1 हनन्याह नाओं बी त एक मणछ अर तेऊए बेटल़ी सफीरा बी बेच़ी आपणीं ज़िम्मीं का धख ज़ेही। 2 तेता बेच़ी ज़ुंण किम्मत भेटी, तेता का डाही धख आप्पू का च़ोरी अर ऐहा गल्‍लो थोघ त तेऊए लाल़ी का बी अर तिंयां बाकी ढब्बै पजैल़ै तिन्‍नैं शधाणूं सेटा।

3 पर पतरासै बोलअ तेऊ लै, "हनन्याह, राख्सै तेरै मन्‍नैं अह गल्‍ल किल्है पाई कि तूह पबित्र आत्मां का झ़ुठअ बोले, कि ज़िम्मीं बेच़ी भेटै दै ढब्बै मांझ़ै तूह धख च़ोरी डाहे? 4 ज़ेभै तैणीं सह ताह सेटा ती, सह कै तेरी निं ती? ज़ांऊं सह बिक्‍की गई ती, तेभै बी कै सह तेरै बशै निं ती? तंऐं आपणैं मन्‍नैं इहअ बच़ार किल्है किअ? तंऐं निं मणछा का झ़ुठअ बोलअ पर तंऐं बोलअ परमेशरा का झ़ुठअ।"

5 इना गल्‍ला शुणदी पल़अ हनन्याह धरनीं अर तेऊ शोटै प्राण। ज़ुंणी बी ईंयां गल्‍ला शूणीं तिंयां डरै। 6 तेखअ बणाईं कई लोगै तेऊए खाट अर बागै निंईं करै लागै तेऊए क्रिया कर्म करना लै निंदै।

7 कोई एकी पहरा बाद आई तेऊए लाल़ी ज़ुंण किछ़ हुअ त इना गल्‍ला का नज़ाण तिधी भितरा लै। 8 तेखअ पुछ़अ पतरासै तैहा का, "मुखा खोज़ कि सह ज़िम्मीं तम्हैं तेतरी ई किम्मता दी बेच़ी ती?"

तैहा बोलअ, "हाँ, सह बेच़ी तेतरी ई किम्मता दी।"

9 पतरासै बोलअ तैहा लै, "अह कै गल्‍ल आसा कि तम्हैं दुही आसा किअ द प्रभूए आत्मां परखणां लै एक्‍कअ? भाल़ तेरै मर्धे क्रिया-कर्म करनै आल़ै आसा दुआरै खल़्हुऐ दै अर तुबी निंणीं इना बागा लै।"

10 सह पल़ी तेभी धरनीं अर तैहा बी शोटै प्राण, अर तिन्‍नैं ज़ुआन मणछै भाल़अ भितरी एछी कि सह गई मरी अर तिन्‍नैं निंईं सह बी बागै अर तेसो बी किअ तेसे लाल़ै संघै क्रिया-कर्म। 11 एरुशलेम विश्वासीए टोली दी अर ज़ुंणी बी ईंयां गल्‍ला शूणीं तिंयां सोभ डरै।

12 शधाणूं करै हआ तै लोगा मांझ़ै कई नछ़ैण अर च़मत्कार प्रगट अर भबनै हआ तै तिंयां सोभै मसीहा दी विश्वास करनै आल़ै सुलैमाने च़ऊंरै कठा। 13 पर होरी मांझ़ै निं कहा एही हिम्मत हंदी ती कि तिन्‍नां मांझ़ै डेओए, तैबी करा तै लोग तिन्‍नें खास्सी बड़ैई। 14 विश्वास करनै आल़ै खास्सै बेटल़ी अर मर्ध रहै प्रभूए विश्वासीए टोली दी होर बी खास्सै एछदै लागी। 15 इधी तैणीं कि लोग आणा तै रोगी मणछा मांज़ै अर चकाठी दी च़की, संघा डाहा तै बाता सताऊई कि ज़ेभै पतरास एछे अर तेऊए छ़ैल्‍ली तिन्‍नां प्रैंदै पल़े अर तेता करै तिंयां नरोगै होए। 16 एरुशलेम नगरी ओरी-पोरीए नगरी का बी हआ तै लोग खास्सै रोगी अर भूत शाचै दै मणछ आणी कठा अर तिन्‍नां सोभी करा तै शधाणूं नरोगै।

