1 शधाणूं अर होरी विश्वासी भाई ज़ुंण यहूदा मुल्खै तै, तिन्‍नैं बी शूणअ कि परमेशरो बैण मनअ होरी ज़ातीए लोगै बी। 2 ज़ांऊं पतरास एरुशलेम नगरी बापस पुजअ, यहूदी मांझ़ा का आऐ दै विश्वासी लागै तेऊ संघै हठल़दै, 3 "तूह डेऊअ होरी ज़ातीए घअरै अर तंऐं तिन्‍नां संघै खाअ-पिअ बी!"

4 तेखअ खोज़ी पतरासै तिन्‍नां का शुरू का सारी गल्‍ला, 5 "हुंह त लागअ द जोपा नगरी प्राथणां करदअ, अर नर्तान हई भाल़अ एक बडी च़ादरा ज़िहअ बडअ तराणअ आसा च़ऊ कुंणी का राशै करै बान्हअ द, सह च़ुंढुअ सरगा का पृथूई बाखा लै ज़िधी हुंह त। 6 ज़ांऊं मंऐं धैन दैनअ कि तेऊ तराणैं दी आसा संसारे सोभी रंगे च़ऊ ज़ांघा हांढदै, रिंगणै आल़ै सोभै ज़ीब अर सरगे च़ेल्‍लू-पखीरू। 7 मंऐं शूणअ इहअ बोल, ‘ओ पतरास, उझ़ू इना मार अर खा।’

8 "मंऐं बोलअ इहअ कि नांईं प्रभू, ‘हुंह निं छ़ोत लाणैं आल़ी च़िज़ा कधि खाई सकदअ! किल्हैकि ज़ुंण च़िज़ा शुची निं आथी तिंयां निं मंऐं आझ़ तैणीं कधि खाई।’

9 "एते ज़बाबा दी बोलअ सरगा का दुजी बारी परमेशरै इहअ, ‘हुंह आसा परमेशर ज़ुंण मणछ मंऐं शुचै आसा किऐ दै, तिन्‍नां लै निं तूह छ़ोतलै बोलै।’ 10 चिई बारी हुअ इहअ ई, तेखअ खिंच़अ सह तराणअ तेभी उझै सरगा लै।

11 "तेभी आऐ तिधी चअन मणछ तेऊ घअरा लै ज़िधी हुंह प्राहुंणअ त। ज़ुंण कैसरिया नगरी का थिऐ कुरनेलिस मुंह सेटा लै छ़ाडै दै। तिंयां खल़्हुऐ दुआरे डेहल़ा बागै। 12 तेखअ बोलअ पबित्र आत्मां मुल्है तिन्‍नां पिछ़ू च़ुप्प-च़ुप्पै डेऊणा लै। छ़ह भाई आऐ होर बी मुंह संघै अर हाम्हैं डेऊऐ तेऊ मणछे घअरा लै।

13 "तेऊ खोज़अ मुखा इहअ, ‘तेऊ भाल़अ एक स्वर्ग दूत आपणैं घअरै खल़्हुअ द अर तेऊ दूतै बोलअ इहअ कि जोपा नगरी का शाद शमौना ज़हा लै पतरास बोला। 14 तेऊ खोज़णीं तम्हां का एही गल्‍ला, परमेशरा दैणअ ताल्है अर तेरै सोभी टबरा लै उद्धार।’

15 "ज़ांऊं हुंह तिन्‍नां संघै गल्‍ला लागअ, पबित्र आत्मां होथअ तिन्‍नां सोभी शुणनै आल़ै प्रैंदै, ज़िहअ करै हाम्हां लै आअ त। 16 तेखअ आअ मुंह प्रभूओ सह बैण आद ज़ुंण तेऊ बोलअ त इहअ, ‘जोहन्‍ना, दैनी पाणीं दी डुबकी; पर तम्हां लै दैणीं पबित्र आत्मां दी डुबकी।’ 17 ऐबै ज़ै परमेशरै तिन्‍नां लै बी दान दैनअ, ज़ुंण हाम्हां प्रभू ईशू मसीहा दी विश्वास करी भेटअ, तै हुंह कुंण त कि परमेशरा रोक्‍की सका त?"

