1 ईशू त एकी ज़ैगा प्राथणां करदअ लागअ द अर ज़ांऊं सह प्राथणां करी मुक्‍कअ, तेऊए च़ेल्‍लै मांझ़ै बोलअ एकी, "हे प्रभू ज़िहअ जोहन्‍ना आपणैं च़ेल्‍लै का प्राथणां करनअ सखाऊअ तिहअ ई सखाऊ हाम्हां का बी।"

2 ईशू बोलअ तिन्‍नां लै, "ज़ेभै तम्हैं प्राथणां करे, तम्हैं करै एऊ साबै प्राथणां,

बाबा, सोभी लोल़ी तेरै पबित्र नाओंए कदर किई

अर तेरअ राज़ लोल़ी आअ।

3 हर धैल़ै दै हाम्हां लै बैल़ी-क्लारी ज़ेते हाम्हां ज़रुरत आसा।

4 म्हारै पाप कर माफ,

ज़ेही हाम्हैं बी होरी लै माफी छ़ाडी ज़ुंणी हाम्हां लै ज़ुल्म किऐ।

हाम्हां लै निं खरी दैई पल़णै।"

5 तेखअ बोलअ ईशू तिन्‍नां लै, "तम्हां मांझ़ै इहअ कुंण आसा कि ज़सरअ एक साथी आसा अर सह आधी राची एछी इहअ बोले, ‘आरा साथी, मुल्है दै चअन रोटी।’ 6 किल्हैकि एक मसाफर आसा आअ द मेरै घअरै अर तेऊ लै निं मुखा खैऊंणा लै किछ़ै आथी। 7 सह बोला भितरा का, ‘मुंह तंग करदअ निं लागै, ऐबै हेरअ हाम्हैं दुआर बुदरी अर मेरै लान्हैं आसा मुंह संघै च़ैन्‍नै सुत्तै दै, हुंह निं एभै ताल्है रोटी दैंदअ खल़अ उझ़ुई सकदअ?’ 8 पर हुंह बोला तम्हां लै कि, ज़ै सह साथी हई बी च़ैन्‍ना का उझ़ुई करै रोटी नां दैए, ज़ै सह भिई-भिई दुआर टोक्‍के, तेऊए लाज़ शरम छ़ाडी मांगणै भाल़ी हेरनअ तेऊ लै तेतरअ दैई ज़ेतरी तेऊ ज़रुरत आसा।

9 "हुंह बोला तम्हां लै कि मांगदै रहा लागी, तै जाणीं तम्हां सह गल्‍ल भेटी ज़ेता तम्हैं मांगा। दुआरा रहा टोक्‍कदै लागी अर सह दुआर जाणअ तम्हां लै खुल्ही। 10 किल्हैकि ज़ुंण मांगा तेऊ लै हेरा दैई अर ज़ुंण लोल़ा तेऊ जाआ भेटी। अर ज़ुंण दुआरा टोक्‍का तेऊ लै हेरा दुआर घुआल़ी।

11 "तम्हां मांझ़ै इहअ कुंण बाब हणअ कि तेऊओ शोहरू मांगा रोटी अर सह दैआ तेऊ लै पात्थर! तेखअ ज़ै म्हाछ़ली मांगा, तेते बदल़ै दैआ तेऊ लै दानअ! 12 ज़ै आंडअ मांगे, तेऊ लै दैआ बिंच़ू! 13 ज़ै तम्हैं बूरै हई बी आपणैं शोहरू लै राम्बल़ी च़िज़ा दैई सका, तै थारअ स्वर्गे रहणैं आल़अ बाब परमेशर आपणैं मांगणै आल़ै लै पबित्र आत्मां किल्है निं दैई सकदअ।"

