* 1 Ado mfʌhọ idiibaaha aba inọ mbon e-ekebaaha ke nnananyen. Ke usen edem anye amaasuuhọ isọñ Sebulọn ye Naftali, ado ke ini iso anye ayaadịppe Kalili ake mme idịd ke Usʌñ Akpainyañ, ke edem Yọdan.

2 Mbon awo e-esañake ke ekịm

e-ekịt ekamba unwana;

amaado mbon e-edʌññọ ke isọñ abedeñ ekịm

unwana a-ayamma anọ ammọ.

3 Afo amenam idịd atara

anyʌñ anam idadesịd ammọ ayọhọ;

ammọ edaara ke iso mfo

kpa naña mbon awo edaara ebaña idọk,

kpa naña mbon ekọñ edaara

ke ini ammọ edeemeke mbịme ñkpọ.

4 Sia kpa naña akedo ke usen e-ekekanna Mbon Midian,

ndufo emeboom

mbiomo a-akekakka ammọ,

akpọnọ a-akekọñọke ammọ ke afara,

adọọn mbon e-ekefiighe ammọ.

5 Afịd ikpaukod mbon ekọñ ekekamake ke ekọñ

ye afịd afọñ se ekewere ke iyiib

ado se ediifọfọp

ammọ ñko ediido adan enọ ikañ.

6 Sia ayịn amana inọ ñnyịn,

i-inọ ñnyịn ayịn,

ukara ayaadoro anye ke afara.

Ndin eyaekoot anye

Utịbe Anọitem, Akpọsọñ Abasi,

Nsi-nsi Ete, Abọọñ Emem.

7 Ke akpọsọñ ukara amọ ye emem

utịd idiibaaha.

Anye ayaakara ke ebekpo Defid

ye ke abioubọọñ amọ,

asiak anyʌñ asọọñọ amʌm anye akama

ke unen ye ke adinenido

tọọñọ ke ini ado tutu ke nsi-nsi.

Akpọsọñ ima e-enieghe enọ Abọọñ Andikponñkan

ayaanam ami awuọ asu.

8 Abọọñ a-anọ etob a-abañake Yekọb;

anye ayaadoro Isrel ke idem.

9 Afịd awo eyaediọọñọ anye,

Ifrem ye afịd mbon se idʌñ ke Sameria,

e-etañña ye ntañidem

ye ñkokkoidem ke esịd,

10 "Mme itiad ubọbufọk eduọññọ ke isọñ,

ado ñnyịn iyaikama udọdiọñ itiad imaana ibọp;

emaekek mme eto fik,

ado ñnyịn iyaikama sida ikpʌhọ ke itie ammọ."

11 Ado Abọọñ asọọñọ mme asua Resịn idem abaña ammọ,

anyʌñ adịppe mme asua ammọ nduduai ke idem.

12 Mbon Aram ke edem usakkautịn ye mbon Filistia ke edem usobutịn

enwañña inua eben Isrel emen.

Ado kpa ye ado, iyadesịd amọ itịmmeke edem,

ubọk amọ ñko asʌk adedịppe ke anyọñ.

13 Ado mme awo itịmmeke ibịne ansikimia ammọ,

ammọ ñko inyʌññọ iyem Abọọñ Andikponñkan.

14 Ke ntoro Abọọñ ayaakpịkke iwuod ye isịm asio ke Isrel,

ndak ayob ye ñnyanyaha ke usen keed;

15 mme ñkpisọñ ye mme awuọiso awo edo mme iwuod,

mme prọfed e-ekpeebe nsu edo isịm.

16 Mbon e-ekpemeke idịd ami e-etịn ammọ usʌñ,

enyʌñ etịn mbon e-ekpemekekpeme usʌñ ñko.

17 Ke ntoro Abọọñ idiikoppo inemesịd ye ñkparawa,

anye ñko idiinieghe mbọm ibaña nditọakpa ye mme ebekpa,

sia afịd awo edo ibak ye mbon se imiikponoke Abasi,

afịd inua etañ atịme.

Ado kpa ye ado, iyadesịd amọ iwọññọke edem,

ubọk amọ ñko asʌk adedịppe ke anyọñ.

18 Ke akpanikọ ibak asak nte ikañ;

anye atata mbaraekpe ye ñkukịm,

akpọsọñ inuaikañ atata esịd akai,

anam nsʌñikañ amọ awere adọọk anyọñ nte adaaha.

19 Ke iyadesịd Abọọñ Andikponñkan

eyaefọp isọñ

mme awo ñko ediiba nte adan ikañ enọ ikañ;

ammọ idiisaanake emọ-emọ iyaak.

20 Ke ubọk nnasia, ammọ eyaeta,

ado esʌk ekop abiọọñ;

ke ubọk ufiin, ammọ eyaedia

ado ikoppo uyʌkkọ.

Ammọ keedekeed eyaedia eto abʌk nditọ ammọ.

21 Manase ayaadia ato Ifrem, Ifrem ñko ayaadia ato Manase;

ammọ mba eyaediana ekanna enwana ye Yuda.

Ado kpa ye ado, iyadesịd amọ iwọññọke ikpọñ,

ubọk amọ ñko asʌk adedịppe ke anyọñ.