शधाणूं 21

पल़सीओ एरुशलेम नगरी लै डेऊणअ

1 ज़ांऊं हाम्हां तिन्‍नां का बिदा हई ज़हाज़ खोल्हअ, तेखअ पुजै आज़री बात ढाकी हाम्हैं कोआस टापू ज़िधी हाम्हैं ज़हाज़ खल़अ किअ अर दुजै धैल़ै रुदूस टापू अर तिधा का पुजै पतरा टापू अर सह ज़हाज़ त तिधी तैणीं। 2 पतरा नगरी छ़ाडअ हाम्हैं सह ज़हाज़, कुंणी होरी खोज़अ हाम्हां का कि एक ज़हाज़ डेऊणअ इधा का फिनाका नगरी लै। तेखअ बेठै हाम्हैं आजू डेऊणा लै तेऊ ज़हाज़ा दी।

3 ज़ांऊं कुप्रास टापू शुझुअ, सह छ़ाडअ हाम्हैं बाऊंईं बाखा, अर सिरीया मुल्खा बाखा डेऊई होथै हाम्हैं सूर नगरी। किल्हैकि तिधी करनअ त ज़हाज़ो बोझ़ हल़कअ।

4 तिधी किअ हाम्हैं विश्वासी भाईओ थोघ संघा रहै हाम्हैं तिधी सात धैल़ै। पबित्र आत्मां का शूणीं रहै तिंयां भिई-भिई पल़सी लै इहअ बोल्दै लागी कि एरुशलेम नगरी निं डेऊई।

5 ज़ांऊं तिंयां सात धैल़ै पूरै हुऐ, हाम्हैं लागै तिधा का हांढदै, अर बेटल़ी माठै संघी दैनै हाम्हैं नगरी बागै पजैल़ी अर हाम्हैं किई समुंदरे बाढै ज़ान्हूं टेक्‍की करै प्राथणां। 6 तेखअ एकी-दुजै का बिदा हई करै, हाम्हैं, उखल़ै ज़हाज़ा दी अर तिंयां डेऊऐ आपणैं-आपणैं घअरा लै।

7 सूर टापू का पाणींए बात पूरी करी पुजै पतलमिस नगरी। तिधी थिऐ विश्वासी भाई अर तैहा राची रहै हाम्हैं तिन्‍नां संघै तिधी। 8 दुजै धैल़ै आऐ हाम्हैं तिधा का कैसरिया नगरी लै। तिधी रहै हाम्हैं खास्सै धैल़ै फलिप्प खुशीओ समाद प्रच़ार करनै आल़ेए घअरै ज़ुंण तिन्‍नां साता दास मांझ़ै एक त। 9 तेऊए ती च़ार कुंआरी शोहरी तिंयां करा ती आजू हणैं आल़ी गल्‍ला प्रगट।✝21:9 जोए. 2:28

10 ज़ांऊं हाम्हां तिधी खास्सै धैल़ै हुऐ, एक अगबुस नाओं परमेशरो गूर आअ यहूदा मुल्खा का। 11 सह आअ हाम्हां सेटा लै संघा तेऊ पल़सीओ गाचू च़कअ अर आपणैं हाथ खूर बान्हीं बोलअ, "पबित्र आत्मां बोला इहअ, ‘ज़सरअ अह गाचू आसा, सह बान्हणअ एरुशलेम नगरी यहूदी इहअ ई करै, अर सह दैणअ तिन्‍नां होरी ज़ातीए हाथै।’"

12 ज़ांऊं हाम्हैं ईंयां गल्‍ला शूणीं, हाम्हैं सोभी बोला पल़सी लै इहअ, "एरुशलेम नगरी लै निं डेऊई।"

13 पर पल़सी दैनअ ज़बाब, "तम्हैं किल्है लाअ इहअ करी कि रोक्‍की करै लाअ मेरअ मन्‍न चोल़ी। हुंह आसा प्रभू ईशूए नाओंए एरुशलेम नगरी, नां सिधअ बान्हणां लै पर मरना लै बी तैर।" 14 ज़ांऊं तिन्‍नें गल्‍ल तेऊ नांईं मनी, इहअ बोली हुऐ तिंयां च़ुप्पी, "प्रभूए मरज़ी लोल़ी पूरी हुई।"

