1 पतरास 5

टोलीए सैणैं अर ज़ुआन मणछा लै समाद

1 धख आसा होर गल्‍ला बी ज़ुंण हुंह तम्हां तिधे टोलीए सैणैं लै च़ाहा बोल़णअ किल्हैकि हुंह बी आसा तम्हां ई ज़िहअ सैणअ। मंऐं भाल़ै तिंयां दाह-दुख आपणीं आछी ज़ुंण मसीहा खास्सी साला पैहलै भेटै। ज़ेभै सह भिई फिरी एछणअ, हुंबी हणअ तेऊए प्रतप्पा दी साझ़ू ज़ेभै सह सारै संसारा लै प्रगट हणअ। थारअ संघी सैणअ हणें साबै करा हुंह तम्हां का अरज़ कि

2 ज़िहअ एक फुआल आपणीं भेडा हेरअ-भाल़अ रहा लागी, तम्हैं बी रहा तिन्‍नां हेरै-भाल़ै लागी ज़ुंण परमेशरै तम्हां का आसा सभाल़ै दै। एता करा दिला का किल्हैकि परमेशर च़ाहा इहअ ई कि तम्हैं करे। इहअ निं सिधअ तै करा कि तम्हां लै बोलअ कुंणी ज़बरदस्ती विश्वासीए हेर-सभाल़ करना लै। एऊ कामां निं एते तैणीं करा कि तम्हां लै कुंण ढब्बै दैए पर थारै दिलै लोल़ी असली दी परमेशरे अर लोगे च़ाकरी करने च़ाहा हुई। 3 ज़ुंण लोग तम्हां का सभाल़ै दै आसा, इहअ निं समझ़ा कि तिन्‍नां प्रैंदै आसा थारअ राज़, पर तम्हैं करा एही च़ाकरी कि तिंयां तम्हां का शिखल़े।