1 एही प्राथणां करी डेऊअ ईशू आपणैं च़ेल्‍लै संघै किद्रोन गाडा पार बाखा, तिधी त एक बाग, ईशू अर तेऊए च़ेल्‍लै डेऊऐ तेऊ बागा लै। 2 तेखअ आअ यहूदा ज़ुंणी ईशू कैद करनै थिअ लाअ द बझ़ैल़ी, तेऊ बी थिअ ऐहा ज़ैगो थोघ, किल्हैकि ईशू अर तेऊए च़ेल्‍लै रहा तै तिधा लै एछदै लागी। 3 तेखअ आणै यहूदा करेती आप्पू संघा रोमी सपाहीए एक पल़टण, बडै प्रोहत, शास्त्री, फरीसी, सैणैं अर खास्सै मणछ तलबारा पाई, राची मसाल्‍लै अर दीऐ ज़ाल़ी हाथै अस्त्र-शस्त्र पाई तिधी।

4 तेखअ हेरी ईशू तिंयां गल्‍ला ज़ाणीं ज़ुंण तेऊ लै आजू ती हणैं आल़ी, सह आअ तिन्‍नां सेटा लै, संघा बोलअ तिन्‍नां लै इहअ, "तम्हैं कहा लोल़ै आसा लागै दै?"

5 तिन्‍नैं बोलअ तेऊ लै, "हाम्हैं लोल़ा नासरत नगरीए ईशू?"

ईशू बोलअ तिन्‍नां लै, "सह आसा हुंह।" करेती गराऊंओ यहूदा बी त तिधी। 6 ईशूए इहअ बोल्दी, "सह आसा हुंह।" तिंयां फिरै पिछ़ू अर तिंयां बधल़ुऐ माट्टै प्रैंदै। 7 तेखअ पुछ़अ ईशू भिई, "तम्हैं कहा लोल़ै आसा लागै दै?"

तिन्‍नैं बोलअ भिई तिहअ ई, "नासरत नगरीए ईशू।"

8 ईशू दैनअ तिन्‍नां लै ज़बाब, "मंऐं हेरअ तम्हां का बोली कि सह आसा हुंह। ज़ै तम्हैं मुंह लोल़ै आसा लागै दै, तै दैआ इना होरी डेऊणैं।" 9 अह हुअ तै कि ईशू आप्पै बोलअ द सह बैण पूरअ होए, "ज़ुंण तंऐं मुल्है आसा दैनै दै तिन्‍नां मांझ़ै निं मंऐं एक बी बरैबाद किअ।"

10 शमौन पतरासा का थिई तलबार, तेऊ बाही तेता करै बाही माहा प्रोहते एकी दासा लै अर तेऊओ दैहणअ कान शोटअ धरनीं। तेऊ दास नाअं त मलखुस। 11 पर ईशू बोलअ पतरासा लै, "आपणीं तलबार डाह काठी भितरी, ज़ुंण अह दुखो प्रिहअ मेरै बाब परमेशरै मुल्है दैनअ, अह कै मुंह झुटणअ निं आथी?" ईशू लाअ तेऊओ कान धरना का बापस अर सह हुअ पैहलै ज़िहअ राम्बल़अ।

12 तेखअ तिन्‍नैं सपाही, सुबैदारै अर यहूदी मणछे सपाही ढाकअ ईशू संघा बान्हअ राश्शी करै। 13 तेखअ निंयं पैहलै तिन्‍नैं सह हन्‍ना सेटा लै। हन्‍ना त काईफा माहा प्रोहतो शौहरअ ज़ुंण तैहा साला माहा प्रोहत त। 14 अह त सह ई काईफा ज़ुंणी यहूदी लै सलाह दैनी ती, "हाम्हां लै आसा अह ज़रूरी कि म्हारै लोगा लै एक मणछ मरे, ताकि सारी ज़ाती, बरैबाद नां होए।"

15 शमौन पतरास अर एक होर च़ेल्‍लअ बी डेऊऐ ईशू पिछ़ू-पिछ़ू, अर अह च़ेल्‍लअ त प्रोहतो भेतू-बछ़ैणूं अर ईशू पिछ़ू डेऊअ सह माहा प्रोहते भबना आजू ताटी तैणीं। 16 पर पतरास रहअ दुआरे डेहल़ा बागै खल़्हुई। तेखअ आअ सह दुजअ च़ेल्‍लअ बागा लै ज़ुंण माहा प्रोहतो भेतू-बछ़ैणूं त। तेऊ निंयं दुआरे पहरी का गल्‍ला करी पतरास भितरा लै। 17 तैहा दासी ज़ुंण तिधी दुआरै पहरी ती, तैहा बोलअ पतरासा लै, "तूह कै एऊ मणछे च़ेल्‍लै मांझ़ै आसा?"

पतरासै बोलअ, "नांईं हुंह निं आथी।"

18 किल्हैकि दास अर पहरी तै शेल़ै-ठांढै आगी ज़ाल़ी फेर नैथदै बेठै दै अर पतरास बी लागअ तिन्‍नां मांझ़ै खल़्हुई नैथदअ।

19 तेखअ पुछ़अ माहा प्रोहतै ईशू का तेऊए शिक्षा अर तेऊए च़ेल्‍ले बारै। 20 ईशू दैनअ तिन्‍नां लै ज़बाब, "मंऐं किई संसारे सोभी लोगा का खुल्ही करै गल्‍ला, मंऐं दैनी भबनै अर सभागृहा शिक्षा ज़िधी यहूदी कठा हआ अर मंऐं निं च़ोरी करै किछ़ै किअ। 21 तूह मुंह किल्है पुछ़ा? तिन्‍नां शुणनै आल़ै पुछ़ कि मंऐं तिन्‍नां का कै खोज़अ? तिंयां ज़ाणा कि मंऐं किज़ै बोलअ?"