15 तिन्‍नां धैल़ै बाद डेऊऐ हाम्हैं आपणैं बोझ़ल़ै बान्हीं एरुशलेम नगरी लै। 16 कैसरिया मुल्खा का आऐ कई च़ेल्‍लै हाम्हां संघै, तिन्‍नैं पजैल़ै हाम्हैं मनसोन नाओंए एकी विश्वासीए घअरै। मनसोन आसा त कुप्रास टापू का अर मसीहो पराणअ विश्वासी।

पल़सीए याकबा संघै मुलाकात

17 ज़ांऊं हाम्हैं एरुशलेम पुजै, विश्वासी भाई मिलै हाम्हां संघै बडै नंद अर खुशी-खुशी।

18 दुजै धैल़ै निंयैं पल़सी हाम्हैं याकबा सेटा लै, तिधी थिऐ सोभै विश्वासी टोलीए सैणैं कठा हुऐ दै।

19 तेखअ तेऊ तिन्‍नां लै राज्ज़ी-खुशी दैई ज़ुंण-ज़ुंण काम परमेशरै तेऊए च़ाकरी दी होरी ज़ाती मांझ़ै किऐ, तिंयां खोज़ै एक-एक करी तिन्‍नां सोभी का।

20 ज़ांऊं सैणैं पल़सीए गल्‍ला शूणीं, तिन्‍नैं किई परमेशरे ज़ै-ज़ैकार। तेखअ बोलअ इहअ, "भाई पल़सी, ताखा आसा शुझदअ लागअ द कि, एथ हुऐ खास्सै यहूदी ज़ुंणीं ईशू दी विश्वास किअ। पर तिंयां मना मोसा गूरे बधाना बी तत्त-दिला का। 21 यहूदी शूणअ इहअ कि तूह करा होरी देशै बस्सै दै यहूदी जैंदरी इहअ प्रच़ार कि तिन्‍नां निं मोसा गूरे बधाना मनणे ज़रुरत आथी, नां आपणैं शोहरूओ खतैर करने ज़रुरत आथी अर नां यहूदी रिती-रबाज़ा मनणे ज़रुरत आथी। 22 लोगा का जाणअ थोघ लागी कि तूह आसा इधी आअ द।

23 "तैही ज़ुंण हाम्हैं ताल्है करना लै बोला, तूह कर तिहअ। हाम्हां सेटा आसा इधी च़ार मणछ ज़ुंणी मानत आसा मनी दी। 24 तिन्‍नां संघा निंईं करै कर आप्पू शुचै अर तिन्‍नां लै कर खर्च़अ कि तिंयां आपणअ मुंडन करे, तेखअ लागणअ सोभी का थोघ कि ज़ुंण गल्‍ला तेरै बारै बोली दी आसा, तिंयां आसा झ़ुठी। पर तूह आप्पू बी मना बधान अर तिन्‍नां दी च़ला बी।✝21:24 गण. 6:5,13-18,21

25 "पर तिन्‍नां होरी ज़ातीए बारै ज़ुंणी विश्वास किअ, हाम्हैं दैनअ इहअ फैंसलअ करी तिन्‍नां लै इहअ समाद लिखी कि तिंयां मुहुर्ती लै बल़ी किऐ दै मास्सा अर लोहू का अर गल़ा का मरोक्‍कै दै मास्सा का अर कंज़रैई का रहै दूर।"

26 तेखअ डेऊअ पल़सी दुजै धैल़ै तिन्‍नां होरी संघै परमेशर भबना लै। तिंयां तै बधाने साबै आपणीं शुधी करदै लागै दै, तिधी खोज़अ पल़सी सोभी नदरी कि तिन्‍नें मानत कधू हणीं पूरी ज़हा धैल़ी तिन्‍नां बिधाते भबनै भैंट दैणीं।✝21:26 गण. 6:13-21

