1 Abọọñ, afo ado Abasi mmi;

ami ñyaudịppe fiin ke anyọñ ñnyʌñ ntooro anyịñ mfo,

sia ke ataa akpanikọ

afo amenam mme utịbe ñkpọ,

mme ñkpọ ekeduakka ebaña ke anyan ini.

2 Afo amenam abio aba nte ifịm mbio,

akpọsọñ abio akappa nsobo,

akpọsọñ abio isenawo ibaaha aba;

awo idiimaanake ibọp anye aba.

3 Ke ntoro mme ñkpọsọñ awo eyaukpono fiin;

mme abio afai idịd eyaubaak fiin.

4 Afo ado itie udịbe anọ mme uweene,

itie udịbe anọ mbon eyemme unwam ke ini unọmọ, ado

itieidʌñ ke ini ayobio

ye idak ndeeñ ke ini ufiob.

Sia ibifịk awo afai

aba nte afịm ayobio amia ndibene

5 ye nte ufiob ke akpautatan.

Afo ametre uyom isenawo;

nte naña ekama ndedeñ ntọñanyọñ esuuhọ ufiob,

ntoro ke ikwọ mbon afai adop.

6 Ke ekamba anyọñ abod ami Abọọñ Andikponñkan ayaanam

usọrọ nti ndidia anọ afịd mbon awo,

usọrọ e-ekamake nti ukọd,

mme unam se ifọn ikan ye mme ukọd se inekke ifọn ikan.

7 Ke ekamba abod ami anye ayaabiat

afọñ ñkpa a-afʌkkọ afịd mbon awo,

ye afọñ a-afʌkkọ afịd mme idịd;

8 anye ayaaben ñkpa afep ke nsi-nsi.

Abọọñ Andikara ayaakwokko mmọọñayịd

ke iso afịd awo;

anye ayaaben abuud afep ke atu ikọd amọ

ke afịd ederimbod.

Abọọñ atañ.

9 Ke usen ado ammọ eyaebo,

"Ke akpanikọ anyem ado Abasi ñnyịn;

ñnyịn ikibuọt idem ye anye, anye akenyʌñ inyaaña ñnyịn.

Anyem ado Abọọñ, ñnyịn imainịm anye ke akpanikọ;

yak ñnyịn idaara inyʌñ inem esịd ke adinyaaña amọ."

10 Ubọk Abọọñ ayaadoro ke ekamba abod ami;

ado eyaesọnnọ Mọb ke isọñ ammọ

naña esọnnọ ñnyanyaha ke itie uduọñọ mbio.

11 Ammọ eyaenyan ubọk ammọ do,

naña mbon ewọk enyanna ubọk ammọ idaha ewọkkọ ewọk.

Abasi ayaasuuhọ ntañidem ammọ,

iseeghe mbufiọk ubọk ammọ.

12 Anye ayaawuut mme ikpọ ñkoñ-ñkoñ ndibene ndufo

anyʌñ asuuhọ ammọ anịm;

anye ayaanịm ammọ ke isọñ,

kpa ke ataa ntọñ isọñ.