1 Ami emi ndide owo ñkpọkọbi ke ntak edinam ñkpọ nnọ Ọbọñ, mekpe mbufo ubọk nte yak edu uwem emi ọdọkde akada ke idaha emi Abasi enimde ke ini emi Enye okokotde mbufo. 2 Esuhọde idem, enyene emem emem ido, enyuñ enyene ime kpukpru ini. Ewut ima mbufo ke ndinọ kiet eken uñwam. 3 Edomo ukeme mbufo ndikpeme edidiana ọtọ kiet emi Edisana Spirit ọnọde, oto ke emem emi ọbọpde mbufo adian ọtọ kiet.
Ñnyin Kiet Kiet Imenyene Asaña Asaña Ukeme
4 Ikpọkidem kiet ye Spirit kiet odu, ukem nte ekenyuñ ekotde mbufo esin ke idorenyin kiet, ke ini Abasi okokotde mbufo. 5 Ọbọñ kiet odu, ye mbuọtidem kiet, ye babtisim kiet; 6 Abasi kiet odu, emi edide Ete kpukpru owo, emi edide Ọbọñ kpukpru ñkpọ, emi anamde ñkpọ ebe ke kpukpru ñkpọ, onyuñ odude ke kpukpru ñkpọ. 7 Enọ ñnyin kiet kiet asaña asaña enọ, nte Kraist abaharede obon.
8 Kpa nte ikọ Abasi ọdọhọde, ete, "Ke ini emi Enye ọkọdọkde ke ata enyọñ, Enye ama ada mme mbuot ekọñ ọdọk; Enye ama onyuñ ọnọ mme owo mme enọ" 9 Ke emi, nso ke, "Enye ama ọdọk ke enyọñ" ọwọrọ? Emi ọwọrọ ete ke akpa itie Enye ama ọsuhọde edi, oro edi, ọsuhọde edi ke ata idak isọñ ererimbot. 10 Ke ntre, kpa Enyemi ọkọsuhọrede edi, edi Enye ọkọdọk ke enyọñ ebe mme enyọñ, man Enye ọyọhọ enyọñ ye isọñ ye iso Esie.
11 Edi Enye ọkọnọ mme owo enọ, Enye ama emek ubak owo ndidi mme Ọbọsuru, ndusuk ndidi mme Asiak Uduak Abasi, ndusuk, mme ọkwọrọ ikọ, ndusuk ndidi mme ekpeme erọñ, ye mme andikpep.
12 Enye akanam emi man ebeñe kpukpru ikọt Abasi idem ọnọ utom Obio Ubọñ Abasi, man ebọp ikpọkidem Kraist.