anye ke Hesikaiya akesioño mme ñkoñ-ñkoñ itie ye mme akpokoro uwa amọ, ndin abo Yuda ye Yeruselem, "Ana ndufo etuak iwuod ke iso akpokoro uwa ami"?

8 " ‘Di ndin, dʌk edioomo unyịmme ye eteufọk mmi, adidem Asiria: ami ñyaunọ fiin enañmbakara tọsịn iba (2,000), adieke afo akanna anie mme andiwad ammọ! 9 Die ndin ke afo akan akaa ikọ ye andisịb ñkan ke atu mme adaaha eteufọk mmi, akpesʌkado afo adotto anyen ke mme sariọd ye mme awad enañmbakara* Iyib? 10 Ke aboiyoke ado, nte ami mmedi adinwana ekọñ ñnyʌñ nsobo isọñ ami ke Abọọñ imiiyịmmeke? Abọọñ ke idem amọ akendọkkọ miin ate yak ndọọk ñka anwan ye idịd ami ñnyʌñ nsobo anye.’ "

11 Ndin Eliakịm, Sebna ye Yoa emaedọkkọ adaiso ekọñ ete, "Mbọk tañ ikọ nọ nditọufọk mfo ke usem Aram, sia ñnyịn imikop usem ado. Kuutañ ikọ ye ñnyịn ke usem Hibru mbaak afịd mbon se idoro ke ndibene abio edikop."

12 Ado adaiso ekọñ amaabọọrọ ate, "Ado nte eteufọk mmi akendọñ miin ate ndudọkkọ fiin ye eteufọk mfo ikpọñ mme ñkpọ ami, ke ntañ nnọọ mbon e-edoroke ke ndibene abio, a-adooho ammọ ye ndufo, eyaedia uduañ ndufo enyʌñ enwọñ ikịm ndufo?"

13 Ndin adaiso ekọñ amaadakka ada anyʌñ adịppe uyio atañ ke usem Hibru, "Ikop mme ikọ ekamba adidem, kpa adidem Asiria! 14 Ntom ke adidem abo: Ikiiyak Hesikaiya ibiaña ndufo. Anye idiikanna ifak ndufo! 15 Ikiiyak Hesikaiya ikpak ndufo nọ ebuọt idem ke Abọọñ, anye amaabo, ‘Ke akpanikọ Abọọñ ayaifak ñnyịn; abio ami idiiduọhọ idʌk ubọk adidem Asiria.’

16 "Ikiikpañ utọñ inọọ Hesikaiya. Se adidem Asiria atañ ado ami: Inam emem ye ami inyʌñ idi imbịne miin. Ndin ndufo keedekeed eyaedia mfịd eto fain ndufo ye eto fik ndufo enyʌñ enwọñ mmọọñ eto ube mmọọñ ndufo, 17 tutu ami ndi ndiben ndufo ñkaa isọñ a-abaaha nte ake ndufo: isọñ abakpa ye ufa ukọd, isọñ uyo ye mme inwañ fain.

18 "Ikiiyak Hesikaiya itịn ndufo usʌñ ke anye amaabo, ‘Abọọñ ayainyaaña ñnyịn.’ Akenaanam aba naña mme abasi idịd mfen enyaaña mme isọñ ammọ esio ke ubọk adidem Asiria? 19 Mmọ mme abasi Hamad ye Apad? Mmọ mme abasi Sefafaim? Ammọ enyaaña Sameria esio ke ubọk mmi? 20 Anie ke atu mme abasi mme idịd ami akeme adinyaaña mme isọñ ammọ nsio ke ubọk mmi? Ke die ndin ke Abọọñ akeme adinyaaña Yeruselem nsio ke ubọk mmi?"

21 Ado mbon awo emaeba ke ndobuyio inyʌññọ itañ ikọ ndomokeed ke ibọọrọ, sia adidem amaanọ ewʌhọ ate, "Ikiibọọrọ anye."

22 Akem Eliakịm ayịn Hilkia aseñkpọ mbaña ufọkadidem, Sebna awedñwed, ye Yoa ayịn Asaf, akamañwed ñkpọntịppe ke abio, emaebịne Hesikaiya, ye ñwaiya afọñ ke idem, enyʌñ ekedọkkọ anye se adaiso ekọñ aketañ.