1 पल़सी अर सिलास आऐ अम्फिपुलिस अर अपूलोनिया नगरी बाती थिस्सलूणी नगरी। तिधी त यहूदीए सभागृहा। 2 पल़सी डेऊअ तिन्‍नां सेटा लै ज़िहअ सह हर ज़ैगा बशैघे धैल़ी सभागृहा लै डेओआ त। चिई हबतै तैणीं रहअ सह तिन्‍नां संघै पबित्र शास्त्रा का सुआल-ज़बाब करदअ लागी।

3 तिन्‍नां का समझ़ाऊई पबित्र शास्त्रा का सबूत दैई सारी गल्‍ला कि मसीहो दुख भुगतणअ, अर मरी करै ज़िऊंदै हणअ त ज़रूरी अर अह ई ईशू, ज़सरै बारै हुंह तम्हां का खोज़ा अह आसा मसीहा। 4 कई यहूदी मिलै इना गल्‍ला मनी सिलास अर पल़सी संघै। होर बी कई भली भगत बडै घअरे बेटल़ी अर यूनान देशे होरी ज़ातीए परमेशरे डरा हेठै रहणैं आल़ै मणछै बी किअ विश्वास।

5 पर यहूदी किऐ ज़िदै मारै नभार लोगा मांझ़ै कई कदुष्ट मणछ आप्पू संघा। तिंयां लागै खास्सै मणछ कठा करी सारी नगरी हाल्‍लै-गोल्‍लै करदै। संघा जासोने घअरा फेर सोभी कठा करी च़ाहा तै तिंयां सिलास अर पल़सी बागा लै काढणअ। 6 पर तिंयां निं तिन्‍नां तिधी भेटै। संघा निंयैं तिन्‍नैं जासोन अर कई विश्वासी भाई मांझ़ै घिशी तल़िंगी करै नगरीए सैणैं सेटा। तिंयां लागै ज़ोरै-ज़ोरै लैल़ा पाई इहअ बोल्दै, "ईंयां आसा तिंयां ई लोग ज़ुंणी सारै देशै आसा खरोल़ पाअ द अर ऐबै पुजै ईंयां इधी बी।

7 "जासोनै आसा तिंयां आपणैं घअरै डाहै दै। ईंयां करा माहा राज़ेए बधानो बरोध। ईंयां बोला इहअ कि राज़अ आसा कुंण होर ईशू नाओं मणछ।" 8 इहअ शूणीं हुऐ नगरीए सैणैं रोश्शै लाल-पिंऊंल़ै 9 अर तिन्‍नैं डाहै जासोन अर बाकी विश्वासी भाई तेभै तैणीं कैद करी ज़ेभै तैणीं तिन्‍नें ज़मानत निं हुई।

10 होरी विश्वासी भाई छ़ाडै तेभी राची भितरी पल़सी अर सिलास बिरीया नगरी लै अर तिंयां डेऊऐ तिधी पुजी यहूदी मणछे सभागृहा लै। 11 ईंयां लोग तै थिस्सलूणी नगरी यहूदी का भलै अर बडै च़ाऊआ करै बैण मनी रहै धैल़ तिंयां पबित्र शास्त्रा दी लोल़ै-भाल़ै लागी कि ईंयां गल्‍ला शुची आसा या एथ किज़ै दोश आसा। 12 तिन्‍नां मांझ़ै कई, अर यूनानी बडै घअरे बेटल़ी मांझ़ै अर मर्धा मांझ़ै किअ कई विश्वास।

13 पर ज़ांऊं थिस्सलूणी नगरी यहूदी का थोघ लागअ कि पल़सी आसा बिरीया नगरी बी लागअ द परमेशरे बैण प्रच़ारा करदअ, तिंयां आऐ तिधी बी लोगा खरोल़ पांदै अर उपद्रभ करदै। 14 तेखअ होरी विश्वासी भाई छ़ाडअ तेभी पल़सी तिधा का कि समुंदरे बाढै डेऊ। पर सिलास अर तिमोथी रहै तिधी बिरीया नगरी।

15 पल़सी संघणैं आल़ै पजैल़अ सह एथेंस नगरी तैणीं, अर सिलास अर तिमोथीए बारै इहअ बोली लागै तिधा का हांढदै कि तिन्‍नां छ़ाडै छ़ेक्‍कै मुंह सेटा लै।

16 ज़ांऊं पल़सी एथेंस नगरी दी तिन्‍नां न्हैल़अ त लागअ द। पल़सी ज़ांऊं इहअ भाल़अ कि सारी नगरी आसा मुहुर्ती करै भर्हुई दी, सह हुअ भितरा का खास्सअ दुखी। 17 पल़सी डेऊअ सभागृहा यहूदी, भगता अर तिन्‍नां लोगा सेटा ज़ुंण च़फै भेटा तै। तिन्‍नां संघै रहअ सह हर धैल़ै सुआल-ज़बाब करदअ।

