1 Gyisɛse dendɛle wiele la, ɔmaanle ɔ nye zo anwuma na ɔzele kɛ, "Egya, mekɛ ne ɛdwu. Wula ɛ Ra ne anyunlunyia maa ɔlua zo ɔla wɔ anyunlunyia ne ali. 2 Ɔboalekɛ, wɔmaa ye tumi wɔ mrenyia nee mraalɛ mɔɔ wɔ ewiade la amuala anwo zo. Yemɔ a maa awie biala mɔɔ wɔva wɔmaa ye la ngoane mɔɔ ɔnlɛ awieleɛ la a. 3 Na adenle mɔɔ bɛfa zo bɛnyia zɛhae damɛnlangoate ngoane ne la a le kɛ bɛkɛnwu wɔ, kɛ wɔmɔ a ɛle nɔhalɛ Nyamenle kotokokye ne a, na eza bɛkɛnwu kɛ ɛdawɔ a ɛzoanle Gyisɛse Kelaese wɔ azɛlɛ ye azo a. 4 Memaanle wɔ anyunlunyia wɔ azɛlɛ ye azo, ɔluakɛ menyɛle debie biala mɔɔ ɛzele me kɛ menyɛ la. 5 Egya, akee wula me anyunlunyia kɛkala wɔ mekɛ mɔɔ megyi ɛ nyunlu ɛke la, anyunlunyia ne mɔɔ ewiade mɔlebɛbo ne ɛnee yɛ mu nwiɔ, yɛlɛ la.

6 "Mela wɔ duma ne ali mehile menli mɔɔ ɛyele bɛ wɔ ewiade anu ɛmaanle me la. Nɔhalɛ nu, ɛnee bɛle wɔ deɛ dahuu, yɛɛ ɛvale bɛ ɛmaanle me a; yɛɛ bɛli wɔ mɛla ne azo noko. 7 Kɛkala noko bɛnwu kɛ, debie biala mɔɔ melɛ ye la le ahyɛlɛdeɛ mɔɔ vi wɔ ɛkɛ ne a. 8 Ɔluakɛ mɛla ne mɔɔ ɛvale ɛmaanle me la, medame noko meva bɛ muala memaa bɛ, yɛɛ bɛdabɛ noko bɛzɔ nu dwaa, na bɛnwu kɛ amgba mevi wɔ lɔ a membale azɛlɛ ye azo a, na eza bɛlie bɛli kɛ ɛdawɔ a ɛzoanle me a.

9 "Menzɛlɛ memmaa ewiade amra amuala, mesɛlɛ memaa bɛdabɛ mɔɔ wɔva bɛ wɔmaa me la, ɔluakɛ bɛmɛ bɛle wɔ deɛ. 10 Kɛmɔ bɛ muala noko bɛle me deɛ la ati, bɛle wɔ deɛ; na ɛdawɔ a wɔva bɛ wɔboka wɔ ninyɛne muala anwo wɔwula me sa nu a, ɛhye ati bɛle me anyunlunyia! 11 Kɛkala mɔ melɛgyakyi bɛ wɔ ewiade anu meara ɛ nwo lɔ. Ɛhye ati Egya Nwuanzanwuanza, fa bɛdabɛ mɔɔ wɔva bɛ wɔmaa me la amuala sie, ammaa biala amminli, na emomu bɛabɔ nu bɛaye ko, kɛmɔ yɛdayɛ yɛle ko la. 12 Mekɛ mɔɔ mewɔ azɛlɛ ye azo la, meneanle ɛhye mɔ mɔɔ ɛvale ɛmaanle me la amuala anwo zo, ɔti biala amminli, kyesɛ abɔnsam ralɛ ne, kɛmɔ Ngɛlɛlera ne hanle dole ɛkɛ ne la.

13 "Kɛkala mɔ, meleba ɛ nwo lɔ. Meha ninyɛne dɔɔnwo mehile bɛ wɔ melɛ mɔɔ ɛnee me nee bɛ de la, amaa me fɛlɛko ayi bɛ tɛkɛɛ. 14 Meva wɔ edwɛkɛ ne memaa bɛ, ɔlua zo ewiade kpɔ bɛ, kɛmɔ bɛnvi ewiade na medame noko menvi ewiade la. 15 Tɛ mɔɔ asɛɛ mesɛlɛ wɔ amaa wɔaye bɛ wɔavi ewiade anu ɔ, na amomu amaa wɔabɔ bɛ nwo bane wɔavi Abɔnsam asa anu. 16 Kɛmɔ memboka ewiade anwo la, zɔhane ala a bɛdabɛ noko bɛmboka ewiade ne anwo a. 17 Te bɛ nwo wɔ nɔhalɛ nu, na kilehile bɛ amaa bɛ nwo ade ayɛ nwuanzanwuanza. 18 Kɛmɔ ɛzoanle me wɔ ewiade anu la, zɔhane ala a melɛsoa bɛdabɛ noko wɔ ewiade anu a. 19 Na amaa bɛanyi wɔ nɔhalɛ nee nwuanzanwuanzayɛlɛ nu la ati, dahuu mete me nwo mefi ɛtane nwo.

20 "Tɛ ɛhye mɔ angome a mesɛlɛ meamaa bɛ a, na emomu awie biala noko mɔɔ kɛlua bɛ daselɛlilɛ ne azo kɛra me ɛkɛ la boka nwo, 21 amaa bɛ muala bɛabɔ nu bɛayɛ ko; kɛmɔ ɛdawɔ Egya ne ɛde me nu, na medame noko mede wɔ nu la, amaa bɛdabɛ noko bɛadɛnla yɛ nu, na ewiade alie ali kɛ wɔmɔ a ɛzoanle me a.

22 "Meva koyɛlɛ anyunlunyia ne mɔɔ ɛvale ɛmaanle me la memaa bɛ, 23 amaa meadɛnla bɛ nu, na ɛdawɔ noko wɔadɛnla me nu, na yɛ muala yɛayɛ ko ɔlua zo ewiade anwu kɛ ɛdawɔ a ɛzoanle me a, na eza bɛade ɔ bo kɛ ɛkulo bɛ, kɛmɔ ɛkulo me la. 24 Egya, mekulo kɛ mɔɔ wɔva bɛ wɔmaa me la nee me tɛnla, amaa bɛanwu me anyunlunyia ne mɔɔ ɔlua ɛhulolɛ zo ɛvale ɛmaanle me kolaa na ewiade abɔ ɔ bo la.

25 "O Egya tenlenenli, ewiade ɛnze wɔ, noko mame meze wɔ; yɛɛ ɛdoavolɛma ɛhye mɔ noko ze kɛ ɛdawɔ a ɛzoanle me a. 26 Mela wɔ ali mehile bɛ, na mebahɔ zo meala wɔ ali meahile bɛ noko, amaa ɛhulolɛ bedivinli ne mɔɔ ɛlɛ ye wɔ me nwo la adɛnla bɛ nu, na medame noko meadɛnla bɛ nu."