14 तेखअ ईशू एकी मणछा का काढअ एक काल्‍लअ भूत। ज़ांऊं सह भूत तेऊ का पोर्ही निखल़अ, सह काल्‍लअ मणछ लागअ गल्‍ला करदअ अर लोग हुऐ खास्सै रहैन। 15 पर तिन्‍नां मांझ़ै बोलअ कई इहअ, "अह काढा भूते राज़ै राख्से शगती करै इना भूता।" 16 कई बोलअ तेऊ लै, कि, ज़ै तूह असली दी परमेशरै आसा हाम्हां सेटा लै आसा छ़ाडअ द, तै रहैऊ हाम्हां का सरगै एक नछ़ैण।

17 ईशू हेरी तिन्‍नें गल्‍ला भुझ़ी अर ईशू बोलअ तिन्‍नां लै, "ज़हा राज़ा दी फूट पल़ा, सह हआ खतम। ठीक इहअ ई ज़िधी टबरा जैंदरी फूट पल़ा, तेऊ घअरो हआ बनाश। 18 ज़ै राख्स आपणअ ई दुशमण होए, तिन्‍नों राज़ किहअ करै रहणअ बणी? किल्हैकि तम्हैं बोला मुल्है इहअ कि राख्सा करै काढा इना भूता? 19 ज़ै तम्हैं मुल्है इहअ बोला कि हुंह काढा राख्सा करै इना भूता दूर! तै हुई अह गल्‍ल बी शुची कि थारै च़ेल्‍लै काढा भूत राख्से शगती करै? मुखा बी आसा इहअ थोघ कि अह गल्‍ल आसा गलत! ऐहा गल्‍लो नसाफ हेरअ तिन्‍नैं करी कि तम्हैं बोला झ़ुठी गल्‍ला। 20 पर ज़ै हुंह परमेशरे शगती करै इना भूता दरल़ाऊआ, तै गअ परमेशरो राज़ तम्हां सेटा पुजी। 21 राख्सा ज़िहै जोधअ मणछ ज़ुंण अस्त्र-शस्त्र संघै आपणैं घअरे हेर-सभाल़ करा तेऊओ घअर निं कोहै लुटी सकदअ। 22 पर ज़ै तेऊ का बडअ जोधअ तेऊ जुधा लै एछे, तै ज़िता तेऊ का सह जोधअ अर तिंयां अस्त्र-शस्त्र ज़ेते आसरै सह थिअ। तिन्‍नां पाआ सह छ़ड़ैऊई अर तेखअ सका सह लुटी। 23 ज़ुंण मुंह संघै नांईं आथी सह आसा मेरअ बरोधी। ज़ुंण मुंह संघै नांईं झाल़दअ सह पाआ पोछी।

24 "ज़ांऊं भूत मणछा का बागै निखल़ा, सह लोल़ा शुक्‍की ज़ैगा रामा करना लै अर ज़ांऊं तेऊ नांईं भेटा, तेखअ बोला सह आप्पू लै इहअ, ‘मुंह डेऊणअ तेऊ ई मणछा दी बस्सणा लै बापस ज़िधा का हुंह पैहलै आसा निखल़अ द।’ 25 बापस फिरी करै भाल़ा सह तेऊ मणछा शुन्‍नैं, धोअ-शोअ अर सज़ाऊऐ दै घअरा ज़िहै। 26 तेखअ आणा सह भूत आप्पू का बी बूरै सात होर भूत आप्पू संघै शादी अर तिंयां बस्सा सोभ तेऊ दी। तेऊ मणछे हआ तेखअ पैहलै का बी खास्सी बूरी दशा।"

27 ज़ांऊं ईशू इना गल्‍ला बोल्दअ त लागअ द, लोगे झाल़ै मांझ़ा का बोलअ एकी बेटल़ी ज़ोरै-ज़ोरै, "परमेशरे बर्गत आसा तेऊ ओदरा लै ज़ेथ तूह रहअ, अर ज़सरअ तंऐं दुध झुटअ।"