17 तेखअ ज़िधूऐ तिन्‍नां लै माहा प्रोहत अर तिन्‍नें साथी ज़ुंण सदुकी पंथे तै। 18 तिन्‍नैं ढाकै शधाणूं संघा डाहै तिंयां कैद खानै गोटी। 19 पर राची आअ परमेशरो एक स्वर्ग दूत, तेऊ घुआल़अ कैद खानेओ दुआर संघा काढै तिंयां बागा लै। तेऊ स्वर्ग दूतै बोलअ तिन्‍नां लै इहअ, 20 "डेओआ, अर भबने खल़्हुई करै खोज़ा ऐहा नऊंईं ज़िन्दगीए सोभी गल्‍ला लोगा का।"

21 तिंयां डेऊऐ इना गल्‍ला शूणीं राच भैंदी भबना लै संघा लागै लोगा लै शिक्षा दैंदै।

पर माहा प्रोहत अर तेऊए साथी किऐ माहा सभा दी एछी इज़राईलीए सैणैं कठा अर कैद खानै लै दैनअ समाद कि तिन्‍नां आणा माहा सभा लै। 22 पर तिन्‍नां सपाही निं तिंयां कैद खानै भितरी भेटै, यहूदी सैणैं सेटा बापस पुजी दैनअ तिन्‍नैं इहअ समाद, 23 "हाम्हैं आऐ कैदखाने का भाल़ी, तिधी भाल़अ हाम्हैं कि सपाही आसा दुआरै शाणै लाऐ दै, अर आप्पू आसा बागै राम्बल़अ पहरअ पाअ द। पर ज़ांऊं हाम्हैं कैद खानेओ दुआर घुआल़अ, तेथ निं भितरी हाम्हां कोह भेटअ!"

24 ज़ांऊं बिधाते भबने कारदारै अर बडै प्रोहतै ईंयां गल्‍ला शूणीं, तिन्‍नां पल़अ बडअ फिकर कि इना गल्‍लो आजू किज़ै हणअ? 25 तेतरी आअ कुंण तिधी, तेऊ बोलअ तिन्‍नां लै, "हेरा, ज़ुंण तम्हैं कैद खानै थिऐ हूल़ी डाहै दै, तिंयां आसा भबनै खल़्हुई लोगा लै शिक्षा दैंदै लागै दै!" 26 तेखअ आणै भबने कारदार अर सपाही तिंयां शधाणूं माहा सभा लै। पर ज़ोरा-ज़ोरी घिशी निं तिन्‍नैं तिंयां आणै। किल्हैकि तिन्‍नां ती लोगे डअर कि इहअ निं हअ कि लोग तिन्‍नां लै पात्थरो ढो दैए।

27 तेखअ किऐ तिंयां शधाणूं माहा सभा दी खल़ै अर माहा प्रोहतै पुछ़अ तिन्‍नां का, 28 "हाम्हैं कै तम्हैं पैहलै निं समझ़ाऊऐ तै कि तम्हैं निं ईशूए नाओंए शिक्षा दैई? तैबी छिंगी तम्हैं ईंयां गल्‍ला सारी एरुशलेम नगरी। तम्हैं किल्है च़ाहा तेऊ मणछे हत्या करनैओ दोश हाम्हां लै लाणअ?"

