दानिएल 10

दजला गाडे बारै सुपनअ

1 फारस देशै बणअ कुस्रू माहा राज़अ। तेऊए राज़ा दी चिऊथी साला किई परमेशरै दानिएला का धैनै-सुपनै एक गल्‍ल प्रगट। दानिएला नाअं त बेलतेशर बी। सह ती शुची गल्‍ल अर एही कि आजू हणअ एक घोर जुध। दानिएला हुअ एक सुपनअ अर तेता करै आई तेऊ सह गल्‍ल समझ़। 2 दानिएलै आसा तिन्‍नां धैल़ै तेते बारै इहअ लिखी डाहअ द:

"हुंह त तिन्‍नां धैल़ै चिई हबतै तैणीं शोग करदअ बेठअ द। 3 मंऐं नां खास भोज़ खाअ, नां शिखा खाई अर नां दाखो रस झुटअ। ज़ेभै तैणीं चअन हबतै निं बितै, तेभै तैणीं निं मंऐं घेरी अर मुंडै तेल बी मल़अ।

4 "तैहा साल च़ौबी च़ैत्रै त हुंह दजला नाओंए दरैऊए बाढै खल़्हुअ द। 5 हुंह लागअ उझै भाल़अ अर मुखा शुझुअ इहअ कि तेऊ आसा बाछे झिकल़ै अर कुछी आसा च़ोखै उपाज़ देशे च़ोखै सुन्‍नैं करै बणाईं दी गाची बान्हीं दी।✝10:5 प्रका. 1:13-15; 2:18; 19:12 6 तेऊए देही ती पेरोज़ नाओंए किम्मती मणीं ज़ेही। तेऊए मुंहां का थिअ धुप्पै ज़िहअ झ़ामण लागअ द। तेऊए आछी ती ज़ल़दी आगी ज़ेही। तेऊए ज़ांघा-बाहा ती कांस्सै ज़ेही। गल्‍ला करदअ ज़ाण्हिंआं त सह इहअ कि खास्सै लोग आसा ज़ोरै-ज़ोरै हाल्‍लै पांदै लागै दै।✝10:6 प्रका. 1:14

7 "ईंयां गल्‍ला शुझुई धैनै-सुपनै सिधी मुंह दानिएला का। तिधी मुंह संघै ज़ुंण होर मणछ थिऐ, तिन्‍नां का निं इहअ किछ़ शुझुअ। पर तिन्‍नां छ़ुटी डरै काम्मणीं अर तिंयां ठुर्है तिधा का दूर संघा रहै किधी लुक्‍की। 8 खिरी रहअ हुंह एऊ महान धैनै-सुपनै भाल़अ एक्‍कै। मुंह निं आप्पू बी तराण ई रहै, मेरी बधल़ूई मुंहाशण एही कि मुंह निं कुंण बछ़ैणीं सकदअ त। 9 ज़ांऊं मुखा तेऊ मणछो बैण शुण्हुंअ, हुंह बधल़ुअ धरनीं उटी बाखा अर मुंह निं होश-बाश ई रही। 10 तेखअ छ़ुंहंअ हुंह कुंण हाथा करै संघा बशैल़अ हुंह मेरै हाथ अर ज़ान्हूंए बला दी। मुंह ती हाथै अर ज़ान्हूं दी काम्मणीं छ़ुटी दी।

11 "तेऊ स्वर्ग दूतै बोलअ मुल्है इहअ, ‘भाई दानिएल, परमेशर झ़ूरा ताल्है खास्सअ। खल़अ उझ़ू संघा शुण मेरी गल्‍ला धैन दैई ज़ुंण मंऐं ताखा खोज़ी लाई। हुंह आसा ताह सेटा लै छ़ाडअ द।’ ज़ांऊं तेऊए इना गल्‍ला बाद हुंह खल़अ, उझ़ुअ, पर हुंह त तज़ी बी काम्बदअ लागअ द।

