1 एऊ संसारै शुझुई मुखा एक एही बूरी गल्‍ल, सह आसा मणछा लै आफ़त। 2 बिधाता दैआ कई मणछा लै बेघै खास्सी ज़ैदात, अदर अर ज़िहअ तिन्‍नों दिल बोला तिहअ ई, पर आप्पू निं तिन्‍नां तेता का सुख भेटदअ! आप्पू जाआ तिंयां मरी अर सह हआ होरीओ भलअ! अह बी आसा बृथा अर बेघै बूरी गल्‍ल। 3 ज़ै कहा मणछे शौ शोहरू बी होए अर सह खास्सी अमरा ज़िऊए, पर ज़ै सारी अमरा तेऊओ दिल दुखी ई होए अर खिरी तेऊए क्रिया-कर्म बी राम्बल़ै करै नांईं होए एता का आसा माए ओदरा ई का मूंऐं दै पैईदा हणअ भलअ! 4,5 किल्हैकि तेऊ लान्हैं नां धुप्पअ भाल़णअ अर नां तेऊ किज़ै नाअं पल़णअ, सह जाणअ तेता का आजी न्हैरै संसारा लै डेऊई, पर तेऊ लान्हैं भेटणअ तेऊ का खास्सअ राम 6 ज़ुंणी दूई हज़ार साला ज़िऊई बी सारी अमरा राज्ज़ी-मौज़ी निं रही सकअ, तेतो किज़ै फाईदअ? खिरी डेऊणैं, सोभै एकी ई ज़ैगा!

7 मणछ करा सारी मैन्थ आपणैं पेटे तैणीं, पर रज़दै निं कधि! 8 ज़ुंण खास्सअ अक्ली आल़अ आसा, सह बी निं कोही गल्‍ला दी ऐडै का आजू आथी। नां दाल़जी मणछा भली ज़िन्दगी ज़िऊंणेंओ ज्ञैन हंदी किछ़ै पुआज़अ भेटदअ। 9 अह आसा बृथा, ज़िहअ बागरी पिछ़ू पल़णअ बृथा हआ। कबल्‍ली होर-होर च़िज़े च़ाह डाहणैं का आसा तेथ दी खुश रहणअ भलअ ज़ुंण आप्पू का आसा।

10 ज़ुंण बी हुअ, तेतो नाअं आसा जूग शुरू हणैं का आजी पल़ी गअ द, हाम्हां मणछा का आसा थोघ कि सह ज़ुंण हाम्हां का खास्सअ बलबान आसा, तेऊ संघै निं हाम्हैं हठ करी सकदै। 11 मणछ ज़ेतरी खास्सी हठ करा, सह हआ तेतरी ई बृथा, तेखअ तेता करै किज़ै भलअ हआ? ज़ाथी निं किछ़! 12 ज़िन्दगी आसा धख ई ज़ेही अर बृथा, अह हणीं छ़ैल्‍ली ज़ेही खतम। इहअ थोघ निं कोही का आथी कि तेऊ लै किज़ै आसा भलअ अर इहअ थोघ कहा का हआ कि तेऊ मणछा मरनै बाद आजू संसारै किज़ै हणअ।