29 तेखअ दैनअ पतरासै अर होरी शधाणूं ज़बाब, "थारी गल्‍ला का खास्सअ आसा परमेशरो हुकम मनणअ म्हारी ज़िम्मैंबारी अर कर्म। 30 म्हारै दादा-बाबे परमेशरै किअ मसीहा ईशू मरी करै भिई ज़िऊंदअ ज़ुंण तम्हैं क्रूसा दी छ़ड़ाऊई करै मारअ त।✝

31 "परमेशरै दैनी ईशू लै सोभी का बडी पदबी। तेऊ बणाअं सह हाम्हां सोभिओ उद्धार करनै आल़अ ज़ुंण हाम्हां प्रैंदै राज़ करे। सह बोला हाम्हां इज़राईली लै कि पापो प्राश्त करा ताकि सह म्हारै पाप माफ करी सके।✝

32 "हाम्हैं आसा इना गल्‍ले शाजत ज़ुंणीं ईंयां गल्‍ला आपणीं आछी भाल़ी, पबित्र आत्मां बी, ज़ुंण परमेशरै आपणैं तिन्‍नां हुकम मनणै आल़ै लै आसा दैनी दी।"

33 ज़ांऊं सभा दी बेठै दै लोगै ईंयां गल्‍ला शूणीं, तिंयां हुऐ शधाणूं लै रोश्शै लाल-पिंऊंल़ै अर तिंयां च़ाहा तै तिन्‍नां मारी पाणै। 34 पर गमलिएल नाओं एक फरीसी मणछ ज़ुंण शास्त्रो ज़ाणकार त, तेऊए ती सोभी लोगा मांझ़ै खास्सी इज़त, तेऊ दैनअ दालता दी खल़्हुई करै तिन्‍नां शधाणूं थोल़ी घल़ी बागै करनैओ हुकम।

35 तेखअ बोलअ तेऊ माहा सभा दी बेठै दै लोगा लै, "हे इज़राईली मणछो, ज़ुंण बी तम्हैं इना मणछा संघै करनअ च़ाहा, तेता करै हेरे सोठी-समझ़ी।" 36 किल्हैकि इना धैल़ै का पैहलै निखल़अ त थिऊदास नाओं मणछ इहअ बोली कि हुंबी आसा किज़ै। कोई च़ार शौ मणछ हुऐ तेऊ संघै अर सह पाअ मारी अर ज़ेतरै लोग तेऊ मना तै, तिंयां छिंघुऐ ओरी-पोरी अर तिंयां बी मुक्‍कै।

37 "तेखअ आअ नाअं दर्ज़ करने धैल़ै गलील मुल्खो रहणैं आल़अ यहूदा बी अर धख लोग बी फरेऊऐ तेऊ आप्पू बाखा, पर सह बी हुअ बरैबाद अर ज़ेतरै लोग तेऊ पिछ़ू तै, तिंयां बी छिंघुऐ आपणीं-आपणीं बाता।

38 "ऐबै बोला हुंह तम्हां लै इहअ कि इना मणछ का रहा दूर अर इना का निं किछ़ै मतलब डाहा, किल्हैकि, ज़ै अह धर्म या काम मणछा बाखा का होए, तै हणअ अह एकी धैल़ै खतम, 39 पर ज़ै अह परमेशरा का आसा, तै निं तम्हैं इना कधि खतम करी सकदै, किधी इहअ निं हआ कि तम्हैं होए परमेशरा संघै जुधा करनै आल़ै!"

40 तेखअ तिन्‍नैं सोभी तेऊए गल्‍ला मनी, शधाणूं शादै अर तिंयां च़िक्‍कै अर इहअ बोली छ़ाडै कि ईशूए नाओंआं दी निं कोही का भिई गल्‍ला करी।

41 तिंयां शधाणूं डेऊऐ ऐहा गल्‍ला का खुश हई माहा सभा का कि हाम्हैं प्रभूए नाओंए बारै अर बेइज़ती ज़िरनै जोगी, हुऐ। 42 इहअ करै रहै तिंयां धैल़ भबनै अर घअरै-घअरै लागी एही शिक्षा दैंदै, "प्रभू ईशू आसा मसीहा" अर तेऊए खुशीए समादा खोज़णैं का निं पिछ़ू हटै आथी।