12 "तेखअ बोलअ तेऊ मुल्है इहअ, ‘दानिएल, तूह निं डरै आथी। ज़धू पैहली धैल़ी तूह सोर-समझ़ मांगणा लै परमेशरा सेटा अरज़ करदअ लागअ अर सोभै गल्‍ला आपणैं परमेशरा का सभाल़ी, तधू ई हेरी तेरी अरज़ स्वर्गै शूणीं। हुंह आसा तेतो ज़बाब दैंदअ आअ द। 13 फारसी राज़ा प्रैंदै राज़ करनै आल़ै स्वर्ग दूतै डाहअ हुंह इक्‍की धैल़ै तैणीं रोक्‍की, तै निं हुंह तधू एछी सकअ। तेखअ आअ मिकाईल ज़ुंण परमेशरे प्रधान स्वर्ग दूता मांझ़ै एक आसा, तेऊ किई मेरी मज़त अर सह आसा मंऐं फारसी राज़ा प्रैंदै राज़ करनै आल़ै स्वर्ग दूता संघै मकाबलै करदअ तिधी डाहअ द।✝10:13 प्रका. 12:7 14 हुंह आअ ताखा तिन्‍नां गल्‍ला समझ़ाऊंदअ ज़ुंण तेरै लोगा लै आजू हणीं। ज़ुंण ताखा धैनै-सुपनै शुझुअ, तिंयां गल्‍ला आसा ज़ुंण आजू हणीं।’

15 "ज़ेभै तेऊ ईंयां गल्‍ला बोली, मंऐं किअ उंधै उटअ मूंड संघा रहअ च़ुप्पी खल़्हुई। 16 सह स्वर्ग दूत ज़ुंण हेरनअ मणछा ज़िहअ आसा थिअ, तेऊ छ़ुंहैं मेरै होठ। तेखअ बोलअ मंऐं तेऊ लै, ‘मालक, एऊ धैनै-सुपनै करै हुअ हुंह खास्सअ दुबल़अ, हुंह आसा एता का खास्सअ डरअ द। 17 हुंह आसा गलामा ज़िहअ ज़ुंण आपणैं मालका सेटा आसा खल़्हुअ द। हुंह किहअ करै सका ताह संघै गल्‍ला करी? मुंह निं नां मुंह एतरअ ज़ोर आथी रहअ द अर नां एतरअ शाह आथी रहअ द।’

18 "सह ज़ुंण मणछा ज़िहअ शुझिआ त, तेऊ छ़ुंहंअ हुंह भिई, तेखअ आई मुंह धख तनक। 19 तेऊ बोलअ इहअ, ‘परमेशर झ़ूरा ताल्है खास्सअ, तूह निं किछ़ी गल्‍ला का डरी नां हैअ चोल़ी।’

"ज़ांऊं तेऊ इहअ बोलअ, मुखा ज़ाण्हुंअ आप्पू दी कि मुंह फिरै तराण। तेखअ बोलअ मंऐं तेऊ लै, ‘मालक, ऐबै खोज़ मुखा, तूह किज़ै बोला। तंऐं हेरै मुंह दी भिई तराण पाई।’✝10:19 ईशा. 41:10

20,21 "तेऊ बोलअ इहअ, ‘हुंह खोज़ूं ताखा कि हुंह ताह सेटा लै किज़ू आसा आअ द। तिंयां गल्‍ला बी समझ़ाऊंणी मुंह ताखा बाढै ज़ुंण परमेशरे सत्ते कताबा दी आसा लिखी दी। पर एभै हुअ मुंह फारसी राज़ा प्रैंदै राज़ करनै आल़ै स्वर्ग दूता संघै जुधा करदै बापस डेऊणअ। तेऊ का ज़िती करै निखल़णअ यूनानी राज़ा प्रैंदै राज़ करनै आल़अ स्वर्ग दूत, तेता लै सका मेरी मज़त सिधअ मिकाईल करी ज़ुंणीं तेरै लोगे फाज़त करा। तेऊ का सुआई निं तिधी मुंह संघै परमेशरे दुशमणा संघै मकाबलै करदअ कोह आथी।’"