18 इहअ शूणीं हुऐ तिंयां यहूदी मांझ़ा का विश्वासा का आऐ दै मणछ च़ुप्पी। तिंयां लागै परमेशरे ज़ै-ज़ैकार करदी इहअ बोल्दै, "ऐबै दैनी परमेशरै होरी ज़ाती लै बी सदा रहणैं आल़ी ज़िन्दगी, ज़ै तिंयां आपणैं पापो प्राश्त करे अर परमेशरा सेटा लै बापस फिरे।"

19 तिंयां सोभ लोग स्तिफनुसा करै पल़ै दै तेऊ शोग सांगटे मारै गऐ तै सारै दी छिंघुई, कोई डेऊऐ तिन्‍नां मांझ़ै फिनाका नगरी, कुप्रास टापू अर कई पुजै सिरीया मुल्खे अन्ताकिया नगरी। पर यहूदी छ़ाडी निं तिंयां होरी कोही लै बैण खोज़दै तै।

20 पर तिन्‍नां मांझ़ै तै कई विश्वासी कुप्रास टापू का अर कुरेन नगरी का तिंयां आऐ अन्ताकिया नगरी अर तिधी लागै कई यूनानी मणछा का बी प्रभू ईशूए खुशीए समादा खोज़दै। 21 तिन्‍नां संघै ती प्रभूए क्रिप्पा अर होरी ज़ातीए कई लोगै किअ विश्वास अर तिंयां फिरै प्रभू बाखा लै।

22 तिन्‍नें ईंयां गल्‍ला पुजी एरुशलेम नगरी विश्वासीए टोली का बी अर तिन्‍नैं छ़ाडअ बरनबास अन्ताकिया नगरी लै। 23 तिधी पुजी हुअ सह परमेशरे जशा भाल़ी खुश अर सोभी लै दैनअ इहअ हैअ कि मन्‍न लाई करै रहा प्रभू दी पाक्‍कै टेक्‍की। 24 बरनबास त एक भलअ मणछ अर पबित्र आत्मां करै अर विश्वासा दी त भरपूर। खास्सै मणछै किअ प्रभू मसीहा दी विश्वास।

25 तेखअ डेऊअ बरनबास शाऊला लोल़अ तरसुस नगरी लै। 26 ज़ांऊं तेऊ शाऊल भेटअ, सह आणअ अन्ताकिया नगरी लै। इहअ हुअ कि तिंयां रहै एकी साला तैणीं विश्वासी टोली संघै मिलदै अर कई लोगा लै शिक्षा दैंदै, अर प्रभू ईशू मसीहे च़ेल्‍लै लै बोलअ सोभी का पैहलै अन्ताकिया नगरी "मसीही।"

27 तिन्‍नां धैल़ै आऐ परमेशरे कई गूर एरुशलेम नगरी का अन्ताकिया नगरी लै। 28 तिन्‍नां मांझ़ै एकी अगबुस नाओंए गूरै खोज़अ खल़ै हई पबित्र आत्मां करै इहअ कि संसारै पल़णअ कई ज़ैगा नकाल़, अर सह नकाल़ पल़अ रोम राज़ा दी क्लौदिउस माहा राज़ेए ज़मानैं।

29 तेखअ किअ च़ेल्‍लै इहअ फैंसलअ कि हरेक विश्वासी दैणअ यहूदा मुल्खै रहणैं आल़ै विश्वासी भाई-बंधा लै आपणीं गांठी का थोल़ै-थोल़ै ढब्बै सोभी ज़हा का ज़ेतरअ पुगे तेतरै। 30 तिन्‍नैं किअ तिहअ ई अर बरनबास अर शाऊले हाथै छ़ाडै एरुशलेम नगरी टोलीए सैणैं लै ढब्बै-धेल्‍लै।