18 तेखअ इपिकूरी अर स्तोईकी पंडता मांझ़ै लागै कई तेऊ संघै सुआल-ज़बाब करदै। कई बोलअ इहअ, "अह नथोघी गल्‍ला करनै आल़अ कै बोल़णअ च़ाहा?" पर होरी बोलअ इहअ, "अह ज़ाण्हिंआं हाम्हां का कहा होरी देअए बारै खोज़णैं आल़अ।" किल्हैकि पल़सी खोज़ा त लोगा का ईशू अर तेऊओ मरी करै ज़िऊंदै हणें बारै खुशीओ समाद।

19 तेखअ निंयं तिन्‍नैं पल़सी आप्पू संघै एरियोपागुस नाओंए सभागृहा लै अर संघा लागै तेऊ का पुछ़दै, "ज़ुंण तूह लोगा का इना नऊंईं गल्‍ला खोज़ा अह किज़ै आसा? एता समझ़ाऊ हाम्हां का बी। 20 तेरी ईंयां गल्‍ला आसा हाम्हां लै नुआहरी, हाम्हां का बी लोल़ी ऐहा गल्‍लो थोघ लागअ कि एतो कै मतलब आसा?" 21 तिन्‍नैं बोलअ एते तैणीं कि कई एथेंस नगरी रहणैं आल़ै अर परदेसी ज़ुंण तिधी रहा तै तिंयां निं नऊंईं-नऊंईं गल्‍ला शुणनै अर बोल़णैं का सुआई होर किछ़ू कामां दी बगत काटदै तै।

22 तेखअ पल़सी एरियोपागुस सभागृहा खल़्हुई करै बोलअ, "हे एथेंस नगरी रहणैं आल़ैओ! मुखा ज़ाण्हिंआं इहअ कि तम्हैं आसा हर गल्‍ला दी धर्म-कर्म करनै आल़ै। 23 किल्हैकि हुंह त लागअ द हांढदी-फिरदी थारी तिन्‍नां च़िज़ा भाल़अ ज़ेते तम्हैं पूज़ा करा, मुखा शुझुई एक एही बेदी, ज़हा दी इहअ आसा लिखअ द, ‘अह बेदी आसा तेऊ लै ज़हा परमेशरा हाम्हैं नांईं ज़ाणदै।’ ज़हा तम्हैं बाझ़ी ज़ाणैं भाल़ै पूज़ा, मंऐं लाई तम्हां का तेऊए बारै गल्‍ला खोज़ी।

24 "ज़ुंणी परमेशरै संसार अर तेते सोभै च़िज़ा बणाईं, सह निं स्वर्गो अर पृथूईओ मालक हई हाथा करै बणाऐं दै देहुरै रहंदअ।✝

25 "नां किज़ू च़िज़े मांणै सह मणछा का मज़त च़ाहंदअ। किल्हैकि सह दैआ आप्पू ई सोभी लै ज़िन्दगी, शाह अर ज़रुरतीए सोभै गल्‍ला।✝

26 "तेऊ बणाईं एकी मूल़ मणछा करै सारै संसारे सोभ ज़ाती सारी पृथूई दी रहणा लै। तेऊ परमेशरै बणाऐं दै बगत अर रहणें ज़ैगा आसा तैही बान्हीं दी।✝

27 "परमेशर च़ाहा लोगा लै इहअ कि तिंयां तेऊ दी आशा डाही करै तेऊ भाल़े अर लोल़ै लागे कि असली दी निं सह हाम्हां सोभी का दूर आथी।✝

28 "किल्हैकि हाम्हैं रहा तेऊ ई दी ज़िऊंदै, हांढदै-फिरदै अर खल़ै टेक्‍की। तम्हां मांझ़ै आसा कई इहअ बी बोलअ द, ‘हाम्हैं आसा तेऊए ई लुआद।’ 29 परमेशरे लान्हैं हई आसा हाम्हां लै इहअ सोठणअ गलत कि परमेशर आसा सुन्‍नैं-रुपै अर पात्थरा दी, ज़ुंण मणछे आपणीं सोठा अर कारीगीरी करै आसा बणाऐं दै।✝

30 "तैही निं परमेशरै म्हारी बेसमझ़ीए घल़ी धैन दैनअ पर ऐबै दैआ सह सोभी मणछा लै हुकम कि तिंयां प्राश्त करी तिन्‍नें कदुष्ट काम करनै छ़ाडे। 31 किल्हैकि तेऊ आसा एक धैल़ी एही डाही दी ज़ेथ परमेशरा तेऊ करै सारै संसारो शुचअ नसाफ करनअ ज़ुंण तेऊ छ़ांटअ द आसा, अर सह किअ मरी करै भिई ज़िऊंदअ अर इहअ करी किई तेऊ अह गल्‍ल सोभी लै प्रगट।"✝

32 मूंऐं दै मणछे ज़िऊंदै हणें गल्‍ला शूणीं लागै कई लोग हास्सदै सुहांगा करदै अर कई बोलअ इहअ, "ऐहा गल्‍ला होए शूणीं हाम्हैं ताखा केभै दुजी बारी।"

33 इहअ भाल़ी लागअ पल़सी तिधा का हांढदअ। 34 पर कई मणछै किअ प्रभू दी विश्वास अर तिंयां आऐ पल़सी संघै। तिंयां थिऐ दियोनसियास एरियोपागुस सभागृहो साझ़ू, दमरिस नाओंए एक बेटल़ी अर तिन्‍नां संघै तै होर बी कई लोग।