22 ज़ांऊं ईशू इहअ बोलअ, तेऊ सेटा ज़ुंण भबने पहरी तै खल़्हुऐ दै तिन्‍नां मांझ़ै बाही एकी ईशू लै च़ैंडै संघा बोलअ इहअ, "तूह माहा प्रोहता संघै एही गल्‍ला करा?"✝18:22 लूक. 22:63; मिक. 5:1

23 ईशू बोलअ तेऊ लै, "ज़ै मंऐं किज़ै बूरअ बोलअ, तेता खोज़ सोभी का, ज़ै मंऐं भलअ बोलअ, तै तंऐं मुल्है च़ैंडै किल्है बाही?"

24 हन्‍ना छ़ाडअ ईशू बान्हीं करै माहा प्रोहत काईफा सेटा।

25 शमौन पतरास त खल़्हुअ द नैथदअ, तेखअ बोलअ तिन्‍नैं तेऊ लै, "तूह बी आसा एऊओ च़ेल्‍लअ भाल़ी?"

पतरासै बोलअ, "नां-नां हुंह निं आथी।"

26 थोल़ी घल़ी बाद बोलअ माहा प्रोहते दास मांझ़ै एकी ज़ुंण तेऊए टबरा बाखा त, ज़सरअ कान पतरासै काटअ त, "तूह मंऐं एऊ ईशू संघै बागा दी निं भाल़अ आथी?" 27 पतरासै किअ भिई तेऊ लै नांईं अर तेभी बाशअ मुर्गअ बी।

28 तेखअ निंयं ईशू तिन्‍नैं माहा प्रोहत काईफा सेटा का दोत्ती-दोत्थी गहल़ै राज़ भबनै राज़पाल पिलातुसा सेटा लै। आप्पू निं तिंयां भितरा लै डेऊऐ ताकि तिन्‍नां छ़ोत नां लागे अर ऊवार्णे थैरो भोज़ खाई सके। 29 तेखअ निखल़अ पिलातुस तिन्‍नां सेटा बागा लै संघा बोलअ, "तम्हैं एऊ मणछा लै किज़ू गल्‍लो दोश लाआ?"

30 तिन्‍नैं दैनअ तेऊ लै ज़बाब, "ज़ै अह मणछ कदुष्ट कामां करनै आल़ै निं हंदअ, तै नांईं तै हाम्हैं एऊ ताह सेटा लै आणदै।"

31 राज़पाल पिलातुसै बोलअ तिन्‍नां लै, "तम्हैं करा एऊओ नसाफ आप्पै आपणैं बधाने साबै।"

यहूदी सैणैं बोलअ तेऊ लै, "हाम्हां लै निं अह हक आथी दैनअ द कि कहा लै मौत दैई सके।" 32 अह हुअ तै कि ईशूए सह गल्‍ल पूरी हई सके, ज़ुंण तेऊ आपणैं बारै बोली ती कि तेऊए मौत किहअ करै हणीं।

33 तेखअ डेऊअ पिलातुस राज़ भबनै, तेऊ शादअ ईशू भितरा लै संघा पुछ़अ, "तूह यहूदीओ राज़अ आसा?"

34 ईशू दैनअ तेऊ लै ज़बाब, "अह गल्‍ल तंऐं आपणीं बाखा बोली कि मेरै बारै होरी खोज़ी ताखा?"

35 पिलातुसै ज़बाब दैनअ, "हुंह कै यहूदी आसा? बडै प्रोहतै अर तेरी ज़ातीए लोगै दैनअ तूह मेरै हाथै, तंऐं एतरै जोगी किज़ै किअ?"

36 ईशू दैनअ तेऊ लै ज़बाब, "मेरअ राज़ निं एऊ संसारो आथी, ज़ै मेरअ राज़ एऊ संसारो हंदअ, तै झ़घल़णै तै मेरै च़ेल्‍लै एता पिछ़ू अर यहूदी मणछे हाथै निं हुंह कधि एछणअ त, पर मेरअ राज़ निं एऊ संसारो आथी।"

37 पिलातुसै बोलअ ईशू लै, "तूह बोला कि हुंह आसा राज़अ, मंऐं आसा लअ द एते तैणीं ज़ल्म। संसारा लै आसा आअ द एते तैणीं कि सत्ते शाजत दैंऊं। तिंयां सोभ ज़ुंण शुचै झ़ूरा तिंयां बछ़ैणा ऐहा गल्‍ला कि ज़ुंण मंऐं बोलअ सह आसा शुचअ।"✝18:37 1 जोह. 4:6

38 राज़पाल पिलातुसै पुछ़अ, "अह सत्त कै आसा?" तेखअ डेऊअ भिई पिलातुस यहूदी सैणैं सेटा लै संघा बोलअ तिन्‍नां लै, "मुखा निं एऊ दी किछ़ै दोश ज़ाण्हदअ। 39 पर थारअ आसा अह रबाज़ कि हुंह सका ऊवार्णे थैरे धैल़ी तम्हां लै एकी मणछा नर्दोश करी छ़ाडी, तम्हैं इहअ च़ाहा कि हुंह तम्हां लै एऊ ‘यहूदी मणछे राज़ै’ करूं आज़ाद?"

40 पर तिन्‍नैं बोलअ झांशा तरुंगा काढी, "एऊ निं छ़ाडी पर हाम्हां लै छ़ाड बरोबा।"