भबनै पल़सी ढाकणअ

27 ज़ांऊं सात धैल़ै तै पूरै हणैं आल़ै, एशिया मुल्खे यहूदी पाई पल़सी भबनै भाल़ी एही हाक्‍का-लैल़ा करै संघा ढाकअ तिन्‍नैं, 28 "हे इज़राईली मणछो, मज़त करा, अह आसा सह ई मणछ, ज़ुंण लोगा लै बधान का दूर रहणा लै अर ऐहा पबित्र ज़ैगे खलाफ हर ज़ैगा लोगा का सखाऊआ, इधी तैणीं कि यूनान मुल्खा का ज़ुंण होरी ज़ातीए लोग आसा तिंयां बी आणै एऊ भबना भितरी। ऐबै लागी एऊ भबना बी छ़ोत।"

29 तिन्‍नैं भाल़अ त तेता का आजी पल़सी संघै त्रोफिमस इफिसुस नगरी का आअ द तेऊ संघै नगरी दी, अर तिंयां समझ़ा तै कि पल़सी आणअ सह भबना लै।

30 तेखअ मच़अ सारी एरुशलेम नगरी दी हाल्‍लअ-गोल्‍लअ, अर सोभ लोग आऐ ठुर्ही अर तिधी हुऐ खास्सै मणछ कठा। तिन्‍नैं आणअ पल़सी भबना का ढाकी करै नगरी बागा लै अर प्रऊल़ किई तेभी बंद। 31 ज़ांऊं तिन्‍नैं पल़सी मारी लाअ त पाई, सपाही दले सरदारा का लागअ थोघ कि सारै एरुशलेम नगरी आसा हाल्‍लअ-गोल्‍लअ मच़अ द। 32 तेभी आअ तेभी आपणैं सपाही अर सुबैदारा लई तिन्‍नां सेटा लै ठुर्ही। सपाही दले सरदारा अर सपाही भाल़ी किअ तिन्‍नैं पल़सी च़िक्‍कणअ बंद अर सह झ़ैऊअ धरना का खल़अ।

33 सपाही दले सरदारै ढाकअ आजू एछी पल़सी अर सह बझ़ैल़अ दूई शांघल़ी करै बान्हणैं अर तेखअ लागअ लोगा पुछ़दअ, "अह कुंण आसा? एऊ किज़ै किअ?"

34 पर तिन्‍नां खास्सै मणछे जेल्ह-मरेल्ही मांझ़ा का लागै कोई किछ़ बोल्दै अर कोई किछ़ लैल़ा लांदै, अर हाल्‍लै-गोल्‍लै मांझ़ै निं सह किछ़ गल्‍ला समझ़ी सकअ कि सत्त कै आसा। तेऊ दैनअ तिन्‍नां गहल़ा लै निंणैओ हुकम।

35 ज़ांऊं सह शिहल़ी दी पुजअ, इहअ हुअ कि तिधी थिऐ खास्सै मणछ कठा हुऐ दै अर तिन्‍नें घिश-तल़िंगीए बज़्हा दी पल़अ सपाही पल़सी च़की निंणअ। 36 किल्हैकि खास्सै मणछ तै तेऊ पिछ़ू लैल़ा पकारा पाई इहअ बोल्दै लागै दै कि एऊ पाआ मारी! एऊ पाआ मारी!

37 ज़ांऊं तिंयां पल़सी गहल़ा दी तै पजैल़णैं ई आल़ै थिऐ, पल़सी बोलअ सपाही दले सरदारा का, "मुंह ती ताह संघै किज़ै गल्‍ला करनी?" तेऊ बोलअ, "तूह कै यूनानी बोली ज़ाणा? 38 तूह कै सह मिसर देशो निं आथी ज़ुंणी थोल़ै धैल़ै पैहलै द्रोही बणाईं च़ार हज़ार द्रोही मणछ रेगीस्ताना लै निऐं?"

39 पल़सी बोलअ, "हुंह निं सह आथी, हुंह आसा किलकिआ मुल्खे मशूर नगरी तरसुस नगरीओ रहणैं आल़अ यहूदी। मेरी आसा ताखा एही अरज़ कि मुंह दै इना लोगा संघै गल्‍ला करनै।"

40 ज़ांऊं तेऊ हुकम दैनअ ता, पल़सी किअ शिहल़ी दी खल़्हुई करै लोगा लै शारअ अर ज़ांऊं तिंयां च़ुप्पी हुऐ तेखअ लागअ पल़सी इब्रानी भाषा दी बोल्दअ,