28 ईशू दैनअ तिन्‍नां लै ज़बाब, "हाँ, पर परमेशरा दैआ तिन्‍नां लै बर्गत ज़ुंण परमेशरो बैण शूणां अर तिहअ करा बी।"

29 ज़ांऊं तिधी खास्सै मणछो झाल़अ हुअ, ईशू लागअ बोल्दअ, "ऐहा पोस्तीए कदुष्ट मणछ लोल़ा नछ़ैण, पर जोना गूरे नछ़ैणां छ़ाडी निं तिन्‍नां होर नछ़ैण भेटणअ। 30 ज़िहअ परमेशरो गूर जोना निनबे नगरीए लोगा लै नछ़ैण हुअ, तिहअ ई हणअ हुंह मणछो पूत बी लोगा लै नछ़ैण।

31 "दखण देशे राणीं लाणअ नसाफ हणें धैल़ी एऊ ज़मानें लोगा संघै उझ़ुई करै तिन्‍नां लै दोश कि सह आई सुलैमाने ज्ञैना शुणदी पृथूईए दुजै बाढा का पर तम्हां निं अज़ी बी सुंबल़ी सोर आथी! हेरा, इधी आसा सुलैमाना का बी बडअ। * 32 निनबे नगरीए लोगा बी लाणअ नसाफ हणें धैल़ी एऊ ज़मानें लोगा लै दोश। किल्हैकि जोना गूरे प्रच़ारा शूणीं किअ तिन्‍नैं आपणैं पापा लै प्राश्त, पर तम्हां निं अज़ी बी सुंबल़ी सोर आथी! हेरा, इधी आसा परमेशरे गूर जोना का बी बडअ।*

33 "इहअ निं कोह आथी ज़ुंण दीअ ज़ाल़ी दरोठू भितरी डाहा कि पलगा हेठै डाहा पाई, तेता डाहा दीअदानी दी उछ़टै ताकि सारै घअरा भितरी एछणैं आल़ै लै प्रैश्शअ होए।

34 "तेरी देहीओ दीअ आसा तेरी आछ। ज़ै तेरी आछ ठीक होए, तै हणीं तेरी सारी देही प्रैश्शी। पर ज़ै तेरी आछ खोईए तै हणीं तेरी सारी देही न्हैरी। 35 ऐहा गल्‍लो डाहै धैन कि ज़ुंण प्रैश्शअ तम्हां भितरी आसा, सह निं लोल़ी न्हैरअ हुअ। 36 ज़ै तेरी सारी देही प्रैश्शी होए अर कोऐ बी ज़ैगा तेते न्हैरी नां होए, तै हणीं सोभै गल्‍ला एही प्रैश्शी ज़िहअ दीअ ज़ाल़ी प्रैश्शअ हआ।"

37 ज़ांऊं ईशू इना गल्‍ला बोल्दअ त लागअ द, एकी फरीसी मणछै किई ईशू सेटा अरज़ कि हे प्रभू, आझ़ खाआ मेरै घअरै रोटी, अर ईशू डेऊअ भितरा लै रोटी खांदअ। 38 सह फरीसी लागअ ऐहा गल्‍ला सोठदअ कि ईशू रोटी खाणैं का आजी म्हारै दादा-बाबे रिती-रबाज़े साबै न्हैऊअ किल्है निं? 39 प्रभू बोलअ तिन्‍नां लै इहअ, "फरीसी मणछो, तम्हैं प्रिहै अर थाल़ा बागा बाखा ता धोआ, पर भितरा का आसा तम्हैं ऐईबी अर बूराई करै भर्हुऐ दै। 40 ओ बेसमझ़ मणछो, ज़ुंणी बाघलअ भाग बणाअं, तेऊ आसा सह भितरा का बी बणाअं द। 41 पर हाँ, भितरे च़िज़ा करा गरीबा दान, तेखअ भाल़ै तम्हैं कि तम्हां लै हणीं सोभै गल्‍ला शुची।

