1 जनाब थियुफिलुस, मंऐं लिखी ती ताल्है पैहली कताब तिन्‍नां गल्‍ले बारै, ज़ुंण प्रभू ईशू शुरू ओर्ही किअ अर खिरी तैहा धैल़ी तैणीं सखाऊंदअ रहअ 2 ज़हा धैल़ी सह आपणैं छ़ांटै दै शधाणूं लै हुकम दैई पबित्र आत्मां करै परमेशरै उझै स्वर्गा लै निं च़कअ।

3 क्रूसा दी दुख ज़िरी ज़ान दैणैं का बाद रहअ ईशू च़ाल़्ही धैल़ै तैणीं शधाणूं संघै बगती-बगती तिन्‍नां सेटा डेऊंदअ अर तिन्‍नां लै परमेशरो राज़ एछणें बारै खोज़दअ लागी। तेऊ किई अह गल्‍ल कई पाक्‍कै सबूत रहैऊई प्रगट कि सह हुअ मरी करै भिई ज़िऊंदअ।

4 ज़ेभै सह तिन्‍नां सेटा त, तेऊ दैनअ तिन्‍नां लै इहअ हुकम, "एरुशलेम नगरी निं छ़ाडी, पर मेरै बाब परमेशरे तैहा करारा पूरी हणैं तैणीं रहै ऐहा ई नगरी न्हैल़ै लागी, ज़ेते बारै मंऐं तम्हां का पैहलै ई आसा खोज़अ द।*लूक. 24:49

5 "किल्हैकि जोहन्‍ना, दैनी पाणीं दी डुबकी; पर परमेशरा दैणीं तम्हां लै पबित्र आत्मां दी डुबकी।"*मोत्त. 3:11

6 बादा का ज़ांऊं तिंयां सोभ प्रभू ईशू सेटा कठा हुऐ, तिन्‍नैं पुछ़अ प्रभू ईशू का, "हे प्रभू, दुशमणा का छ़ुटकारअ दैई कै ताह ऐबै इज़राईला दी आप्पै करनअ राज़?" 7 प्रभू ईशू बोलअ तिन्‍नां लै, "तैहा ऋता अर तेऊ ज़मानें बारै थोघ हणें निं तम्हां किछ़ै ज़रुरत आथी तिन्‍नां गल्‍लो थोघ अर हक आसा सिधअ बाब परमेशरा का कि तिंयां गल्‍ला केभै हणीं।

8 "पर ज़ेभै पबित्र आत्मां तम्हां दी एछे, तेभै भेटणीं तम्हां शगती, तेखअ हणैं तम्हैं एरुशलेम नगरी, सारै यहूदा मुल्खै, सामरी मुल्खै अर सारी पृथूई दी हर ज़ैगा मेरै शाजत।"

9 इना गल्‍ला बोली डेऊअ प्रभू तिन्‍नां सम्हनै उझै स्वर्गा लै अर बादल़ै च़ोरअ सह तिन्‍नें आछी का दूर।✝ 10 प्रभू डेऊंदी बारी तै तिंयां सोभ लागै दै सरगा बाखा लै भाल़ै, अर दूई स्वर्ग दूत शेतै झिकल़ै बान्हैं दै तिन्‍नां सेटा लै आऐ अर खल़्हुऐ।

11 तिन्‍नैं स्वर्ग दूतै बोलअ तिन्‍नां लै, "हे गलीली मणछो, तम्हैं इधी खल़्हुई करै किल्है आसा लागै दै सरगा बाखा लै भाल़ै? अह ई ईशू ज़ुंण परमेशरै तम्हां सेटा का स्वर्गा लै च़कअ, ज़िहअ करै तम्हैं अह स्वर्गा लै डेऊंदअ भाल़अ, तिहअ ई एछणअ अह बापस फिरी।"✝

12 तिन्‍नां स्वर्ग दूता डेऊणैं बाद फिरै तिंयां च़ेल्‍लै जैतून नाओंए धारा का बापस एरुशलेम नगरी लै सह ज़ैगा ती एरुशलेम नगरी नेल़ कोई एक मील दूर ज़ेतरै दूर यहूदी बशैघे धैल़ै डेऊई सका तै।

