1 Ñkukịd a-abañake Yuda ye Yeruselem ake Aisaiya ayịn Emọs akekịtte ke ini ukara Usaiya, Yọtam, Ahas ye Hesikaiya, mme ndidem ke Yuda.

2 Iñkop miin, ndufo mme hefịn! Unadod, ikpañ utọñ!

Sia Abọọñ atañ ikọ:

"Ami ñkebọọk nditọ ñnyʌñ ñkama ammọ,

ado ammọ ekappa esọñ iwuod ye ami.

3 Ekamba ayaaraenañ adiọọñọ eteufọk amọ,

dọñki adiọọñọ itie usịnudia ufene andinie anye,

ado Isrel idiọọñọke,

inwañake mbon mmi."

4 Adọdiọọk anọ idịd idiọọkñkpọ,

mbon i-idiọọkñkpọ ammọ akponno,

eboho mme anamidiọọk,

nditọ e-emaekeyaak enọ mbiara!

Ammọ etịmme ekpọñ Abọọñ;

ammọ esịn Adisana Abasi Isrel ke ndek

enyʌñ ekanna edem ammọ ewọt anye.

5 Ntak ekpesʌkkọ ekaiso umia fiin-e?

Nsoo inam asʌk akaiso ke nsọñiwuod?

Afịd iwuod mfo anieñe unan,

afịd esịd mfo anieñe unọmọ.

6 Atọọñọ ke esịd ekaikpad mfo tutu asịm atịñ iwuod mfo

nsọñidem ibaaha,

sʌk mme unan ye mbọnikpa ikpọọñ

ye mme anainwañ inia ebañña,

a-awo imiikwokkoke imiinyʌññọ ibọp ke afọñ

me adikama adan ọlif nsọbọ.

7 Idịd mfo awuudo,

ikañ amaata mme abio mfo;

mme isenawo enịm inwañ mfo anaan

ke iso mfo, enam ado ñwuudo nte naña mme isenawo ekpekan ubọk ebọ.

8 E-edakka ekpọñ adiaha Saiyọn

nte idak mfuudo ke inwañ fain,

nte atayad ke inwañ kukumba,

nte abio se iduọ ke ubọk ndiọi awo.

9 Imiikpidooho Abọọñ Andikponñkan

akeyaak nsʌhọ ubon anịm inọọ ñnyịn,

ñnyịn ikpikiba nte Sọdọm,

ñnyịn ikpikiba nte Komora.

10 Ikop ikọ Abọọñ,

ndufo mme andikara Sọdọm;

ikpañ utọñ ikop item Abasi,

ndufo mbon Komora!

11 "Mme uwak uwa ndufo,

nsoo ke ammọ edo ennọọ miin?"

Abọọñ atañ.

Ami mmenie ufọfọb uwa e-ewakka ekem,

ake akukịmedọñ ye akpọñ ukọkʌk unam e-enieghe isek;

Ami ñkoppo inemesịd

ke iyiib ñyaaraenañ ye mme ñyịn edọñ ye mme ebod.

12 Ndufo emaedi ke iso mmi,

anie iyem ñkpọ ami ito ndufo,

mme ndutịme ami ke mme esob mmi?

13 Itre adiben mme enọ i-imiiwuọhọ idi!

Insensi ndufo ado mbubiam ke iso mmi.

Mme Ufa Afiọñ, mme Sabad ye mme Mbono.

Ami ñkanna ñyọ mme mboho ndufo i-imiifọnnọ usʌñ.

14 Mme usọrọ Ufa Afiọñ ndufo ye mme ini usọrọ e-emekke enịm

ami mmesua ammọ ke afịd uwem mmi.

Ammọ e-ekappa edo mbiomo ennọ miin;

Ami mmekpa mba adibiom ammọ.

15 Ndufo emaetat ubọk ebọñ akam,

ami ndịp anyen mmi ibaha ndufo;

akọm ebọñ uwak akam,

ami ñkpañña utọñ.

Ubọk ndufo ayọhọ ye iyiib!

16 Iyie inyʌñ inam idem ndufo asana.

Iben ndiọi adinam ndufo insio miin ke iso;

itre adinam se idiọọk.

17 Ikpeep adinam eti; iyem unen.

Ibọọrọ ikọ inọ mbon se efiik.

Ibere ye nditọakpa;

ibere ye mme ebekpa ke ikpe.

18 "Idi idahami, yak ñnyịn ikpe ikọ ami ibiere,"

Abọọñ atañ.

"Akpekọm ndiọiñkpọ ndufo ekpeba nte iduod,

ammọ eyaesana nte sino;

akpekọm ammọ ekpeyiibe nte anya,

ammọ eyaeba nte idededọñ.

19 Adieke ndufo enyịmmeke enyʌñ ekop item,

ndufo eyaedia mme nti ñkpọ ke isọñ;

20 ado adieke ndufo esịnne enyʌñ esọñ iwuod,

akañkañ ayaisobo ndufo."

Inua Abọọñ atañ.

21 Se naña abio akpanikọ

akappa ado akpara!

Ini keed anye akeyọhọ ye unen;

adinenido amaasidʌñ ke anye,

ado idahami mme awodawo eyedʌñọ!

22 Mme silfa ndufo ekappa ñkpọ ñkarafañ,

ewaak mmọọñ ke nti ukọd ndufo.

23 Mme adaukara ndufo edo mbon nsọñiwuod;

edo nsaña mbon inọ;

afịd ammọ ema ubọkedem

enyʌñ efeghe ebịne mme enọ.

Ammọ ikpemeke unen nditọakpa;

ikpe mme ebekpa inyʌññọ idi ke iso ammọ.

24 Ke ntoro Abọọñ, Abọọñ Andikponñkan,

Akpọsọñ Abasi Isrel, anọ uyio:

"Sai! Ami ñyaanwañña iyadesịd mmi ndot mme asua mmi

ñnyʌñ nsio usiene ke iwuod mme asua mmi.

25 Ami ñyaakanna ubọk mmi inʌmọ ndufo*;

Ami ñyaanyʌñ ñyet ñkarafañ ndufo ndaara nsio afịd-afịd

ñnyʌñ nsio afịd mme ndek ndufo.

26 Ami ñyaamaana ndịppe mbọọñ ndufo ndot naña akesiba ke mme usen edem,

mme adaukara ndufo nte naña akesiba ke ntọọñọ.

Amaakweeñe ke ado eyaikoot ndufo

Abio Adinenido,

Abio Akpanikọ."

27 Eyaefak Saiyọn ke unen,

mme atua ñkpọfiọk ke atu amọ ye adinenido.

28 Ado eyaebʌñ mbon nsọñiwuod ye mme anamidiọọk,

ñko mbon esịnne Abọọñ eyaesobo.

29 "Abuud ayaimʌm ndufo abaña mme ndisana ikpọ afriyo

a-ndufo enemme esịd ebaña;

ndufo eyaedia abuud ebaña mme inwañ

a-ndufo emekke.

30 Ndufo eyaeba nte ekamba afriyo ye ñyeeme mfañ,

nte inwañ a-mmọọñ imiibaaha.

31 Uko awodeen adiibit ikañ emuum

utom amọ nte ndubekikañ;

naña iba ediisak keed,

ndin awo ndomokeed idiikanna inịme ikañ ado."