42 "पर ओ फरीसी मणछो, तम्हां लै हणीं घोर आफ़त! तम्हैं सोभी रंगे भाज़ी, पदिन्‍नै अर शाग-पाचो दसुअ हेस्सअ ता दैआ! पर नसाफ अर परमेशरे झ़ूरी डाहा तम्हैं पिछ़ू। हुअ ता लोल़ी त इहअ कि इना गल्‍ला बी रहंदै मंदै अर तिन्‍नां बी नांईं छ़ाडदै।

43 * "पर ओ फरीसी मणछो, तम्हां लै हणीं घोर आफ़त! सभागृहा झ़ूरा तम्हैं खास ज़ैगा बेशणा लै। बागै भितरी च़ाहा तम्हैं कि लोगै लोल़ी तम्हां सेटा हाथ ज़ोल़ै। 44 तम्हां लै हणीं घोर आफ़त! किल्हैकि तम्हैं आसा ज़िहै घोरी दाबै दै मुल्दै ज़िहै, ज़हा प्रैंदा बाती लोग हांढा पर तिन्‍नां का निं थोघ हंदअ।"

45 तेखअ एकी शास्त्री बोलअ ईशू लै, "हे गूरू, इहअ बोली करा तूह म्हारी निंदा।"

46 ईशू बोलअ, "हे शास्त्री लोगो, तम्हां लै भाल़ केही आफ़त हणीं! तम्हैं आसा इहै बोझ़ै ज़ुंण कोहिए निं च़खदै। तेता लादा तिंयां होरी मणछे पिठी। पर आप्पू निं गुंठी करै उटअ पाच तुआणअ करनअ च़ाहंदै। 47 तम्हां लै हणीं घोर आफ़त! किल्हैकि तम्हैं हआ परमेशरे तिन्‍नां गूरा लै समाधी बणाऊंदै लागै दै ज़ुंण थारै दाद-बाब आसा मारी पाऐ दै। 48 इहअ करै खोज़ा तम्हैं आपणैं बारै आप्पै अर आपणैं दादै-बाबै किऐ दै कामां दी आसा तम्हैं साझ़ू, किल्हैकि तिन्‍नैं ता पाऐ तिंयां मारी अर तम्हैं खण्हां तिन्‍नें खात्ती। 49 तैही बोला परमेशरे अक्ल इहअ, ‘मुंह छ़ाडणैं तिन्‍नां सेटा लै आपणैं गूर अर शधाणूं अर तिन्‍नां पाणै तिन्‍नां मांझ़ै कई ज़ण्हैं मारी अर कई करनै तिन्‍नां दुखी।’

50 "ताकि परमेशरे ज़ेतरै गूरो लोहू संसार शुरू हणैं ओर्ही बहाऊअ द आसा, तेतो साब-कताब लणअ एऊ जुगे लोगा का। 51 * आबले हत्या ओर्ही जकर्या तैणीं ज़सरअ बेदी अर भबना मांझ़ै लोहू बहाऊअ द आसा, हुंह खोज़ा तम्हां का सत्त कि तेतो साब-कताब लणअ एऊ ई जुगे लोगा का।

52 "हे शास्त्री लोगो, तम्हां लै हणीं घोर आफ़त! कि तम्हैं आसा डाही दी ज्ञैने कुंज़ी आप्पू का, नां तम्हैं आप्पू स्वर्गै डेऊऐ अर नां तम्हैं तिन्‍नां डेऊणैं दैंदै ज़ुंण डेऊई सका।"

53 ज़ांऊं ईशू तिधा का डेऊअ, शास्त्री अर फरीसी पल़ै पिछ़ू अर तिंयां लागै छफल़दै कि खास्सी गल्‍ले च़रच़ा करनी 54 तिंयां रहै ऐहा गल्‍ले ताका कि ईशूए मुंहां कोई बी गलत गल्‍ल ढाकी सके।