एस्तेर 3

हमान च़ाहा त यहूदी पठी बरैबाद करनअ

1 थोल़ै धैल़ै बाद बणाअं क्षयर्ष राज़ै आपणअ हमान नाओं बज़ीर प्रधान मंत्री। हमान त आगागे आद-लुआदा मांझ़ै हमदातो शोहरू। 2 राज़ै किअ सोभी दरवाणा लै हुकम ज़ारी कि तिंयां करै ज़ान्हूंए बला दी बेठी उटअ मूंड करी हमानो अदर करी। तिन्‍नैं बी किअ तिहअ ई पर मुर्दकाई निं तिन्‍नां होरी ज़िहअ करी निस्सअ। 3 होर राज़ दरबारे कार-करिंदै अर दुआर पाल लागै मुर्दकाई का पुछ़दै कि तूह किल्है निं राज़ैओ हुकम मंदअ? 4 तिंयां रहै तेऊ लै धैल़ बोल्दै लागी पर तेऊ निं तिन्‍नें एक बी शूणीं अर तेऊ बोलअ तिन्‍नां लै, "हुंह आसा यहूदी अर हुंह निं हमाना सेटा ज़ान्हूंए ज़ोरै बेशी झ़ुकी सकदअ।" तिन्‍नैं खोज़ी खिरी ईंयां सारी गल्‍ला हमाना का इहअ भाल़णा लै कि हमाना मुर्दकाईए एऊ बभारा लै हमाना किज़ै करनअ। 5 ज़ांऊं हमानै भाल़अ कि मुर्दकाई निं तेऊ सेटा ज़ान्हूंए बला दी धरनीं बेशी झ़ुकी करै अदर करदअ, तेऊ आई तेते खास्सी रोश्शै। 6 ज़ांऊं ता लागअ हमाना का इहअ थोघ कि अह आसा यहूदी, तेखअ सोठअ तेऊ इहअ कि एकी मुर्दकाई मारी करै निं किछ़ हणअ, मुंह पाणै हर ज़ैगा का यहूदी मणछ सोभ मारी ज़िधी-ज़िधी क्षयर्ष राज़ैओ राज़ आसा।

7 क्षयर्ष राज़े राज़ा दी बार्हूई साला च़ैत्रै बझ़ैल़ी हमानै परच़ी पाणै कि यहूदीए प्रल़या करने शुरूआत कहा भिन्‍नैं अर कहा धैल़ी पोर्ही हणीं। परच़ी दी निखल़ी बारा फागणे धैल़ी।

8 हमानै बोलअ क्षयर्ष राज़ै का, "माहा राज़अ, ज़ेतरै देशै तेरअ राज़ आसा, तिन्‍नां जैंदरी आसा सारै दी एक ज़ाती छिंघुई दी, तिन्‍नें आसा कै रिती-रबाज़ ई होरी रंगे, तिंयां निं राज़ैओ हुकम तोही मंदै! ज़ै इना इहै ई छ़ाडे, सह निं हाम्हां लै भलअ आथी। 9 माहा राज़अ, ज़ीबाण, तूह कर एक हुकम ज़ारी कि तिंयां पाणै सोभ मारी। ज़ै तूह इहअ करै, तै रही मेरी ज़बान कि मुंह दैणी राज़ दरबारे खज़ानै दी कोई चअन हज़ार सात शौ पज़ाह कुंटल़ च़ंदी पजैल़ी।"

10 राज़ै खोल्ही आपणीं गुंठी का मुंदल़ी ज़ेता करै सरकारी मोहर लाआ तै, संघा दैनी आगागे आद-लुआद हमदाते शोहरू हमाना लै ज़ुंण यहूदीओ बैरी थिअ। 11 राज़ै बोलअ हमाना लै, "सह च़ंदी बी रही तेरी अर तिंयां लोग बी रहै तेरै, तेरअ ज़िहअ दिल बोला, तूह कर तिन्‍नां संघै तिहअ बभार।"

12 तेर्हा च़ैत्रै शादै हमानै राज़े काईथ संघा बझ़ैल़ी सोभी मुल्खे राज़पाला लै तिन्‍नें भाषा अर बोली दी राज़ेए मुंदल़ी करै मोहर लाई क्षयर्ष राज़ेए नाओंऐं च़िठी लिखणैं। 13 तिन्‍नां च़िठी पजैल़ै छ़ाडै हर मुल्खा लै दूत ज़ेथ क्षयर्ष राज़ैओ राज़ थिअ। च़िठी दी थिअ इहअ समाद, "तेर्हा फागणै पाऐ यहूदी मांझ़ै ज़ुआन, बुढल़ै, मर्ध, बेटल़ी अर सोभी शोहरू-माठै संघी सोभी मारी। तिन्‍नां लै निं कोह झींण करी अर तिन्‍नें ज़ैदात लुटै पठी।" 14 ज़ुंण अह हुकम ज़ारी किअ, एते नकल दैनी सोभी मुल्खा लै खुल्ही च़िठी दी ताकि सोभै तैहा धैल़ी लै यहूदी मारदै तैर्हुई रहे।

15 अह हुकम हुअ त राज़धानी शुआ नगरी का ज़ारी, ज़िहअ राज़ै हुकम त किअ द, च़िठी पजैल़णैं आल़ै ठुर्है तेभी ज़ैगै-ज़ैगै सोभी मुल्खा लै। राज़अ क्षयर्ष अर प्रधान मंत्री हमान रहै शराबा झुटदै बेशी अर राज़धानी शुआ त सोभी लोगा जैंदरी हैल़अ-फिकर पल़अ द।