13 ज़ांऊं तिंयां एरुशलेम नगरी पुजै अर तिंयां रहै तिधी एकी घअरे एकी आटल़ू। तिधी थिऐ पतरास, जोहन्‍ना, याकब, आन्दरू, फलिप्प, थोमा, बरतुलमी, मोत्ती, हलफीओ शोहरू याकब, शमौन जेलोतेस अर याकबो शोहरू यहूदा।

14 ईंयां सोभै शधाणूं तै कबल्‍लै एक मन्‍न हई प्राथणां करदै लागै दै। तिन्‍नां मांझ़ै तै प्राथणां करदै होर च़ेल्‍लै बी अर कई बेटल़ी ज़ुंण प्रभू ईशू संघै हआ तै अर प्रभू ईशूए ईज मरिअम अर ईशूए दूई भाऊ।

15 तिन्‍नां ई धैल़ै उझ़ुअ पतरास तिन्‍नां सोभी भाई मांझ़ै खल़अ, तिधी थिऐ तिंयां सोभ ईशू मसीहा दी विश्वास करनै आल़ै एक शौ बिह लोग बेठै दै। तेखअ बोलअ पतरासै,

16 "भाईओ, यहूदे बारै ज़ुंण पबित्र शास्त्रा दी आसा लिखअ द, तेतो पूरअ हणअ त ज़रूरी अर अह गल्‍ल हुई बी आझ़ सच्च़ी।

"ज़ुंण पबित्र आत्मां राज़ै दाबेदे खाखा का पैहलै ई खास्सी साला पैहलै आसा बोलअ द ज़ुंण प्रभू ईशू ढाकणैं आल़ै मांझ़ै सैणअ त।"✝

17 "किल्हैकि सह थिअ हाम्हां संघै च़ाकरी लै साझ़ू। 18 तेऊ लअ पापे कमाई करै एक खेच मोलै। तेऊओ हुअ उटअ मूंड अर खल़ी ज़ांघा अर तेऊओ पेट फुटअ, अर तेऊए सारी आंजा निखल़ी बागै। 19 ऐहा गल्‍लो थोघ लागअ एरुशलेम नगरी रहणैं आल़ै सोभी लोगा का, इधी तैणीं कि तेऊ खेचा लै बोला तिन्‍नें बोली दी ‘अकेलदामा’ मतलब लोहूओ खेच।"

20 "किल्हैकि भज़ने कताबा दी आसा लिखअ द,✝

‘तेऊओ घअर लोल़ी बरैबाद हुअ

अर तेथ निं लोल़ी कोह बस्सअ,

तेऊए पदबी लोल़ी कहा होरी भेटी।’

21 "तै, ज़ेतरै धैल़ै प्रभू ईशू हाम्हां संघै एछदअ-डेऊंदअ रहअ, मतलब जोहन्‍ने डुबकी दैणैं ओर्ही प्रभूए स्वर्गै डेऊणैं तैणीं ज़ुंण लोग हर बगत हाम्हां संघै रहै। 22 सह ई गल्‍ल आसा अह कि जोहन्‍ना सेटा डुबकी लणैं ओर्ही स्वर्गा लै डेऊणैं तैणीं ज़ुंण तिन्‍नां ई मांझ़ा का एक मणछ हाम्हां संघै प्रभूए ज़िऊंदै हणैंओ शाजत होए।"

23 तेखअ किऐ तिन्‍नैं दूई ज़ण्हैं खल़ै, एक युसुफ, ज़हा लै बरसबा बोला अर तेऊओ पल़णांअ आसा जस्तुस अर दुजअ किअ खल़अ मतियाह।

24 तेखअ किई तिन्‍नैं सोभी एही प्राथणां "हे प्रभू, तूह ज़ुंण सोभिए मन्‍नें गल्‍ला ज़ाणा, ऐहा गल्‍ला कर प्रगट कि इना दूई मांझ़ै तंऐं कुंण आसा छ़ांटअ द, 25 कि सह ऐहा च़ाकरी अर शधाणूंए पदबी लई सके। ज़हा पदबी छ़ाडी यहूदा आपणीं तैहा ज़ैगा लै डेऊअ ज़ेता सह च़ाहा त।"

26 तेखअ पाई तिन्‍नैं सोभी तिन्‍नां दुहीए नाओंए परच़ी अर परच़ी निखल़ी मतियाहे नाओंए, तेखअ गणअ सह तिन्‍नां गैरा शधाणूं संघै बार्हूऐ शधाणूंए रुपै।