1 "Ndufo ikpañ utọñ ikop anyem, ubon Yekọb,

ndufo e-ekoodo anyịñ edian Isrel

e-enyʌññọ eto ubon Yuda,

ndufo e-edatta mme unwọñọ ke anyịñ Abọọñ

e-enyʌññọ etommo Abasi Isrel;

ado idooho ke akpanikọ me ke adinenido,

2 ndufo e-ekoodo idem ndufo mme amanaisọñ adisana abio

e-enyʌññọ edot anyen ke Abasi Isrel,

Abọọñ Andikponñkan ado anyịñ amọ:

3 Ami mmaatañ mbaña ñkaan ñkpọ anyan ini koo,

inua mmi amaatañ mme ñkpọ ndin ami ñko mmaanam ediọọñọ mme ñkpọ ami;

ke adiyok ami mmaanam ñkpọ mbaña, ndin ammọ emaenyʌñ ewuọ esu.

4 Sia ami mmaadiọọñọ naña afo akesọñ iwuod aketre;

mme asịb itọñ mfo akedo ukwak,

ñko akpọiso mfo akedo brọns.

5 Ke ntoro ami mmaudọkkọ fiin mme ñkpọ ami anyan ini koo;

mbemiso ammọ etịppe ami mmaasian ammọ unọ fiin

mbaak afo uduukan ubo,

‘Mme ubobodñkpọ mmi ekenam ammọ esu;

ubobodñkpọ eto ye abasi ukwak mmi ekewuuk ammọ.’

6 Afo amekop mme ñkpọ ami; kanna anyen se afịd ammọ.

Nte afo uduunyịmmeke ammọ?

"Atọọñọ ke idahami kaa iso ami ñyaudọkkọ fiin mbaña mme ufa ñkpọ,

mme ndedịbe ñkpọ a-afo uduudiọọñọke.

7 Ebot ammọ idahami, idooho ke anyan ini;

ndufo ikoppo ibaña ammọ mbemiso mfịn ami.

Ke ntoro ndufo ikemeke adibo,

‘Ii, ami mmaadiọọñọ mbaña ammọ.’

8 Afo ukoppo, inyʌññọ unwaña;

tọọñọ ke esed utọñ mfo ikʌppọke.

Ami mmenekke ndiọọñọ mbaña naña afo aforo mforo;

ekuukoot fiin ayịn nsọñiwuod tọọñọ ke ini a-afo akemanake.

9 Ke ntak anyịñ mmi ami ñyaamaana nsịkke usen iyadesịd nnịm;

ke ntak itooro mmi ami mmemaana mmʌm anye ñkama ukpọñ fiin,

mbaak ami ndusobo fiin ataa afịd-afịd.

10 Se, ami mmunam fiin asana, ado idooho nte silfa;

ami mmudomo fiin ke akpọsọñ ikañ ndutʌhọ.

11 Ke ntak mmi, kpa ke ntak mmi, ami mmenam ami.

Ami ñkeme die adinam nọ esịn anyịñ mmi ke ndek?

Ami ndiiyaaha ubọọñ mmi nnọ awo mfen.

12 "Kpañ utọñ nnọ miin, Yekọb,

Isrel, a-ami ñkoodo:

ami ndo anye;

ami ndo akpa, ami ñnyʌñ ndo akpatre.

13 Ado ubọk mmi akenịm itiad idakisọñ ederimbod,

ubọk nnasia mmi ñko aketat mme hefịn;

ke ini ami ñkoodo ammọ,

afịd ammọ edakka eda akañ keed.

14 "Idiboho itie keed, afịd ndufo, inyʌñ ikpañ utọñ:

Akee ke atu ubobodñkpọ ami

ake idọkkọ ndufo mme ñkpọ ami?

Adimek nsaña Abọọñ

ayaanam uduak amọ abaña Babilọn.

15 Ami, kpa ami ke idem mmi, mmetañ;

ii, ami mmekoot anye.

Ami ñyaaben anye ndi,

anye ayaanyʌñ anam utom amọ mfọn-mfọn.

16 "Sịkke ñkpere miin nyʌñ kpañ utọñ kop ikọ ami:

"Tọọñọ ke akpa ntọd ami ntañña ikọ ke ndịbe;

ke ini anye atịppeke, ami mmọdo mba."

Ndin idahami Abọọñ Andikara andọñ miin,

añyọhọke ye Sịbidịd amọ.

17 Se Abọọñ atañ ado ami,

andufak fiin, Adisana Abasi Isrel:

"Ami ndo Abọọñ Abasi mfo,

u-ukpeebe fiin se ifọn ikan ye afo,

u-utemmeke fiin usʌñ se afo akeme adisaña.

18 Akpekapado afo amaakpañ utọñ anọ mme ewʌhọ mmi,

emem mfo akpeba nte inyañ,

mfọnọñkpọ mfo nte awawa atop ke akpainyañ.

19 Ubon mfo ekpekeba nte ntan isọñ,

nditọ mfo nte ananaibad ñkwa ntan;

awo ikpisọọhọke anyịñ ammọ isio,

awo ikpinyʌññọ isobo ammọ ke iso mmi."

20 Idakka ikpọñ Babilọn,

ifeeñe ikpọñ mbon Babilọn!

Inọ etob ami ye ñkpo idaara

inyʌñ ikwọrọ anye.

Inọ anye aka mme utịd ederimbod;

bo, "Abọọñ afak isʌñutom amọ Yekọb."

21 Ammọ ikikoppo nsaditọñ idaha anye akedatta ammọ usʌñ ke mme akpautatan;

anye amaanam mmọọñ awuọ ke itiad anọ ammọ;

anye amaasiak itiad,

ndin mmọọñ amaatop awuọ.

22 "Emem ibaaha inọ mbon ibak," Abọọñ atañ.